5. ба̄лавагго

60. дӣгха̄ джа̄гарато ратти, дӣгхам̣ сантасса йоджанам̣;

дӣгхо ба̄ла̄нам̣ сам̣са̄ро, саддхаммам̣ авиджа̄натам̣.

61. чаран̃че на̄дхигаччхеййа, сеййам̣ садисаматтано;

екачарийам̣ [екачарийам̣ (ка.)] дал̣хам̣ кайира̄, наттхи ба̄ле саха̄йата̄.

62. путта̄ маттхи дханамматтхи [путтаматтхи дханаматтхи (ка.)], ити ба̄ло вихан̃н̃ати;

атта̄ хи [атта̄пи (?)] аттано наттхи, куто путта̄ куто дханам̣.

63. йо ба̄ло ман̃н̃ати ба̄лйам̣, пан̣д̣ито ва̄пи тена со;

ба̄ло ча пан̣д̣итама̄нӣ, са ве ‘‘ба̄ло’’ти вуччати.

64. йа̄ваджӣвампи че ба̄ло, пан̣д̣итам̣ пайирупа̄сати;

на со дхаммам̣ виджа̄на̄ти, даббӣ сӯпарасам̣ йатха̄.

65. мухуттамапи че вин̃н̃ӯ, пан̣д̣итам̣ пайирупа̄сати;

кхиппам̣ дхаммам̣ виджа̄на̄ти, дживха̄ сӯпарасам̣ йатха̄.

66. чаранти ба̄ла̄ думмедха̄, амиттенева аттана̄;

каронта̄ па̄пакам̣ каммам̣, йам̣ хоти кат̣укаппхалам̣.

67. на там̣ каммам̣ катам̣ са̄дху, йам̣ катва̄ анутаппати;

йасса ассумукхо родам̣, випа̄кам̣ пат̣исевати.

68. тан̃ча каммам̣ катам̣ са̄дху, йам̣ катва̄ на̄нутаппати;

йасса патӣто сумано, випа̄кам̣ пат̣исевати.

69. мадхува̄ [мадхум̣ ва̄ (дӣ. ни. т̣ӣка̄ 1)] ман̃н̃ати ба̄ло, йа̄ва па̄пам̣ на паччати;

йада̄ ча паччати па̄пам̣, ба̄ло [атха ба̄ло (сӣ. сйа̄.) атха (?)] дуккхам̣ нигаччхати.

70. ма̄се ма̄се кусаггена, ба̄ло бхун̃джеййа бходжанам̣;

на со сан̇кха̄тадхамма̄нам̣ [сан̇кхатадхамма̄нам̣ (сӣ. пӣ. ка.)], калам̣ аггхати сол̣асим̣.

71. на хи па̄пам̣ катам̣ каммам̣, саджджу кхӣрам̣ва муччати;

д̣ахантам̣ ба̄ламанвети, бхасмаччханнова [бхасма̄чханнова (сӣ. пӣ. ка.)] па̄вако.

72. йа̄вадева анаттха̄йа, н̃аттам̣ [н̃а̄там̣ (?)] ба̄ласса джа̄йати;

ханти ба̄ласса суккам̣сам̣, муддхамасса випа̄тайам̣.

73. асантам̣ бха̄ванамиччхеййа [асантам̣ бха̄вамиччхеййа (сйа̄.), асантабха̄ванамиччхеййа (ка.)], пуреккха̄ран̃ча бхиккхусу;

а̄ва̄сесу ча иссарийам̣, пӯджа̄ паракулесу ча.

74. мамева ката ман̃н̃анту, гихӣпаббаджита̄ убхо;

мамева̄тиваса̄ ассу, кичча̄киччесу кисмичи;

ити ба̄ласса сан̇каппо, иччха̄ ма̄но ча вад̣д̣хати.

75. ан̃н̃а̄ хи ла̄бхӯпаниса̄, ан̃н̃а̄ нибба̄нага̄минӣ;

еваметам̣ абхин̃н̃а̄йа, бхиккху буддхасса са̄вако;

сакка̄рам̣ на̄бхинандеййа, вивекаманубрӯхайе.

ба̄лавагго пан̃чамо нит̣т̣хито.