10. надӣсотасуттам̣

109. вуттан̃хетам̣ бхагавата̄, вуттамарахата̄ти ме сутам̣ –

‘‘сеййатха̄пи, бхиккхаве, пурисо надийа̄ сотена овуйхеййа пийарӯпаса̄тарӯпена. таменам̣ чаккхума̄ пурисо тӣре т̣хито дисва̄ евам̣ вадеййа – ‘кин̃ча̄пи кхо твам̣, амбхо пуриса, надийа̄ сотена овуйхаси пийарӯпаса̄тарӯпена, аттхи четтха хет̣т̣ха̄ рахадо саӯми са̄ват̣т̣о сагахо сараккхасо йам̣ твам̣, амбхо пуриса, рахадам̣ па̄пун̣итва̄ маран̣ам̣ ва̄ нигаччхаси маран̣аматтам̣ ва̄ дуккха’нти. атха кхо со, бхиккхаве, пурисо тасса пурисасса саддам̣ сутва̄ хаттхехи ча па̄дехи ча пат̣исотам̣ ва̄йамеййа.

‘‘упама̄ кхо ме айам̣, бхиккхаве, ката̄ аттхасса вин̃н̃а̄пана̄йа. айам̣ четтха [айам̣ чеветтха (сйа̄.)] аттхо – ‘надийа̄ сото’ти кхо, бхиккхаве, тан̣ха̄йетам̣ адхивачанам̣.

‘‘‘пийарӯпам̣ са̄тарӯпа’нти кхо, бхиккхаве, чханнетам̣ аджджхаттика̄нам̣ а̄йатана̄нам̣ адхивачанам̣.

‘‘‘хет̣т̣ха̄ рахадо’ти кхо, бхиккхаве, пан̃чаннам̣ орамбха̄гийа̄нам̣ сам̣йоджана̄нам̣ адхивачанам̣;

‘‘‘ӯмибхайа’нти кхо [сан̃ӣмӣти кхо (бахӯсу)], бхиккхаве, кодхупа̄йа̄сассетам̣ адхивачанам̣;

‘‘‘а̄ват̣т̣а’нти кхо [са̄ват̣т̣оти кхо (бахӯсу)], бхиккхаве, пан̃чаннетам̣ ка̄магун̣а̄нам̣ адхивачанам̣;

‘‘‘гахараккхасо’ти кхо [сагахо сараккхасоти кхо (бахӯсу)], бхиккхаве, ма̄туга̄массетам̣ адхивачанам̣;

‘‘‘пат̣исото’ти кхо, бхиккхаве, неккхаммассетам̣ адхивачанам̣;

‘‘‘хаттхехи ча па̄дехи ча ва̄йа̄мо’ти кхо, бхиккхаве, вӣрийа̄рамбхассетам̣ адхивачанам̣;

‘‘‘чаккхума̄ пурисо тӣре т̣хитоти кхо, бхиккхаве, татха̄гатассетам̣ адхивачанам̣ арахато самма̄самбуддхасса̄’’ти. етаматтхам̣ бхагава̄ авоча. таттхетам̣ ити вуччати –

‘‘саха̄пи дуккхена джахеййа ка̄ме, йогаккхемам̣ а̄йатим̣ паттхайа̄но;

саммаппаджа̄но сувимуттачитто, вимуттийа̄ пхассайе таттха таттха;

са ведагӯ вӯситабрахмачарийо, локантагӯ па̄рагатоти вуччатӣ’’ти.

айампи аттхо вутто бхагавата̄, ити ме сутанти. дасамам̣.