8. дхаджада̄йакаттхераапада̄нам̣

57. ‘‘падумуттарабуддхасса, бодхийа̄ па̄дапуттаме;

хат̣т̣хо хат̣т̣хена читтена, дхаджама̄ропайим̣ ахам̣.

58. ‘‘патитапатта̄ни ган̣хитва̄, бахиддха̄ чхад̣д̣айим̣ ахам̣;

антосуддхам̣ бахисуддхам̣, адхимуттамана̄савам̣.

59. ‘‘саммукха̄ вийа самбуддхам̣, авандим̣ бодхимуттамам̣;

падумуттаро локавидӯ, а̄хутӣнам̣ пат̣иггахо.

60. ‘‘бхиккхусан̇гхе т̣хито саттха̄, има̄ га̄тха̄ абха̄сатха;

‘‘‘имина̄ дхаджада̄нена, упат̣т̣ха̄нена чӯбхайам̣.

61. ‘‘‘каппа̄нам̣ сатасахассам̣, дуггатим̣ со на гаччхати;

девесу девасобхагйам̣, анубхоссатинаппакам̣.

62. ‘‘‘анекасатаккхаттун̃ча, ра̄джа̄ рат̣т̣хе бхависсати;

уггато на̄ма на̄мена, чаккаваттӣ бхависсати.

63. ‘‘‘сампаттим̣ анубхотва̄на, суккамӯлена чодито;

готамасса бхагавато, са̄санебхирамиссати’.

64. ‘‘падха̄напахитаттомхи, упасанто нирӯпадхи;

дха̄реми антимам̣ дехам̣, самма̄самбуддхаса̄сане.

65. ‘‘екапан̃н̃а̄сасахассе, каппе уггатасавхайо [савхайа̄ (сйа̄.)];

пан̃н̃а̄сасатасахассе, кхаттийо мегхасавхайо [кхаттийа̄ кхемасавхайа̄ (сйа̄.)].

66. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ дхаджада̄йако тхеро има̄ га̄тха̄йо абха̄ситтха̄ти.

дхаджада̄йакаттхерасса̄пада̄нам̣ ат̣т̣хамам̣.