3. ниссаран̣ийасуттам̣

72. вуттан̃хетам̣ бхагавата̄, вуттамарахата̄ти ме сутам̣ –

‘‘тиссо има̄, бхиккхаве, ниссаран̣ийа̄ [нисса̄ран̣ӣйа̄ (а. ни. 5.200)] дха̄туйо. катама̄ тиссо? ка̄ма̄наметам̣ ниссаран̣ам̣ йадидам̣ неккхаммам̣, рӯпа̄наметам̣ ниссаран̣ам̣ йадидам̣ а̄руппам̣, йам̣ кхо пана кин̃чи бхӯтам̣ сан̇кхатам̣ пат̣иччасамуппаннам̣ ниродхо тасса ниссаран̣ам̣ – има̄ кхо, бхиккхаве, тиссо ниссаран̣ийа̄ дха̄туйо’’ти. етаматтхам̣ бхагава̄ авоча. таттхетам̣ ити вуччати –

‘‘ка̄маниссаран̣ам̣ н̃атва̄, рӯпа̄нан̃ча атиккамам̣;

саббасан̇кха̄расаматхам̣, пхусам̣ а̄та̄пи саббада̄.

‘‘са ве саммаддасо бхиккху, йато таттха вимуччати;

абхин̃н̃а̄восито санто, са ве йога̄тиго мунӣ’’ти.

айампи аттхо вутто бхагавата̄, ити ме сутанти. татийам̣.