3. читтавагго

33. пханданам̣ чапалам̣ читтам̣, дӯраккхам̣ [дураккхам̣ (саббаттха)] дуннива̄райам̣;

уджум̣ кароти медха̄вӣ, усука̄рова теджанам̣.

34. ва̄риджова тхале кхитто, окамокатауббхато;

парипхандатидам̣ читтам̣, ма̄радхеййам̣ паха̄таве.

35. дунниггахасса лахуно, йаттхака̄манипа̄тино;

читтасса даматхо са̄дху, читтам̣ дантам̣ сукха̄вахам̣.

36. судуддасам̣ сунипун̣ам̣, йаттхака̄манипа̄тинам̣;

читтам̣ раккхетха медха̄вӣ, читтам̣ гуттам̣ сукха̄вахам̣.

37. дӯран̇гамам̣ екачарам̣ [екача̄рам̣ (ка.)], асарӣрам̣ гуха̄сайам̣;

йе читтам̣ сам̣йамессанти, моккханти ма̄рабандхана̄.

38. анават̣т̣хитачиттасса, саддхаммам̣ авиджа̄нато;

париплавапаса̄дасса, пан̃н̃а̄ на парипӯрати.

39. анавассутачиттасса, ананва̄хатачетасо;

пун̃н̃апа̄папахӣнасса, наттхи джа̄гарато бхайам̣.

40. кумбхӯпамам̣ ка̄йамимам̣ видитва̄, нагарӯпамам̣ читтамидам̣ т̣хапетва̄;

йодхетха ма̄рам̣ пан̃н̃а̄вудхена, джитан̃ча раккхе анивесано сийа̄.

41. ачирам̣ ватайам̣ ка̄йо, патхавим̣ адхисессати;

чхуддхо апетавин̃н̃а̄н̣о, нираттхам̣ва калин̇гарам̣.

42. дисо дисам̣ йам̣ там̣ кайира̄, верӣ ва̄ пана веринам̣;

миччха̄пан̣ихитам̣ читтам̣, па̄пийо [па̄пийам̣ (?)] нам̣ тато каре.

43. на там̣ ма̄та̄ пита̄ кайира̄, ан̃н̃е ва̄пи ча н̃а̄така̄;

самма̄пан̣ихитам̣ читтам̣, сеййасо нам̣ тато каре.

читтавагго татийо нит̣т̣хито.