9. сиккха̄нисам̣сасуттам̣

46. вуттан̃хетам̣ бхагавата̄, вуттамарахата̄ти ме сутам̣ –

‘‘сиккха̄нисам̣са̄, бхиккхаве, вихаратха пан̃н̃уттара̄ вимуттиса̄ра̄ сата̄дхипатеййа̄. сиккха̄нисам̣са̄нам̣, бхиккхаве, вихаратам̣ пан̃н̃уттара̄нам̣ вимуттиса̄ра̄нам̣ сата̄дхипатеййа̄нам̣ двиннам̣ пхала̄нам̣ ан̃н̃атарам̣ пхалам̣ па̄т̣икан̇кхам̣ – дит̣т̣хева дхамме ан̃н̃а̄, сати ва̄ упа̄дисесе ана̄га̄мита̄’’ти. етаматтхам̣ бхагава̄ авоча. таттхетам̣ ити вуччати –

‘‘парипун̣н̣асиккхам̣ [парипун̣н̣асекхам̣ (сӣ.), парипун̣н̣асеккхам̣ (сйа̄.)] апаха̄надхаммам̣, пан̃н̃уттарам̣ джа̄тикхайантадассим̣;

там̣ ве муним̣ антимадехадха̄рим̣, ма̄ран̃джахам̣ брӯми джара̄йа па̄рагум̣.

‘‘тасма̄ сада̄ джха̄нарата̄ сама̄хита̄, а̄та̄пино джа̄тикхайантадассино;

ма̄рам̣ сасенам̣ абхибхуййа бхиккхаво, бхаватха джа̄тимаран̣асса па̄рага̄’’ти.

айампи аттхо вутто бхагавата̄, ити ме сутанти. навамам̣.