9. тимиравагго

1. тимирапуппхийаттхераапада̄нам̣

1. ‘‘чандабха̄га̄надӣтӣре, анусотам̣ ваджа̄махам̣;

нисиннам̣ саман̣ам̣ дисва̄, виппасаннамана̄вилам̣.

2. ‘‘таттха читтам̣ паса̄детва̄ [паса̄десим̣ (сйа̄.)], евам̣ чинтесахам̣ тада̄;

та̄райиссати тин̣н̣ойам̣, дантойам̣ дамайиссати.

3. ‘‘асса̄сиссати ассаттхо, санто ча самайиссати;

мочайиссати мутто ча, нибба̄пессати ниббуто.

4. ‘‘ева̄хам̣ чинтайитва̄на, сиддхаттхасса махесино;

гахетва̄ тимирапуппхам̣, маттхаке окирим̣ ахам̣ [тада̄ (сйа̄.)].

5. ‘‘ан̃джалим̣ паггахетва̄на, катва̄ ча нам̣ падаккхин̣ам̣;

вандитва̄ саттхуно па̄де, пакка̄мим̣ апарам̣ дисам̣.

6. ‘‘ачирам̣ гатаматтам̣ мам̣, мигара̄джа̄ вихет̣хайи;

папа̄таманугаччханто, таттхева папатим̣ ахам̣.

7. ‘‘чатуннавутито каппе, йам̣ пуппхамабхиропайим̣;

дуггатим̣ на̄бхиджа̄на̄ми, пуппхапӯджа̄йидам̣ [буддхапӯджа̄йидам̣ (сӣ. сйа̄.)] пхалам̣.

8. ‘‘чхаппан̃н̃а̄самхи каппамхи, саттева̄сум̣ маха̄йаса̄ [маха̄раха̄ (сйа̄. ка.)];

саттаратанасампанна̄, чаккаваттӣ махаббала̄.

9. ‘‘пат̣исамбхида̄ чатассо, вимоккха̄пи ча ат̣т̣химе;

чхал̣абхин̃н̃а̄ саччхиката̄, катам̣ буддхасса са̄санам̣’’.

иттхам̣ судам̣ а̄йасма̄ тимирапуппхийо тхеро има̄ га̄тха̄йо абха̄ситтха̄ти.

тимирапуппхийаттхерасса̄пада̄нам̣ пат̣хамам̣.

2. гатасан̃н̃акаттхераапада̄нам̣

10. ‘‘джа̄тийа̄ саттавассохам̣, паббаджим̣ анага̄рийам̣;

авандим̣ саттхуно па̄де, виппасаннена четаса̄.

11. ‘‘саттанан̇галакӣпуппхе, а̄ка̄се уккхипим̣ ахам̣;

тиссам̣ буддхам̣ самуддисса, анантагун̣аса̄гарам̣.

12. ‘‘сугата̄нугатам̣ маггам̣, пӯджетва̄ хат̣т̣хама̄насо;

ан̃джалин̃ча [ан̃джалисса (ка.)] тада̄ка̄сим̣, пасанно сехи па̄н̣ибхи.

13. ‘‘двенавуте ито каппе, йам̣ каммамакарим̣ тада̄;

дуггатим̣ на̄бхиджа̄на̄ми, буддхапӯджа̄йидам̣ пхалам̣.

14. ‘‘ито ат̣т̣хамаке каппе, тайо аггисикха̄ аху;

саттаратанасампанна̄, чаккаваттӣ махаббала̄.

15. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ гатасан̃н̃ако тхеро има̄ га̄тха̄йо абха̄ситтха̄ти.

гатасан̃н̃акаттхерасса̄пада̄нам̣ дутийам̣.

3. нипаннан̃джаликаттхераапада̄нам̣

16. ‘‘руккхамӯле нисиннохам̣, бйа̄дхито парамена ча;

парамака̄рун̃н̃апаттомхи, аран̃н̃е ка̄нане ахам̣.

17. ‘‘анукампам̣ упа̄да̄йа, тиссо саттха̄ упеси мам̣;

сохам̣ нипаннако санто, сире катва̄на ан̃джалим̣.

18. ‘‘пасанначитто сумано, саббасатта̄намуттамам̣;

самбуддхам̣ абхива̄детва̄, таттха ка̄лан̇като ахам̣.

19. ‘‘двенавуте ито каппе, йам̣ вандим̣ пурисуттамам̣;

дуггатим̣ на̄бхиджа̄на̄ми, вандана̄йа идам̣ пхалам̣.

20. ‘‘ито пан̃чамаке каппе, пан̃чева̄сум̣ маха̄сикха̄;

саттаратанасампанна̄, чаккаваттӣ махаббала̄.

21. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ нипаннан̃джалико тхеро има̄ га̄тха̄йо абха̄ситтха̄ти.

нипаннан̃джаликаттхерасса̄пада̄нам̣ татийам̣.

4. адхопуппхийаттхераапада̄нам̣

22. ‘‘абхибхӯ на̄ма со бхиккху, сикхино аггаса̄вако;

маха̄нубха̄во тевиджджо, химавантам̣ упа̄гами.

23. ‘‘ахампи химавантамхи, раман̣ӣйассаме иси;

васа̄ми аппаман̃н̃а̄су, иддхӣсу ча тада̄ васӣ.

24. ‘‘паккхиджа̄то вийа̄ка̄се, паббатам̣ адхиваттайим̣ [абхипаттхайим̣ (сйа̄.), абхиматтхайим̣ (ка.), адхиваттхайинти паббатасса упари гаччхинтиаттхо];

адхопуппхам̣ гахетва̄на, а̄гаччхим̣ [агаччхим̣ (ка.)] паббатам̣ ахам̣.

25. ‘‘сатта пуппха̄ни ган̣хитва̄, маттхаке окирим̣ ахам̣;

а̄локите [а̄локито (сйа̄.)] ча вӣрена, пакка̄мим̣ па̄чина̄мукхо.

26. ‘‘а̄ва̄сам̣ абхисамбхосим̣, патва̄на ассамам̣ ахам̣;

кха̄рибха̄рам̣ гахетва̄на, па̄йа̄сим̣ [па̄висим̣ (сӣ.)] паббатантарам̣.

27. ‘‘аджагаро мам̣ пӣл̣еси, гхорарӯпо махаббало;

пуббакаммам̣ саритва̄на, таттха ка̄лан̇като ахам̣.

28. ‘‘екаттим̣се ито каппе, йам̣ пуппхамабхиропайим̣;

дуггатим̣ на̄бхиджа̄на̄ми, пуппхапӯджа̄йидам̣ пхалам̣.

29. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ адхопуппхийо тхеро има̄ га̄тха̄йо абха̄ситтха̄ти.

адхопуппхийаттхерасса̄пада̄нам̣ чатуттхам̣.

5. рам̣сисан̃н̃акаттхераапада̄нам̣

30. ‘‘паббате химавантамхи, ва̄сам̣ каппесахам̣ пуре;

аджинуттарава̄сохам̣, васа̄ми паббатантаре.

31. ‘‘суван̣н̣аван̣н̣ам̣ самбуддхам̣, сатарам̣сим̣ва бха̄н̣умам̣;

ванантарагатам̣ дисва̄, са̄лара̄джам̣ва пуппхитам̣.

32. ‘‘рам̣сйа̄ [рам̣се (сйа̄. ка.)] читтам̣ паса̄детва̄, випассисса махесино;

паггайха ан̃джалим̣ вандим̣, сираса̄ уккут̣ӣ [сираса̄ уккут̣ико (сйа̄.), сирасуккут̣ико (ка.)] ахам̣.

33. ‘‘еканавутито каппе, йам̣ каммамакарим̣ тада̄;

дуггатим̣ на̄бхиджа̄на̄ми, рам̣сисан̃н̃а̄йидам̣ пхалам̣.

34. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ рам̣сисан̃н̃ако тхеро има̄ га̄тха̄йо абха̄ситтха̄ти.

рам̣сисан̃н̃акаттхерасса̄пада̄нам̣ пан̃чамам̣.

6. дутийарам̣сисан̃н̃акаттхераапада̄нам̣

35. ‘‘паббате химавантамхи, ва̄качӣрадхаро ахам̣;

чан̇каман̃ча сама̄рӯл̣хо, нисӣдим̣ па̄чина̄мукхо.

36. ‘‘паббате сугатам̣ дисва̄, пхуссам̣ джха̄наратам̣ тада̄;

ан̃джалим̣ паггахетва̄на, рам̣сйа̄ читтам̣ паса̄дайим̣.

37. ‘‘двенавуте ито каппе, йам̣ сан̃н̃амалабхим̣ тада̄;

дуггатим̣ на̄бхиджа̄на̄ми, рам̣сисан̃н̃а̄йидам̣ пхалам̣.

38. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ рам̣сисан̃н̃ако тхеро има̄ га̄тха̄йо абха̄ситтха̄ти.

дутийарам̣сисан̃н̃акаттхерасса̄пада̄нам̣ чхат̣т̣хам̣.

7. пхалада̄йакаттхераапада̄нам̣

39. ‘‘паббате химавантамхи, кхара̄джинадхаро ахам̣;

пхуссам̣ джинаварам̣ дисва̄, пхалахаттхо пхалам̣ адам̣.

40. ‘‘йамахам̣ пхаламада̄сим̣, виппасаннена четаса̄;

бхаве ниббаттама̄намхи, пхалам̣ ниббаттате мама.

41. ‘‘двенавуте ито каппе, йам̣ пхалам̣ ададим̣ ахам̣;

дуггатим̣ на̄бхиджа̄на̄ми, пхалада̄нассидам̣ пхалам̣.

42. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ пхалада̄йако тхеро има̄ га̄тха̄йо абха̄ситтха̄ти.

пхалада̄йакаттхерасса̄пада̄нам̣ саттамам̣.

8. саддасан̃н̃акаттхераапада̄нам̣

43. ‘‘паббате химавантамхи, васа̄ми пан̣н̣асантхаре;

пхуссасса дхаммам̣ бхан̣ато, садде читтам̣ паса̄дайим̣.

44. ‘‘двенавуте ито каппе, йам̣ каммамакарим̣ тада̄;

дуггатим̣ на̄бхиджа̄на̄ми, пун̃н̃акаммассидам̣ пхалам̣.

45. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ саддасан̃н̃ако тхеро има̄ га̄тха̄йо абха̄ситтха̄ти.

саддасан̃н̃акаттхерасса̄пада̄нам̣ ат̣т̣хамам̣.

9. бодхисин̃чакаттхераапада̄нам̣

46. ‘‘випассисса бхагавато, маха̄бодхимахо аху;

паббаджджупагато санто, упагаччхим̣ ахам̣ тада̄.

47. ‘‘кусумодакама̄да̄йа, бодхийа̄ окирим̣ ахам̣;

мочайиссати но мутто, нибба̄пессати ниббуто.

48. ‘‘еканавутито каппе, йам̣ бодхимабхисин̃чайим̣;

дуггатим̣ на̄бхиджа̄на̄ми, бодхисин̃ча̄йидам̣ пхалам̣.

49. ‘‘теттим̣се ваттама̄намхи, каппе а̄сум̣ джана̄дхипа̄;

удакасечана̄ на̄ма, ат̣т̣хете чаккаваттино.

50. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ бодхисин̃чако тхеро има̄ га̄тха̄йо абха̄ситтха̄ти.

бодхисин̃чакаттхерасса̄пада̄нам̣ навамам̣.

10. падумапуппхийаттхераапада̄нам̣

51. ‘‘поккхараванам̣ павит̣т̣хо, бхан̃джанто падума̄нихам̣;

таттхаддасам̣ пхуссам̣ буддхам̣ [аддасам̣ пхуссасамбуддхам̣ (сӣ. сйа̄.)], ба̄ттим̣саваралаккхан̣ам̣.

52. ‘‘падумапуппхам̣ гахетва̄на, а̄ка̄се уккхипим̣ ахам̣;

па̄пакаммам̣ саритва̄на, паббаджим̣ анага̄рийам̣.

53. ‘‘паббаджитва̄на ка̄йена, манаса̄ сам̣вутена ча;

вачӣдуччаритам̣ хитва̄, а̄джӣвам̣ парисодхайим̣.

54. ‘‘двенавуте ито каппе, йам̣ пуппхамабхиропайим̣;

дуггатим̣ на̄бхиджа̄на̄ми, буддхапӯджа̄йидам̣ пхалам̣.

55. ‘‘падума̄бха̄сана̄ма̄ ча, ат̣т̣ха̄раса махӣпатӣ;

ат̣т̣ха̄расесу каппесу, ат̣т̣хата̄лӣсама̄сисум̣.

56. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ падумапуппхийо тхеро има̄ га̄тха̄йо абха̄ситтха̄ти;

падумапуппхийаттхерасса̄пада̄нам̣ дасамам̣.

тимиравагго навамо.