467. ка̄маджа̄такам̣ (4)

37. ка̄мам̣ ка̄майама̄насса, тасса че там̣ самиджджхати;

аддха̄ пӣтимано хоти, ладдха̄ маччо йадиччхати.

38. ка̄мам̣ ка̄майама̄насса, тасса че там̣ самиджджхати;

тато нам̣ апарам̣ ка̄ме, дхамме тан̣хам̣ва виндати.

39. гавам̣ва син̇гино син̇гам̣, вад̣д̣хама̄насса вад̣д̣хати;

евам̣ мандасса посасса, ба̄ласса авиджа̄нато;

бхиййо тан̣ха̄ пипа̄са̄ ча, вад̣д̣хама̄насса вад̣д̣хати.

40. патхабйа̄ са̄лийавакам̣, гавассам̣ [гава̄сам̣ (сӣ. сйа̄. пӣ.)] да̄сапорисам̣;

датва̄ ча [датва̄пи (сӣ. сйа̄.), датва̄ ва̄ (пӣ.)] на̄ламекасса, ити видва̄ [виддха̄ (сйа̄.)] самам̣ чаре.

41. ра̄джа̄ пасайха патхавим̣ виджитва̄, саса̄гарантам̣ махима̄васанто;

орам̣ самуддасса атиттарӯпо [атиттирӯпо (ка.)], па̄рам̣ самуддассапи паттхайетха.

42. йа̄ва ануссарам̣ ка̄ме, манаса̄ титти на̄джджхага̄;

тато ниватта̄ пат̣икамма дисва̄, те ве сутитта̄ йе [титта̄ (сӣ. сйа̄. пӣ.)] пан̃н̃а̄йа титта̄.

43. пан̃н̃а̄йа титтинам̣ [титтӣнам̣ (сӣ. сйа̄.)] сет̣т̣хам̣, на со ка̄мехи таппати;

пан̃н̃а̄йа титтам̣ пурисам̣, тан̣ха̄ на куруте васам̣.

44. апачинетхева ка̄ма̄нам̣ [ка̄ма̄ни (сӣ. сйа̄. пӣ.)], аппиччхасса алолупо;

самуддаматто пурисо, на со ка̄мехи таппати.

45. ратхака̄рова чаммасса, парикантам̣ упа̄ханам̣;

йам̣ йам̣ чаджати [джахати (сйа̄. ка.)] ка̄ма̄нам̣, там̣ там̣ сампаджджате сукхам̣;

саббам̣ че сукхамиччхеййа, саббе ка̄ме париччадже.

46. ат̣т̣ха те бха̄сита̄ га̄тха̄, сабба̄ хонти сахассийо [сахассийа̄ (?) упари сутасомаджа̄таке татха̄ диссати];

пат̣иган̣ха маха̄брахме, са̄дхетам̣ тава бха̄ситам̣.

47. на ме аттхо сахассехи, сатехи нахутехи ва̄;

паччхимам̣ бха̄сато га̄тхам̣, ка̄ме ме на рато мано.

48. бхадрако [саддо (сӣ.)] вата̄йам̣ ма̄н̣авако, саббалокавидӯ муни;

йо имам̣ тан̣хам̣ [йо тан̣хам̣ (сӣ. сйа̄.)] дуккхаджананим̣, париджа̄на̄ти пан̣д̣итоти.

ка̄маджа̄такам̣ чатуттхам̣.