13. кусана̄л̣ивагго

121. каре сариккхо атха ва̄пи сет̣т̣хо, нихӣнако ва̄пи кареййа еко;

кареййумете [кареййум̣ те (сӣ. пӣ.)] бйасане уттаматтхам̣, йатха̄ ахам̣ кусана̄л̣и руча̄йанти.

кусана̄л̣иджа̄такам̣ пат̣хамам̣.

122. йасам̣ ладдха̄на думмедхо, анаттхам̣ чарати аттано;

аттано ча паресан̃ча, хим̣са̄йа пат̣ипаджджатӣти.

думмедхаджа̄такам̣ дутийам̣.

123. асаббаттхага̄мим̣ ва̄чам̣, ба̄ло саббаттха бха̄сати;

на̄йам̣ дадхим̣ веди на [на веди (ка.)] нан̇галӣсам̣, дадхиппайам̣ [дадхимпайам̣ (сӣ. пӣ.)] ман̃н̃ати нан̇галӣсанти.

нан̇галӣсаджа̄такам̣ татийам̣.

124. ва̄йаметхева пурисо, на ниббиндеййа пан̣д̣ито;

ва̄йа̄масса пхалам̣ пасса, бхутта̄ амба̄ анӣтиханти.

амбаджа̄такам̣ чатуттхам̣.

125. бахумпи со викаттхеййа, ан̃н̃ам̣ джанападам̣ гато;

анва̄гантва̄на дӯсеййа, бхун̃джа бхоге кат̣а̄хака̄ти.

кат̣а̄хакаджа̄такам̣ пан̃чамам̣.

126. тадевекасса [татхевекасса (сӣ. сйа̄. пӣ. ат̣т̣ха. мӯлапа̄т̣хо)] калйа̄н̣ам̣, тадевекасса па̄пакам̣;

тасма̄ саббам̣ на калйа̄н̣ам̣, саббам̣ ва̄пи на па̄паканти.

асилаккхан̣аджа̄такам̣ чхат̣т̣хам̣.

127. те деса̄ та̄ни ваттхӯни, ахан̃ча ванагочаро;

анувичча кхо там̣ ган̣хеййум̣, пива [пипа (сӣ. пӣ.)] кхӣрам̣ калан̣д̣ука̄ти.

калан̣д̣укаджа̄такам̣ саттамам̣.

128. йо ве дхаммам̣ дхаджам̣ [дхаммадхаджам̣ (сйа̄. пӣ. ка.)] катва̄, нигӯл̣хо па̄пама̄чаре;

висса̄сайитва̄ бхӯта̄ни, бил̣а̄рам̣ на̄ма там̣ ватанти.

бил̣а̄раватаджа̄такам̣ ат̣т̣хамам̣.

129. на̄йам̣ сикха̄ пун̃н̃ахету, гха̄сахету айам̣ сикха̄;

на̄н̇гут̣т̣хаган̣анам̣ йа̄ти, алам̣ те хоту аггика̄ти.

аггикабха̄радва̄джаджа̄такам̣ навамам̣.

130. йатха̄ ва̄ча̄ ча бхун̃джассу, йатха̄ бхуттан̃ча бйа̄хара;

убхайам̣ те на самети, ва̄ча̄ бхуттан̃ча косийети.

косийаджа̄такам̣ дасамам̣.

кусана̄л̣ивагго [сариккхавагго (ка.)] терасамо.

тассудда̄нам̣ –

кусана̄л̣исиривхайано ча йасам̣, дадхи мамба кат̣а̄хакапан̃чамако;

атха па̄пака кхӣра бил̣а̄раватам̣, сикхи косийасавхайанена даса̄ти.