4. пуппхавагго

44. ко имам̣ [комам̣ (ка.)] патхавим̣ вичессати [виджессати (сӣ. сйа̄. пӣ.)], йамалокан̃ча имам̣ садевакам̣;

ко дхаммападам̣ судеситам̣, кусало пуппхамива пачессати [пуппхамиваппачессати (ка.)].

45. секхо патхавим̣ вичессати, йамалокан̃ча имам̣ садевакам̣;

секхо дхаммападам̣ судеситам̣, кусало пуппхамива пачессати.

46. пхен̣ӯпамам̣ ка̄йамимам̣ видитва̄, марӣчидхаммам̣ абхисамбудха̄но;

чхетва̄на ма̄расса папуппхака̄ни [сапуппхака̄ни (т̣ӣка̄)], адассанам̣ маччура̄джасса гаччхе.

47. пуппха̄ни хева пачинантам̣, бйа̄саттаманасам̣ [бйа̄саттама̄насам̣ (ка.)] нарам̣;

суттам̣ га̄мам̣ махогхова, маччу а̄да̄йа гаччхати.

48. пуппха̄ни хева пачинантам̣, бйа̄саттаманасам̣ нарам̣;

атиттан̃н̃ева ка̄месу, антако куруте васам̣.

49. йатха̄пи бхамаро пуппхам̣, ван̣н̣агандхамахет̣хайам̣ [ван̣н̣агандхамапот̣хайам̣ (ка.)];

палети расама̄да̄йа, евам̣ га̄ме мунӣ чаре.

50. на паресам̣ вилома̄ни, на паресам̣ ката̄катам̣;

аттанова авеккхеййа, ката̄ни аката̄ни ча.

51. йатха̄пи ручирам̣ пуппхам̣, ван̣н̣авантам̣ агандхакам̣;

евам̣ субха̄сита̄ ва̄ча̄, апхала̄ хоти акуббато.

52. йатха̄пи ручирам̣ пуппхам̣, ван̣н̣авантам̣ сугандхакам̣ [сагандхакам̣ (сӣ. сйа̄. кам̣. пӣ.)];

евам̣ субха̄сита̄ ва̄ча̄, сапхала̄ хоти куббато [сакуббато (сӣ. пӣ.), пакуббато (сӣ. ат̣т̣ха.), сукуббато (сйа̄. кам̣.)].

53. йатха̄пи пуппхара̄симха̄, кайира̄ ма̄ла̄гун̣е бахӯ;

евам̣ джа̄тена маччена, каттаббам̣ кусалам̣ бахум̣.

54. на пуппхагандхо пат̣ива̄тамети, на чанданам̣ тагарамаллика̄ [тагарамаллика̄ (сӣ. сйа̄. кам̣. пӣ.)];

сатан̃ча гандхо пат̣ива̄тамети, сабба̄ диса̄ саппурисо пава̄йати.

55. чанданам̣ тагарам̣ ва̄пи, уппалам̣ атха вассикӣ;

етесам̣ гандхаджа̄та̄нам̣, сӣлагандхо ануттаро.

56. аппаматто айам̣ гандхо, йва̄йам̣ тагарачанданам̣ [йа̄йам̣ тагарачанданӣ (сӣ. сйа̄. кам̣. пӣ.)];

йо ча сӣлаватам̣ гандхо, ва̄ти девесу уттамо.

57. тесам̣ сампаннасӣла̄нам̣, аппама̄давиха̄ринам̣;

саммадан̃н̃а̄ вимутта̄нам̣, ма̄ро маггам̣ на виндати.

58. йатха̄ сан̇ка̄рат̣ха̄насмим̣ [сан̇ка̄радха̄насмим̣ (сӣ. сйа̄. кам̣. пӣ.)], уджджхитасмим̣ маха̄патхе;

падумам̣ таттха джа̄йетха, сучигандхам̣ манорамам̣.

59. евам̣ сан̇ка̄рабхӯтесу, андхабхӯте [андхӣбхӯте (ка.)] путхуджджане;

атирочати пан̃н̃а̄йа, самма̄самбуддхаса̄вако.

пуппхавагго чатуттхо нит̣т̣хито.