9. ванаваччхаттхераапада̄нам̣

251. ‘‘имамхи бхаддаке каппе, брахмабандху маха̄йасо;

кассапо на̄ма готтена, уппаджджи вадатам̣ варо.

252. ‘‘тада̄хам̣ паббаджитва̄на, тасса буддхасса са̄сане;

йа̄ваджӣвам̣ чаритва̄на, брахмача̄рам̣ тато чуто.

253. ‘‘тена каммена сукатена, четана̄пан̣идхӣхи ча;

джахитва̄ ма̄нусам̣ дехам̣, та̄ватим̣самагаччхахам̣.

254. ‘‘тато чуто аран̃н̃амхи, капото а̄сахам̣ тахим̣;

васате гун̣асампанно, бхиккху джха̄нарато сада̄.

255. ‘‘меттачитто ка̄рун̣ико, сада̄ памудита̄нано;

упеккхако маха̄вӣро, аппаман̃н̃а̄су ковидо.

256. ‘‘винӣваран̣асан̇каппе, саббасаттахита̄сайе;

висат̣т̣хо начирена̄сим̣, тасмим̣ сугатаса̄ваке.

257. ‘‘упечча па̄дамӯламхи, нисиннасса тада̄ссаме;

када̄чи са̄мисам̣ дети, дхаммам̣ десеси чекада̄.

258. ‘‘тада̄ випулапемена, упа̄ситва̄ джинатраджам̣;

тато чуто гато саггам̣, пава̄со сагхарам̣ йатха̄.

259. ‘‘сагга̄ чуто мануссесу, ниббатто пун̃н̃акаммуна̄;

ага̄рам̣ чхад̣д̣айитва̄на, паббаджим̣ бахусо ахам̣.

260. ‘‘саман̣о та̄пасо виппо, париббаджо татхевахам̣;

хутва̄ васим̣ аран̃н̃амхи, анекасатасо ахам̣.

261. ‘‘паччхиме ча бхаве да̄ни, рамме капилаваттхаве;

ваччхаготто диджо тасса, джа̄йа̄йа ахамоккамим̣.

262. ‘‘ма̄ту ме дохал̣о а̄си, тирокуччхигатасса ме;

джа̄йама̄насамӣпамхи, ванава̄са̄йа ниччхайо.

263. ‘‘тато ме аджанӣ ма̄та̄, раман̣ӣйе ванантаре;

габбхато никкхамантам̣ мам̣, ка̄са̄йена пат̣иггахум̣.

264. ‘‘тато кума̄ро сиддхаттхо, джа̄то сакйакуладдхаджо;

тасса митто пийо а̄сим̣, сам̣висат̣т̣хо сума̄нийо.

265. ‘‘саттаса̄ребхиниккханте, оха̄йа випулам̣ йасам̣;

ахампи паббаджитва̄на, химавантамупа̄гамим̣.

266. ‘‘вана̄лайам̣ бха̄ванӣйам̣, кассапам̣ дхутава̄дикам̣;

дисва̄ сутва̄ джинуппа̄дам̣, упесим̣ нараса̄ратхим̣.

267. ‘‘со ме дхаммамадесеси, саббаттхам̣ сампака̄сайам̣;

татохам̣ паббаджитва̄на, ванамева пуна̄гамам̣ [пуна̄гамим̣ (сӣ. пӣ.), пуноккамам̣ (сйа̄.)].

268. ‘‘таттха̄ппаматто вихарам̣, чхал̣абхин̃н̃а̄ апхассайим̣ [апассайим̣ (сйа̄. ка.)];

ахо суладдхала̄бхомхи, сумиттена̄нукампито.

269. ‘‘килеса̄ джха̄пита̄ майхам̣…пе… вихара̄ми ана̄саво.

270. ‘‘сва̄гатам̣ вата ме а̄си…пе… катам̣ буддхасса са̄санам̣.

271. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ ванаваччхо тхеро има̄ га̄тха̄йо

абха̄ситтха̄ти.

ванаваччхаттхерасса̄пада̄нам̣ навамам̣.