26. бра̄хман̣авагго

383. чхинда сотам̣ параккамма, ка̄ме пануда бра̄хман̣а;

сан̇кха̄ра̄нам̣ кхайам̣ н̃атва̄, акатан̃н̃ӯси бра̄хман̣а.

384. йада̄ двайесу дхаммесу, па̄рагӯ хоти бра̄хман̣о;

атхасса саббе сам̣йога̄, аттхам̣ гаччханти джа̄нато.

385. йасса па̄рам̣ апа̄рам̣ ва̄, па̄ра̄па̄рам̣ на виджджати;

вӣтаддарам̣ висам̣йуттам̣, тамахам̣ брӯми бра̄хман̣ам̣.

386. джха̄йим̣ вираджама̄сӣнам̣, катакиччамана̄савам̣;

уттаматтхамануппаттам̣, тамахам̣ брӯми бра̄хман̣ам̣.

387. дива̄ тапати а̄диччо, раттима̄бха̄ти чандима̄;

саннаддхо кхаттийо тапати, джха̄йӣ тапати бра̄хман̣о;

атха саббамахораттим̣ [саббамахораттам̣ (?)], буддхо тапати теджаса̄.

388. ба̄хитапа̄поти бра̄хман̣о, самачарийа̄ саман̣оти вуччати;

пабба̄джайаматтано малам̣, тасма̄ ‘‘паббаджито’’ти вуччати.

389. на бра̄хман̣асса пахареййа, на̄сса мун̃четха бра̄хман̣о;

дхӣ [дхи (сйа̄. бйа̄каран̣есу)] бра̄хман̣асса ханта̄рам̣, тато дхӣ йасса [йо + асса = йасса] мун̃чати.

390. на бра̄хман̣ассетадакин̃чи сеййо, йада̄ ниседхо манасо пийехи;

йато йато хим̣самано ниваттати, тато тато самматимева дуккхам̣.

391. йасса ка̄йена ва̄ча̄йа, манаса̄ наттхи дуккат̣ам̣;

сам̣вутам̣ тӣхи т̣ха̄нехи, тамахам̣ брӯми бра̄хман̣ам̣.

392. йамха̄ дхаммам̣ виджа̄неййа, самма̄самбуддхадеситам̣;

саккаччам̣ там̣ намассеййа, аггихуттам̣ва бра̄хман̣о.

393. на джат̣а̄хи на готтена, на джачча̄ хоти бра̄хман̣о;

йамхи саччан̃ча дхаммо ча, со сучӣ со ча бра̄хман̣о.

394. ким̣ те джат̣а̄хи думмедха, ким̣ те аджинаса̄т̣ийа̄;

аббхантарам̣ те гаханам̣, ба̄хирам̣ паримаджджаси.

395. пам̣сукӯладхарам̣ джантум̣, кисам̣ дхаманисантхатам̣;

екам̣ ванасмим̣ джха̄йантам̣, тамахам̣ брӯми бра̄хман̣ам̣.

396. на ча̄хам̣ бра̄хман̣ам̣ брӯми, йониджам̣ маттисамбхавам̣;

бхова̄ди на̄ма со хоти, саче хоти сакин̃чано;

акин̃чанам̣ ана̄да̄нам̣, тамахам̣ брӯми бра̄хман̣ам̣.

397. саббасам̣йоджанам̣ чхетва̄, йо ве на паритассати;

сан̇га̄тигам̣ висам̣йуттам̣, тамахам̣ брӯми бра̄хман̣ам̣.

398. чхетва̄ наддхим̣ [нандхим̣ (ка. сӣ.), нандим̣ (пӣ.)] вараттан̃ча, санда̄нам̣ [санда̄мам̣ (сӣ.)] сахануккамам̣;

уккхиттапалигхам̣ буддхам̣, тамахам̣ брӯми бра̄хман̣ам̣.

399. аккосам̣ вадхабандхан̃ча, адут̣т̣хо йо титиккхати;

кхантӣбалам̣ бала̄нӣкам̣, тамахам̣ брӯми бра̄хман̣ам̣.

400. аккодханам̣ ватавантам̣, сӣлавантам̣ ануссадам̣;

дантам̣ антимаса̄рӣрам̣, тамахам̣ брӯми бра̄хман̣ам̣.

401. ва̄ри поккхарапаттева, а̄раггерива са̄сапо;

йо на лимпати [липпати (сӣ. пӣ.)] ка̄месу, тамахам̣ брӯми бра̄хман̣ам̣.

402. йо дуккхасса паджа̄на̄ти, идхева кхайаматтано;

паннабха̄рам̣ висам̣йуттам̣, тамахам̣ брӯми бра̄хман̣ам̣.

403. гамбхӣрапан̃н̃ам̣ медха̄вим̣, магга̄маггасса ковидам̣;

уттаматтхамануппаттам̣, тамахам̣ брӯми бра̄хман̣ам̣.

404. асам̣сат̣т̣хам̣ гахат̣т̣хехи, ана̄га̄рехи чӯбхайам̣;

анокаса̄римаппиччхам̣, тамахам̣ брӯми бра̄хман̣ам̣.

405. нидха̄йа дан̣д̣ам̣ бхӯтесу, тасесу тха̄варесу ча;

йо на ханти на гха̄тети, тамахам̣ брӯми бра̄хман̣ам̣.

406. авируддхам̣ вируддхесу, аттадан̣д̣есу ниббутам̣;

са̄да̄несу ана̄да̄нам̣, тамахам̣ брӯми бра̄хман̣ам̣.

407. йасса ра̄го ча досо ча, ма̄но маккхо ча па̄тито;

са̄сапорива а̄рагга̄ [а̄рагге (ка.)], тамахам̣ брӯми бра̄хман̣ам̣.

408. акаккасам̣ вин̃н̃а̄паним̣, гирам̣ саччамудӣрайе;

йа̄йа на̄бхисадже кан̃чи [кин̃чи (ка.)], тамахам̣ брӯми бра̄хман̣ам̣.

409. йодха дӣгхам̣ ва рассам̣ ва̄, ан̣ум̣ тхӯлам̣ субха̄субхам̣;

локе адиннам̣ на̄дийати [на̄дети (ма. ни. 2.459)], тамахам̣ брӯми бра̄хман̣ам̣.

410. а̄са̄ йасса на виджджанти, асмим̣ локе парамхи ча;

нира̄са̄сам̣ [нира̄сайам̣ (сӣ. сйа̄. пӣ.), нира̄сакам̣ (?)] висам̣йуттам̣, тамахам̣ брӯми бра̄хман̣ам̣.

411. йасса̄лайа̄ на виджджанти, ан̃н̃а̄йа акатхам̣катхӣ;

аматогадхамануппаттам̣, тамахам̣ брӯми бра̄хман̣ам̣.

412. йодха пун̃н̃ан̃ча па̄пан̃ча, убхо сан̇гамупаччага̄;

асокам̣ вираджам̣ суддхам̣, тамахам̣ брӯми бра̄хман̣ам̣.

413. чандам̣ва вималам̣ суддхам̣, виппасаннамана̄вилам̣;

нандӣбхавапариккхӣн̣ам̣, тамахам̣ брӯми бра̄хман̣ам̣.

414. йомам̣ [йо имам̣ (сӣ. сйа̄. кам̣. пӣ.)] палипатхам̣ дуггам̣, сам̣са̄рам̣ мохамаччага̄;

тин̣н̣о па̄рагато [па̄рагато (сӣ. сйа̄. кам̣. пӣ.)] джха̄йӣ, анеджо акатхам̣катхӣ;

анупа̄да̄йа ниббуто, тамахам̣ брӯми бра̄хман̣ам̣.

415. йодха ка̄ме пахантва̄на [пахатва̄на (сӣ. пӣ.)], ана̄га̄ро париббадже;

ка̄мабхавапариккхӣн̣ам̣, тамахам̣ брӯми бра̄хман̣ам̣ [идам̣ га̄тха̄двайам̣ видесапоттхакесу сакидева дасситам̣].

416. йодха тан̣хам̣ пахантва̄на, ана̄га̄ро париббадже;

тан̣ха̄бхавапариккхӣн̣ам̣, тамахам̣ брӯми бра̄хман̣ам̣.

417. хитва̄ ма̄нусакам̣ йогам̣, диббам̣ йогам̣ упаччага̄;

саббайогависам̣йуттам̣, тамахам̣ брӯми бра̄хман̣ам̣.

418. хитва̄ ратин̃ча аратин̃ча, сӣтибхӯтам̣ нирӯпадхим̣;

саббалока̄бхибхум̣ вӣрам̣, тамахам̣ брӯми бра̄хман̣ам̣.

419. чутим̣ йо веди сатта̄нам̣, упапаттин̃ча саббасо;

асаттам̣ сугатам̣ буддхам̣, тамахам̣ брӯми бра̄хман̣ам̣.

420. йасса гатим̣ на джа̄нанти, дева̄ гандхаббама̄нуса̄;

кхӣн̣а̄савам̣ арахантам̣, тамахам̣ брӯми бра̄хман̣ам̣.

421. йасса пуре ча паччха̄ ча, маджджхе ча наттхи кин̃чанам̣;

акин̃чанам̣ ана̄да̄нам̣, тамахам̣ брӯми бра̄хман̣ам̣.

422. усабхам̣ паварам̣ вӣрам̣, махесим̣ виджита̄винам̣;

анеджам̣ нха̄такам̣ [наха̄такам̣ (сӣ. сйа̄. кам̣ пӣ.)] буддхам̣, тамахам̣ брӯми бра̄хман̣ам̣.

423. пуббенива̄сам̣ йо веди, сагга̄па̄йан̃ча пассати,

атхо джа̄тиккхайам̣ патто, абхин̃н̃а̄восито муни;

саббавоситавоса̄нам̣, тамахам̣ брӯми бра̄хман̣ам̣.

бра̄хман̣авагго чхаббӣсатимо нит̣т̣хито.