11. чарасуттам̣

110. вуттан̃хетам̣ бхагавата̄, вуттамарахата̄ти ме сутам̣ –

‘‘чарато чепи, бхиккхаве, бхиккхуно уппаджджати ка̄мавитакко ва̄ бйа̄па̄давитакко ва̄ вихим̣са̄витакко ва̄. тан̃че, бхиккхаве, бхиккху адхива̄сети наппаджахати на винодети на бйантӣкароти [бйантикароти (сӣ. пӣ.), бйантам̣ кароти (ка.)] анабха̄вам̣ гамети. чарампи, бхиккхаве, бхиккху евам̣бхӯто ана̄та̄пӣ анотта̄пӣ [аноттаппӣ (саббаттха) дуканипа̄те, ан̇гуттаре 1.4.11 пасситаббам̣] сататам̣ самитам̣ кусӣто хӣнавӣрийоти вуччати.

‘‘т̣хитасса чепи, бхиккхаве, бхиккхуно уппаджджати ка̄мавитакко ва̄ бйа̄па̄давитакко ва̄ вихим̣са̄витакко ва̄. тан̃че, бхиккхаве, бхиккху адхива̄сети наппаджахати на винодети на бйантӣкароти на анабха̄вам̣ гамети. т̣хитопи, бхиккхаве, бхиккху евам̣бхӯто ана̄та̄пӣ анотта̄пӣ сататам̣ самитам̣ кусӣто хӣнавӣрийоти вуччати.

‘‘нисиннасса чепи, бхиккхаве, бхиккхуно уппаджджати ка̄мавитакко ва̄ бйа̄па̄давитакко ва̄ вихим̣са̄витакко ва̄. тан̃че, бхиккхаве, бхиккху адхива̄сети наппаджахати на винодети на бйантӣкароти на анабха̄вам̣ гамети. нисиннопи, бхиккхаве, бхиккху евам̣бхӯто ана̄та̄пӣ анотта̄пӣ сататам̣ самитам̣ кусӣто хӣнавӣрийоти вуччати.

‘‘сайа̄насса чепи, бхиккхаве, бхиккхуно джа̄гарасса уппаджджати ка̄мавитакко ва̄ бйа̄па̄давитакко ва̄ вихим̣са̄витакко ва̄. тан̃че, бхиккхаве, бхиккху адхива̄сети наппаджахати на винодети на бйантӣкароти на анабха̄вам̣ гамети. сайа̄нопи, бхиккхаве, бхиккху джа̄гаро евам̣бхӯто ана̄та̄пӣ анотта̄пӣ сататам̣ самитам̣ кусӣто хӣнавӣрийоти вуччати.

‘‘чарато чепи, бхиккхаве, бхиккхуно уппаджджати ка̄мавитакко ва̄ бйа̄па̄давитакко ва̄ вихим̣са̄витакко ва̄. тан̃че, бхиккхаве, бхиккху на̄дхива̄сети паджахати винодети бйантӣкароти анабха̄вам̣ гамети. чарампи, бхиккхаве, бхиккху евам̣бхӯто а̄та̄пӣ отта̄пӣ [оттаппӣ (саббаттха)] сататам̣ самитам̣ а̄раддхавӣрийо пахитаттоти вуччати.

‘‘т̣хитасса чепи, бхиккхаве, бхиккхуно уппаджджати ка̄мавитакко ва̄ бйа̄па̄давитакко ва̄ вихим̣са̄витакко ва̄. тан̃че, бхиккхаве, бхиккху на̄дхива̄сети паджахати винодети бйантӣкароти анабха̄вам̣ гамети. т̣хитопи, бхиккхаве, бхиккху евам̣бхӯто а̄та̄пӣ отта̄пӣ сататам̣ самитам̣ а̄раддхавӣрийо пахитаттоти вуччати.

‘‘нисиннасса чепи, бхиккхаве, бхиккхуно уппаджджати ка̄мавитакко ва̄ бйа̄па̄давитакко ва̄ вихим̣са̄витакко ва̄. тан̃че, бхиккхаве, бхиккху на̄дхива̄сети паджахати винодети бйантӣкароти анабха̄вам̣ гамети. нисиннопи, бхиккхаве, бхиккху евам̣бхӯто а̄та̄пӣ отта̄пӣ сататам̣ самитам̣ а̄раддхавӣрийо пахитаттоти вуччати.

‘‘сайа̄насса чепи, бхиккхаве, бхиккхуно джа̄гарасса уппаджджати ка̄мавитакко ва̄ бйа̄па̄давитакко ва̄ вихим̣са̄витакко ва̄. тан̃че, бхиккхаве, бхиккху на̄дхива̄сети паджахати винодети бйантӣкароти анабха̄вам̣ гамети. сайа̄нопи, бхиккхаве, бхиккху джа̄гаро евам̣бхӯто а̄та̄пӣ отта̄пӣ сататам̣ самитам̣ а̄раддхавӣрийо пахитаттоти вуччатӣ’’ти. етаматтхам̣ бхагава̄ авоча. таттхетам̣ ити вуччати –

‘‘чарам̣ ва̄ йади ва̄ тит̣т̣хам̣, нисинно уда ва̄ сайам̣;

йо витаккам̣ витаккети, па̄пакам̣ геханисситам̣.

‘‘куммаггам̣ пат̣ипанно [куммаггаппат̣ипанно (а. ни. 4.11)] со, моханеййесу муччхито;

абхаббо та̄дисо бхиккху, пхут̣т̣хум̣ самбодхимуттамам̣.

‘‘йо ча чарам̣ ва̄ тит̣т̣хам̣ ва̄ [йо чарам̣ ва̄ йади ва̄ тит̣т̣хам̣ (сйа̄.), йо чарам̣ ва̄тха тит̣т̣хам̣ ва̄ (сӣ. ка.)], нисинно уда ва̄ сайам̣;

витаккам̣ самайитва̄на, витаккӯпасаме рато;

бхаббо со та̄дисо бхиккху, пхут̣т̣хум̣ самбодхимуттама’’нти.

айампи аттхо вутто бхагавата̄, ити ме сутанти. ека̄дасамам̣.