13. локавагго

167. хӣнам̣ дхаммам̣ на севеййа, пама̄дена на сам̣васе;

миччха̄дит̣т̣хим̣ на севеййа, на сийа̄ локавад̣д̣хано.

168. уттит̣т̣хе наппамаджджеййа, дхаммам̣ сучаритам̣ чаре;

дхаммача̄рӣ сукхам̣ сети, асмим̣ локе парамхи ча.

169. дхаммам̣ чаре сучаритам̣, на нам̣ дуччаритам̣ чаре;

дхаммача̄рӣ сукхам̣ сети, асмим̣ локе парамхи ча.

170. йатха̄ пуббул̣акам̣ [пуббул̣акам̣ (сӣ. пӣ.)] пассе, йатха̄ пассе марӣчикам̣;

евам̣ локам̣ авеккхантам̣, маччура̄джа̄ на пассати.

171. етха пассатхимам̣ локам̣, читтам̣ ра̄джаратхӯпамам̣;

йаттха ба̄ла̄ висӣданти, наттхи сан̇го виджа̄натам̣.

172. йо ча пуббе памаджджитва̄, паччха̄ со наппамаджджати;

сомам̣ локам̣ пабха̄сети, аббха̄ муттова чандима̄.

173. йасса па̄пам̣ катам̣ каммам̣, кусалена пидхӣйати [питӣйати (сӣ. сйа̄. пӣ.)];

сомам̣ локам̣ пабха̄сети, аббха̄ муттова чандима̄.

174. андхабхӯто [андхӣбхӯто (ка.)] айам̣ локо, танукеттха випассати;

сакун̣о джа̄ламуттова, аппо сагга̄йа гаччхати.

175. хам̣са̄диччапатхе йанти, а̄ка̄се йанти иддхийа̄;

нӣйанти дхӣра̄ локамха̄, джетва̄ ма̄рам̣ сава̄хиним̣ [сава̄ханам̣ (сйа̄. ка.)].

176. екам̣ дхаммам̣ атӣтасса, муса̄ва̄дисса джантуно;

витин̣н̣апаралокасса, наттхи па̄пам̣ ака̄рийам̣.

177. на ве кадарийа̄ девалокам̣ ваджанти, ба̄ла̄ хаве наппасам̣санти да̄нам̣;

дхӣро ча да̄нам̣ анумодама̄но, тенева со хоти сукхӣ параттха.

178. патхабйа̄ екараджджена, саггасса гаманена ва̄;

саббалока̄дхипаччена, сота̄паттипхалам̣ варам̣.

локавагго терасамо нит̣т̣хито.