2. дутийавагго

1. пун̃н̃акирийаваттхусуттам̣

60. вуттан̃хетам̣ бхагавата̄, вуттамарахата̄ти ме сутам̣ –

‘‘тӣн̣има̄ни, бхиккхаве, пун̃н̃акирийаваттхӯни. катама̄ни тӣн̣и? да̄намайам̣ пун̃н̃акирийаваттху, сӣламайам̣ пун̃н̃акирийаваттху, бха̄вана̄майам̣ пун̃н̃акирийаваттху – има̄ни кхо, бхиккхаве, тӣн̣и пун̃н̃акирийаваттхӯнӣ’’ти. етаматтхам̣ бхагава̄ авоча. таттхетам̣ ити вуччати –

‘‘пун̃н̃амева со сиккхеййа, а̄йатаггам̣ сукхудрайам̣;

да̄нан̃ча самачарийан̃ча, меттачиттан̃ча бха̄вайе.

‘‘ете дхамме бха̄вайитва̄, тайо сукхасамуддайе;

абйа̄паджджхам̣ сукхам̣ локам̣, пан̣д̣ито упападжджатӣ’’ти.

айампи аттхо вутто бхагавата̄, ити ме сутанти. пат̣хамам̣.

2. чаккхусуттам̣

61. вуттан̃хетам̣ бхагавата̄, вуттамарахата̄ти ме сутам̣ –

‘‘тӣн̣има̄ни, бхиккхаве, чаккхӯни. катама̄ни тӣн̣и? мам̣сачаккху, диббачаккху, пан̃н̃а̄чаккху – има̄ни кхо, бхиккхаве, тӣн̣и чаккхӯнӣ’’ти. етаматтхам̣ бхагава̄ авоча. таттхетам̣ ити вуччати –

‘‘мам̣сачаккху диббачаккху, пан̃н̃а̄чаккху ануттарам̣;

ета̄ни тӣн̣и чаккхӯни, аккха̄си пурисуттамо.

‘‘мам̣сачаккхусса уппа̄до, магго диббасса чаккхуно;

йато н̃а̄н̣ам̣ удапа̄ди, пан̃н̃а̄чаккху ануттарам̣;

йасса чаккхусса пат̣ила̄бха̄, саббадуккха̄ памуччатӣ’’ти.

айампи аттхо вутто бхагавата̄, ити ме сутанти. дутийам̣.

3. индрийасуттам̣

62. вуттан̃хетам̣ бхагавата̄, вуттамарахата̄ти ме сутам̣ –

‘‘тӣн̣има̄ни, бхиккхаве, индрийа̄ни. катама̄ни тӣн̣и? анан̃н̃а̄тан̃н̃асса̄мӣтиндрийам̣, ан̃н̃индрийам̣, ан̃н̃а̄та̄виндрийам̣ – има̄ни кхо, бхиккхаве, тӣн̣и индрийа̄нӣ’’ти. етаматтхам̣ бхагава̄ авоча. таттхетам̣ ити вуччати –

‘‘секхасса сиккхама̄насса, уджумагга̄нуса̄рино;

кхайасмим̣ пат̣хамам̣ н̃а̄н̣ам̣, тато ан̃н̃а̄ анантара̄.

‘‘тато ан̃н̃а̄ вимуттасса, н̃а̄н̣ам̣ ве хоти та̄дино;

акуппа̄ ме вимуттӣти, бхавасам̣йоджанаккхайа̄.

‘‘са ве [саче (сӣ. сйа̄.)] индрийасампанно, санто сантипаде рато;

дха̄рети антимам̣ дехам̣, джетва̄ ма̄рам̣ сава̄хини’’нти.

айампи аттхо вутто бхагавата̄, ити ме сутанти. татийам̣.

4. аддха̄суттам̣

63. вуттан̃хетам̣ бхагавата̄, вуттамарахата̄ти ме сутам̣ –

‘‘тайоме, бхиккхаве, аддха̄. катаме тайо? атӣто аддха̄, ана̄гато аддха̄, паччуппанно аддха̄ – име кхо, бхиккхаве, тайо аддха̄’’ти. етаматтхам̣ бхагава̄ авоча. таттхетам̣ ити вуччати –

‘‘аккхеййасан̃н̃ино сатта̄, аккхеййасмим̣ патит̣т̣хита̄;

аккхеййам̣ апарин̃н̃а̄йа, йогама̄йанти маччуно.

‘‘аккхеййан̃ча парин̃н̃а̄йа, аккха̄та̄рам̣ на ман̃н̃ати;

пхут̣т̣хо вимоккхо манаса̄, сантипадамануттарам̣.

‘‘са ве [саче (ка.)] аккхеййасампанно, санто сантипаде рато;

сан̇кха̄йасевӣ дхаммат̣т̣хо, сан̇кхйам̣ нопети ведагӯ’’ти.

айампи аттхо вутто бхагавата̄, ити ме сутанти. чатуттхам̣.

5. дуччаритасуттам̣

64. вуттан̃хетам̣ бхагавата̄, вуттамарахата̄ти ме сутам̣ –

‘‘тӣн̣има̄ни, бхиккхаве, дуччарита̄ни. катама̄ни тӣн̣и? ка̄йадуччаритам̣, вачӣдуччаритам̣, манодуччаритам̣ – има̄ни кхо, бхиккхаве, тӣн̣и дуччарита̄нӣ’’ти. етаматтхам̣ бхагава̄ авоча. таттхетам̣ ити вуччати –

‘‘ка̄йадуччаритам̣ катва̄, вачӣдуччарита̄ни ча;

манодуччаритам̣ катва̄, йан̃чан̃н̃ам̣ досасам̣хитам̣.

‘‘акатва̄ кусалам̣ каммам̣, катва̄на̄кусалам̣ бахум̣;

ка̄йасса бхеда̄ дуппан̃н̃о, нирайам̣ сопападжджатӣ’’ти.

айампи аттхо вутто бхагавата̄, ити ме сутанти. пан̃чамам̣.

6. сучаритасуттам̣

65. вуттан̃хетам̣ бхагавата̄, вуттамарахата̄ти ме сутам̣ –

‘‘тӣн̣има̄ни, бхиккхаве, сучарита̄ни. катама̄ни тӣн̣и? ка̄йасучаритам̣, вачӣсучаритам̣, маносучаритам̣ – има̄ни кхо, бхиккхаве, тӣн̣и сучарита̄нӣ’’ти. етаматтхам̣ бхагава̄ авоча. таттхетам̣ ити вуччати –

‘‘ка̄йадуччаритам̣ хитва̄, вачӣдуччарита̄ни ча;

манодуччаритам̣ хитва̄, йан̃чан̃н̃ам̣ досасам̣хитам̣.

‘‘акатва̄кусалам̣ каммам̣, катва̄на кусалам̣ бахум̣;

ка̄йасса бхеда̄ саппан̃н̃о, саггам̣ со упападжджатӣ’’ти.

айампи аттхо вутто бхагавата̄, ити ме сутанти. чхат̣т̣хам̣.

7. сочеййасуттам̣

66. вуттан̃хетам̣ бхагавата̄, вуттамарахата̄ти ме сутам̣ –

‘‘тӣн̣има̄ни, бхиккхаве, сочеййа̄ни. катама̄ни тӣн̣и? ка̄йасочеййам̣, вачӣсочеййам̣, маносочеййам̣ – има̄ни кхо, бхиккхаве, тӣн̣и сочеййа̄нӣ’’ти. етаматтхам̣ бхагава̄ авоча. таттхетам̣ ити вуччати –

‘‘ка̄йасучим̣ вачӣсучим̣ [ва̄ча̄сучим̣ (ка.)], четосучимана̄савам̣;

сучим̣ сочеййасампаннам̣, а̄ху саббаппаха̄йина’’нти [а̄ху нинха̄тапа̄паканти (а. ни. 3.122) йуттатарам̣].

айампи аттхо вутто бхагавата̄, ити ме сутанти. саттамам̣.

8. монеййасуттам̣

67. вуттан̃хетам̣ бхагавата̄, вуттамарахата̄ти ме сутам̣ –

‘‘тӣн̣има̄ни, бхиккхаве, монеййа̄ни. катама̄ни тӣн̣и? ка̄йамонеййам̣, вачӣмонеййам̣, маномонеййам̣ – има̄ни кхо, бхиккхаве, тӣн̣и монеййа̄нӣ’’ти. етаматтхам̣ бхагава̄ авоча. таттхетам̣ ити вуччати –

‘‘ка̄йамуним̣ вачӣмуним̣, маномунимана̄савам̣;

муним̣ монеййасампаннам̣, а̄ху нинха̄тапа̄пака’’нти [а̄ху саббаппаха̄йинанти (а. ни. 3.123)].

айампи аттхо вутто бхагавата̄, ити ме сутанти. ат̣т̣хамам̣.

9. пат̣хамара̄гасуттам̣

68. вуттан̃хетам̣ бхагавата̄, вуттамарахата̄ти ме сутам̣ –

‘‘йасса кассачи, бхиккхаве, ра̄го аппахӣно, досо аппахӣно, мохо аппахӣно – айам̣ вуччати, бхиккхаве, ‘баддхо [бандо (бахӯсу)] ма̄расса пат̣имуккасса ма̄рапа̄со йатха̄ка̄макаран̣ӣйо [йатха̄ ка̄макаран̣ӣйо ча (сӣ. сйа̄. пӣ. ка.)] па̄пимато’. йасса кассачи, бхиккхаве, ра̄го пахӣно, досо пахӣно, мохо пахӣно – айам̣ вуччати, бхиккхаве, ‘абаддхо ма̄расса омуккасса ма̄рапа̄со на йатха̄ ка̄макаран̣ӣйо [на йатха̄ка̄макаран̣ӣйо ча (сйа̄.)] па̄пимато’’’ти. етаматтхам̣ бхагава̄ авоча. таттхетам̣ ити вуччати –

‘‘йасса ра̄го ча досо ча, авиджджа̄ ча вира̄джита̄;

там̣ бха̄витаттан̃н̃атарам̣, брахмабхӯтам̣ татха̄гатам̣;

буддхам̣ верабхайа̄тӣтам̣, а̄ху саббаппаха̄йина’’нти.

айампи аттхо вутто бхагавата̄, ити ме сутанти. навамам̣.

10. дутийара̄гасуттам̣

69. вуттан̃хетам̣ бхагавата̄, вуттамарахата̄ти ме сутам̣ –

‘‘йасса кассачи, бхиккхаве, бхиккхусса ва̄ бхиккхунийа̄ ва̄ ра̄го аппахӣно, досо аппахӣно, мохо аппахӣно – айам̣ вуччати, бхиккхаве, на ‘атари [атин̣н̣о (ка. сӣ. ка.)] самуддам̣ саӯмим̣ савӣчим̣ са̄ват̣т̣ам̣ сагахам̣ сараккхасам̣’. йасса кассачи, бхиккхаве, бхиккхусса ва̄ бхиккхунийа̄ ва̄ ра̄го пахӣно, досо пахӣно, мохо пахӣно – айам̣ вуччати, бхиккхаве, ‘атари самуддам̣ саӯмим̣ савӣчим̣ са̄ват̣т̣ам̣ сагахам̣ сараккхасам̣, тин̣н̣о па̄ран̇гато [па̄рагато (сӣ. ат̣т̣ха. сйа̄.)] тхале тит̣т̣хати бра̄хман̣о’’’ти. етаматтхам̣ бхагава̄ авоча. таттхетам̣ ити вуччати –

‘‘йасса ра̄го ча досо ча, авиджджа̄ ча вира̄джита̄;

сомам̣ самуддам̣ сагахам̣ сараккхасам̣, саӯмибхайам̣ дуттарам̣ аччата̄ри.

‘‘сан̇га̄тиго маччуджахо нирӯпадхи, паха̄си дуккхам̣ апунаббхава̄йа;

аттхан̇гато со на пама̄н̣амети, амохайи маччура̄джанти брӯмӣ’’ти.

айампи аттхо вутто бхагавата̄, ити ме сутанти. дасамам̣.

дутийо вагго нит̣т̣хито.

тассудда̄нам̣ –

пун̃н̃ам̣ чаккху атха индрийа̄ни [аттхиндрийа̄ (сйа̄.)], аддха̄ ча чаритам̣ дуве сочи [сучи (сйа̄.)];

муно [муне (сйа̄.)] атха ра̄гадуве, пуна ваггама̄ху дутийамуттаманти.