4. кимилаттхераапада̄нам̣

42. ‘‘ниббуте какусандхамхи, бра̄хман̣амхи вусӣмати;

гахетва̄ салалам̣ ма̄лам̣, ман̣д̣апам̣ ка̄райим̣ ахам̣.

43. ‘‘та̄ватим̣сам̣ гато санто, лабхимха [лабха̄ми (ка.)] бйамхамуттамам̣;

ан̃н̃е деветироча̄ми, пун̃н̃акаммассидам̣ пхалам̣.

44. ‘‘дива̄ ва̄ йади ва̄ раттим̣, чан̇каманто т̣хито чахам̣;

чханно салалапуппхехи, пун̃н̃акаммассидам̣ пхалам̣.

45. ‘‘имасмим̣йева каппамхи, йам̣ буддхамабхипӯджайим̣;

дуггатим̣ на̄бхиджа̄на̄ми, буддхапӯджа̄йидам̣ пхалам̣.

46. ‘‘килеса̄ джха̄пита̄ майхам̣…пе… вихара̄ми ана̄саво.

47. ‘‘сва̄гатам̣ вата ме а̄си…пе… катам̣ буддхасса са̄санам̣.

48. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ кимило [кимбило (сӣ.)] тхеро има̄ га̄тха̄йо

абха̄ситтха̄ти.

кимилаттхерасса̄пада̄нам̣ чатуттхам̣.