3. сан̇гха̄т̣икан̣н̣асуттам̣

92. вуттан̃хетам̣ бхагавата̄, вуттамарахата̄ти ме сутам̣ –

‘‘сан̇гха̄т̣икан̣н̣е чепи, бхиккхаве, бхиккху гахетва̄ пит̣т̣хито пит̣т̣хито анубандхо асса па̄де па̄дам̣ никкхипанто, со ча хоти абхиджджха̄лу ка̄месу тиббаса̄ра̄го бйа̄панначитто падут̣т̣хаманасан̇каппо мут̣т̣хассати асампаджа̄но асама̄хито виббхантачитто па̄катиндрийо; атха кхо со а̄рака̄ва майхам̣, ахан̃ча тасса. там̣ кисса хету? дхамман̃хи со, бхиккхаве, бхиккху на пассати. дхаммам̣ апассанто на мам̣ пассати [мам̣ на пассати (сйа̄.)].

‘‘йоджанасате чепи со, бхиккхаве, бхиккху вихареййа. со ча хоти анабхиджджха̄лу ка̄месу на тиббаса̄ра̄го абйа̄панначитто ападут̣т̣хаманасан̇каппо упат̣т̣хитассати сампаджа̄но сама̄хито екаггачитто сам̣вутиндрийо; атха кхо со сантикева майхам̣, ахан̃ча тасса. там̣ кисса хету? дхаммам̣ хи со, бхиккхаве, бхиккху пассати; дхаммам̣ пассанто мам̣ пассатӣ’’ти. етаматтхам̣ бхагава̄ авоча. таттхетам̣ ити вуччати –

‘‘анубандхопи че асса, махиччхо ча вигха̄тава̄;

еджа̄нуго анеджасса, ниббутасса аниббуто;

гиддхо со вӣтагедхасса, пасса йа̄ван̃ча а̄рака̄.

‘‘йо ча дхаммамабхин̃н̃а̄йа, дхаммаман̃н̃а̄йа пан̣д̣ито;

рахадова нива̄те ча, анеджо вӯпасаммати.

‘‘анеджо со анеджасса, ниббутасса ча ниббуто;

агиддхо вӣтагедхасса, пасса йа̄ван̃ча сантике’’ти.

айампи аттхо вутто бхагавата̄, ити ме сутанти. татийам̣.