7. сабрахмакасуттам̣

106. вуттан̃хетам̣ бхагавата̄, вуттамарахата̄ти ме сутам̣ –

‘‘сабрахмака̄ни, бхиккхаве, та̄ни кула̄ни йесам̣ путта̄нам̣ ма̄та̄питаро аджджха̄га̄ре пӯджита̄ хонти. сапуббадевата̄ни, бхиккхаве, та̄ни кула̄ни йесам̣ путта̄нам̣ ма̄та̄питаро аджджха̄га̄ре пӯджита̄ хонти. сапубба̄чарийака̄ни, бхиккхаве, та̄ни кула̄ни йесам̣ путта̄нам̣ ма̄та̄питаро аджджха̄га̄ре пӯджита̄ хонти. са̄хунеййака̄ни, бхиккхаве, та̄ни кула̄ни йесам̣ путта̄нам̣ ма̄та̄питаро аджджха̄га̄ре пӯджита̄ хонти.

‘‘‘брахма̄’ти, бхиккхаве, ма̄та̄питӯнам̣ етам̣ адхивачанам̣. ‘пуббадевата̄’ти, бхиккхаве, ма̄та̄питӯнам̣ етам̣ адхивачанам̣. ‘пубба̄чарийа̄’ти, бхиккхаве, ма̄та̄питӯнам̣ етам̣ адхивачанам̣. ‘а̄хунеййа̄’ти, бхиккхаве, ма̄та̄питӯнам̣ етам̣ адхивачанам̣. там̣ кисса хету? бахука̄ра̄, бхиккхаве, ма̄та̄питаро путта̄нам̣ а̄па̄дака̄ посака̄ имасса локасса дассета̄ро’’ти. етаматтхам̣ бхагава̄ авоча. таттхетам̣ ити вуччати –

‘‘брахма̄ти ма̄та̄питаро, пубба̄чарийа̄ти вуччаре;

а̄хунеййа̄ ча путта̄нам̣, паджа̄йа анукампака̄.

‘‘тасма̄ хи не намассеййа, саккареййа ча пан̣д̣ито;

аннена атха па̄нена, ваттхена сайанена ча;

уччха̄данена нха̄панена [наха̄панена (сӣ.)], па̄да̄нам̣ дхованена ча.

‘‘та̄йа нам̣ па̄ричарийа̄йа, ма̄та̄питӯсу пан̣д̣ита̄;

идхева нам̣ пасам̣санти, печча сагге памодатӣ’’ти.

айампи аттхо вутто бхагавата̄, ити ме сутанти. саттамам̣.