12. аттавагго

157. атта̄нан̃че пийам̣ джан̃н̃а̄, раккхеййа нам̣ сураккхитам̣;

тин̣н̣ам̣ ан̃н̃атарам̣ йа̄мам̣, пат̣иджаггеййа пан̣д̣ито.

158. атта̄намева пат̣хамам̣, патирӯпе нивесайе;

атхан̃н̃амануса̄сеййа, на килиссеййа пан̣д̣ито.

159. атта̄нам̣ че татха̄ кайира̄, йатха̄н̃н̃амануса̄сати;

суданто вата даметха, атта̄ хи кира дуддамо.

160. атта̄ хи аттано на̄тхо, ко хи на̄тхо паро сийа̄;

аттана̄ хи судантена, на̄тхам̣ лабхати дуллабхам̣.

161. аттана̄ хи катам̣ па̄пам̣, аттаджам̣ аттасамбхавам̣;

абхиматтхати [абхимантати (сӣ. пӣ.)] думмедхам̣, ваджирам̣ васмамайам̣ [ваджирам̣ва’мхамайам̣ (сйа̄. ка.)] ман̣им̣.

162. йасса аччантадуссӣлйам̣, ма̄лува̄ са̄ламивоттхатам̣;

кароти со татхатта̄нам̣, йатха̄ нам̣ иччхатӣ дисо.

163. сукара̄ни аса̄дхӯни, аттано ахита̄ни ча;

йам̣ ве хитан̃ча са̄дхун̃ча, там̣ ве парамадуккарам̣.

164. йо са̄санам̣ арахатам̣, арийа̄нам̣ дхаммаджӣвинам̣;

пат̣иккосати думмедхо, дит̣т̣хим̣ нисса̄йа па̄пикам̣;

пхала̄ни кат̣т̣хакассева, аттагха̄та̄йа [аттагхан̃н̃а̄йа (сӣ. сйа̄. пӣ.)] пхаллати.

165. аттана̄ хи [аттана̄ва (сӣ. сйа̄. пӣ.)] катам̣ па̄пам̣, аттана̄ сам̣килиссати;

аттана̄ акатам̣ па̄пам̣, аттана̄ва висуджджхати;

суддхӣ асуддхи паччаттам̣, на̄н̃н̃о ан̃н̃ам̣ [на̄н̃н̃аман̃н̃о(сӣ.)] висодхайе.

166. аттадаттхам̣ параттхена, бахуна̄пи на ха̄пайе;

аттадаттхамабхин̃н̃а̄йа, садаттхапасуто сийа̄.

аттавагго два̄дасамо нит̣т̣хито.