4. гандходакийаттхераапада̄нам̣

25. ‘‘падумуттарабуддхасса, маха̄бодхимахо аху;

вичиттам̣ гхат̣ама̄да̄йа, гандходакамада̄сахам̣.

26. ‘‘нха̄нака̄ле ча бодхийа̄, маха̄мегхо павассатха;

нинна̄до ча маха̄ а̄си, асанийа̄ пхалантийа̄.

27. ‘‘тенева̄санивегена, таттха ка̄лан̇като [ка̄лакато (сӣ. сйа̄.)] ахам̣ [ахум̣ (сӣ.)];

девалоке т̣хито санто, има̄ га̄тха̄ абха̄сахам̣.

28. ‘‘‘ахо буддхо ахо дхаммо, ахо но саттхусампада̄;

кал̣еварам̣ [калебарам̣ (сӣ.)] ме патитам̣, девалоке рама̄махам̣.

29. ‘‘‘уббиддхам̣ бхаванам̣ майхам̣, сатабхӯмам̣ самуггатам̣;

кан̃н̃а̄сатасахасса̄ни, парива̄ренти мам̣ сада̄.

30. ‘‘‘а̄ба̄дха̄ ме на виджджанти, соко майхам̣ на виджджати;

парил̣а̄хам̣ на пасса̄ми, пун̃н̃акаммассидам̣ пхалам̣.

31. ‘‘‘ат̣т̣хавӣсе каппасате, ра̄джа̄ сам̣васито ахум̣;

саттаратанасампанно, чаккаваттӣ махаббало’.

32. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ гандходакийо тхеро има̄ га̄тха̄йо абха̄ситтха̄ти.

гандходакийаттхерасса̄пада̄нам̣ чатуттхам̣.