10. асанабодхийаттхераапада̄нам̣

78. ‘‘джа̄тийа̄ саттавассохам̣, аддасам̣ локана̄йакам̣;

пасанначитто сумано, упагаччхим̣ наруттамам̣.

79. ‘‘тиссасса̄хам̣ бхагавато, локаджет̣т̣хасса та̄дино;

хат̣т̣хо хат̣т̣хена читтена, ропайим̣ бодхимуттамам̣.

80. ‘‘асано на̄мадхеййена, дхаран̣ӣрухапа̄дапо;

пан̃чавассе паричарим̣, асанам̣ бодхимуттамам̣.

81. ‘‘пуппхитам̣ па̄дапам̣ дисва̄, аббхутам̣ ломахам̣санам̣;

сакам̣ каммам̣ пакиттенто, буддхасет̣т̣хам̣ упа̄гамим̣.

82. ‘‘тиссо тада̄ со самбуддхо, сайамбхӯ аггапуггало;

бхиккхусан̇гхе нисӣдитва̄, има̄ га̄тха̄ абха̄сатха.

83. ‘‘‘йена̄йам̣ ропита̄ бодхи, буддхапӯджа̄ ча сакката̄;

тамахам̣ киттайисса̄ми, сун̣а̄тха мама бха̄сато.

84. ‘‘‘тим̣сакаппа̄ни девесу, девараджджам̣ кариссати;

чатусат̣т̣хи чаккхаттум̣ со, чаккаваттӣ бхависсати.

85. ‘‘‘тусита̄ хи чавитва̄на, суккамӯлена чодито;

две сампаттӣ анубхотва̄, мануссатте рамиссати.

86. ‘‘‘падха̄напахитатто со, упасанто нирӯпадхи;

сабба̄саве парин̃н̃а̄йа, нибба̄йиссатина̄саво’.

87. ‘‘вивекамануйуттохам̣, упасанто нирӯпадхи;

на̄гова бандханам̣ чхетва̄, вихара̄ми ана̄саво.

88. ‘‘двенавуте ито каппе, бодхим̣ ропесахам̣ тада̄;

дуггатим̣ на̄бхиджа̄на̄ми, бодхиропассидам̣ пхалам̣.

89. ‘‘чатусаттатито каппе, дан̣д̣асеноти виссуто;

саттаратанасампанно, чаккаваттӣ тада̄ ахум̣.

90. ‘‘тесаттатимхито каппе, сатта̄хесум̣ махӣпатӣ;

самантанемина̄мена, ра̄джа̄но чаккаваттино.

91. ‘‘пан̣н̣авӣсатито каппе, пун̣н̣ако на̄ма кхаттийо;

саттаратанасампанно, чаккаваттӣ махаббало.

92. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ асанабодхийо тхеро има̄ га̄тха̄йо абха̄ситтха̄ти.

асанабодхийаттхерасса̄пада̄нам̣ дасамам̣.

бӣджанивагго чхат̣т̣хо.