9. дха̄тусосам̣санданасуттам̣

78. вуттан̃хетам̣ бхагавата̄, вуттамарахата̄ти ме сутам̣ –

‘‘дха̄тусо, бхиккхаве, сатта̄ саттехи саддхим̣ сам̣санданти саменти. хӣна̄дхимуттика̄ сатта̄ хӣна̄дхимуттикехи саттехи саддхим̣ сам̣санданти саменти, калйа̄н̣а̄дхимуттика̄ сатта̄ калйа̄н̣а̄дхимуттикехи саттехи саддхим̣ сам̣санданти саменти.

‘‘атӣтампи, бхиккхаве, аддха̄нам̣ дха̄тусова сатта̄ саттехи саддхим̣ сам̣сандим̣су самим̣су. хӣна̄дхимуттика̄ сатта̄ хӣна̄дхимуттикехи саттехи саддхим̣ сам̣сандим̣су самим̣су, калйа̄н̣а̄дхимуттика̄ сатта̄ калйа̄н̣а̄дхимуттикехи саттехи саддхим̣ сам̣сандим̣су самим̣су.

‘‘ана̄гатампи, бхиккхаве, аддха̄нам̣ дха̄тусова сатта̄ саттехи саддхим̣ сам̣сандиссанти самессанти. хӣна̄дхимуттика̄ сатта̄ хӣна̄дхимуттикехи саттехи саддхим̣ сам̣сандиссанти самессанти, калйа̄н̣а̄дхимуттика̄ сатта̄ калйа̄н̣а̄дхимуттикехи саттехи саддхим̣ сам̣сандиссанти самессанти.

‘‘етарахипи, бхиккхаве, паччуппанам̣ аддха̄нам̣ дха̄тусова сатта̄ саттехи саддхим̣ сам̣санданти саменти. хӣна̄дхимуттика̄ сатта̄ хӣна̄дхимуттикехи саттехи саддхим̣ сам̣санданти саменти, калйа̄н̣а̄дхимуттика̄ сатта̄ калйа̄н̣а̄дхимуттикехи саттехи саддхим̣ сам̣санданти саментӣ’’ти. етаматтхам̣ бхагава̄ авоча. таттхетам̣ ити вуччати –

‘‘сам̣сагга̄ ванатхо джа̄то, асам̣саггена чхиджджати;

париттам̣ да̄рума̄руйха, йатха̄ сӣде махан̣н̣аве.

‘‘евам̣ кусӣтама̄гамма, са̄дхуджӣвӣпи сӣдати;

тасма̄ там̣ париваджджеййа, кусӣтам̣ хӣнавӣрийам̣.

‘‘павивиттехи арийехи, пахитаттехи джха̄йибхи;

ниччам̣ а̄раддхавӣрийехи, пан̣д̣итехи саха̄васе’’ти.

айампи аттхо вутто бхагавата̄, ити ме сутанти. навамам̣.