6. пан̣д̣итавагго

76. нидхӣнам̣ва паватта̄рам̣, йам̣ пассе ваджджадассинам̣;

ниггайхава̄дим̣ медха̄вим̣, та̄дисам̣ пан̣д̣итам̣ бхадже;

та̄дисам̣ бхаджама̄насса, сеййо хоти на па̄пийо.

77. овадеййа̄нуса̄сеййа, асаббха̄ ча нива̄райе;

сатан̃хи со пийо хоти, асатам̣ хоти аппийо.

78. на бхадже па̄паке митте, на бхадже пуриса̄дхаме;

бхаджетха митте калйа̄н̣е, бхаджетха пурисуттаме.

79. дхаммапӣти сукхам̣ сети, виппасаннена четаса̄;

арийаппаведите дхамме, сада̄ рамати пан̣д̣ито.

80. удакан̃хи найанти неттика̄, усука̄ра̄ намайанти [дамайанти (ка.)] теджанам̣;

да̄рум̣ намайанти таччхака̄, атта̄нам̣ дамайанти пан̣д̣ита̄.

81. село йатха̄ екагхано [екаггхано (ка.)], ва̄тена на самӣрати;

евам̣ нинда̄пасам̣са̄су, на самин̃джанти пан̣д̣ита̄.

82. йатха̄пи рахадо гамбхӣро, виппасанно ана̄вило;

евам̣ дхамма̄ни сутва̄на, виппасӣданти пан̣д̣ита̄.

83. саббаттха ве саппуриса̄ чаджанти, на ка̄мака̄ма̄ лапайанти санто;

сукхена пхут̣т̣ха̄ атха ва̄ дукхена, на учча̄вачам̣ [ночча̄вачам̣ (сӣ. ат̣т̣ха.)] пан̣д̣ита̄ дассайанти.

84. на аттахету на парасса хету, на путтамиччхе на дханам̣ на рат̣т̣хам̣;

на иччхеййа [найиччхе (пӣ.), ниччхе (?)] адхаммена самиддхиматтано, са сӣлава̄ пан̃н̃ава̄ дхаммико сийа̄.

85. аппака̄ те мануссесу, йе джана̄ па̄рага̄мино;

атха̄йам̣ итара̄ паджа̄, тӣрамева̄нудха̄вати.

86. йе ча кхо саммадаккха̄те, дхамме дхамма̄нуваттино;

те джана̄ па̄рамессанти, маччудхеййам̣ судуттарам̣.

87. кан̣хам̣ дхаммам̣ виппаха̄йа, суккам̣ бха̄ветха пан̣д̣ито;

ока̄ анокама̄гамма, вивеке йаттха дӯрамам̣.

88. татра̄бхиратимиччхеййа, хитва̄ ка̄ме акин̃чано;

парийодапеййа [парийода̄пеййа (?)] атта̄нам̣, читтаклесехи пан̣д̣ито.

89. йесам̣ самбодхийан̇гесу, самма̄ читтам̣ субха̄витам̣;

а̄да̄напат̣иниссагге, анупа̄да̄йа йе рата̄;

кхӣн̣а̄сава̄ джутиманто, те локе париниббута̄.

пан̣д̣итавагго чхат̣т̣хо нит̣т̣хито.