8. бахука̄расуттам̣

107. вуттан̃хетам̣ бхагавата̄, вуттамарахата̄ти ме сутам̣ –

‘‘бахука̄ра̄ [бахӯпака̄ра̄ (сӣ. пӣ.)], бхиккхаве, бра̄хман̣агахапатика̄ тумха̄кам̣ йе во [йе те (саббаттха)] паччупат̣т̣хита̄ чӣварапин̣д̣апа̄тасена̄санагила̄напаччайабхесаджджапариккха̄рехи. тумхепи, бхиккхаве, бахука̄ра̄ бра̄хман̣агахапатика̄нам̣ йам̣ [йе (?)] несам̣ дхаммам̣ десетха а̄дикалйа̄н̣ам̣ маджджхекалйа̄н̣ам̣ парийоса̄накалйа̄н̣ам̣ са̄ттхам̣ сабйан̃джанам̣, кевалапарипун̣н̣ам̣ парисуддхам̣ брахмачарийам̣ пака̄сетха. евамидам̣, бхиккхаве, ан̃н̃аман̃н̃ам̣ нисса̄йа брахмачарийам̣ вуссати огхасса ниттхаран̣аттха̄йа самма̄ дуккхасса антакирийа̄йа̄’’ти. етаматтхам̣ бхагава̄ авоча. таттхетам̣ ити вуччати –

‘‘са̄га̄ра̄ анага̄ра̄ ча, убхо ан̃н̃он̃н̃аниссита̄;

а̄ра̄дхайанти саддхаммам̣, йогаккхемам̣ ануттарам̣.

‘‘са̄га̄ресу ча чӣварам̣, паччайам̣ сайана̄санам̣;

анага̄ра̄ пат̣иччханти, париссайавиноданам̣.

‘‘сугатам̣ [пуггалам̣ (сӣ. ка.)] пана нисса̄йа, гахат̣т̣ха̄ гхарамесино;

саддаха̄на̄ арахатам̣, арийапан̃н̃а̄йа джха̄йино.

‘‘идха дхаммам̣ чаритва̄на, маггам̣ сугатига̄минам̣;

нандино девалокасмим̣, моданти ка̄мака̄мино’’ти.

айампи аттхо вутто бхагавата̄, ити ме сутанти. ат̣т̣хамам̣.