7. абхайаттхераапада̄нам̣

195. ‘‘падумуттаро на̄ма джино, саббадхаммесу чаккхума̄;

ито сатасахассамхи, каппе уппаджджи на̄йако.

196. ‘‘саран̣агамане кин̃чи, нивесеси татха̄гато;

кин̃чи сӣле нивесеси, дасакаммапатхуттаме.

197. ‘‘дети кассачи со вӣро, са̄ман̃н̃апхаламуттамам̣;

сама̄паттӣ татха̄ ат̣т̣ха, тиссо виджджа̄ паваччхати.

198. ‘‘чхал̣абхин̃н̃а̄су йоджеси, кин̃чи саттам̣ наруттамо;

дети кассачи на̄тхо со, чатассо пат̣исамбхида̄.

199. ‘‘бодханеййам̣ паджам̣ дисва̄, асан̇кхеййампи йоджанам̣ [асан̇кхеййепи йоджане сӣ. сйа̄. пӣ.)];

кхан̣ена упагантва̄на, винети нараса̄ратхи.

200. ‘‘тада̄хам̣ хам̣саватийам̣, ахосим̣ бра̄хман̣атраджо;

па̄рагӯ саббаведа̄нам̣, веййа̄каран̣асаммато.

201. ‘‘нируттийа̄ ча кусало, нигхан̣д̣умхи виса̄радо;

падако кет̣убхавидӯ, чхандовичитиковидо.

202. ‘‘джан̇гха̄виха̄рам̣ вичарам̣, хам̣са̄ра̄мамупеччахам̣;

аддасам̣ варадам̣ [вадатам̣ (сӣ. пӣ.), паварам̣ (сйа̄.)] сет̣т̣хам̣, маха̄джанапураккхатам̣.

203. ‘‘десентам̣ вираджам̣ дхаммам̣, паччанӣкаматӣ ахам̣;

упетва̄ тасса калйа̄н̣ам̣, сутва̄на вималам̣ ахам̣ [ва̄кйа̄ни, сутва̄на вимала̄нахам̣ (сӣ. сйа̄. пӣ.)].

204. ‘‘бйа̄хатам̣ пунаруттам̣ ва̄, апаттхам̣ ва̄ нираттхакам̣;

на̄ддасам̣ тасса мунино, тато паббаджито ахам̣.

205. ‘‘начиренева ка̄лена, саббасаттависа̄радо;

нипун̣о буддхавачане, ахосим̣ гун̣исаммато.

206. ‘‘тада̄ чатассо га̄тха̄йо, гантхайитва̄ субйан̃джана̄;

сантхавитва̄ тилокаггам̣, десайиссам̣ дине дине.

207. ‘‘вираттоси маха̄вӣро, сам̣са̄ре сабхайе васам̣;

карун̣а̄йа на нибба̄йи, тато ка̄рун̣ико муни.

208. ‘‘путхуджджано вайо санто, на килесавасо аху;

сампаджа̄но сатийутто, тасма̄ есо ачинтийо.

209. ‘‘дуббала̄ни килеса̄ни, йасса̄сайагата̄ни ме;

н̃а̄н̣аггипаридад̣д̣ха̄ни, на кхӣйим̣су тамаббхутам̣.

210. ‘‘йо саббалокасса гару, локо [локе (сйа̄. ка.)] йасса татха̄ гару;

татха̄пи лока̄чарийо, локо тасса̄нуваттако.

211. ‘‘евама̄дӣхи самбуддхам̣, киттайам̣ дхаммадесанам̣;

йа̄ваджӣвам̣ каритва̄на, гато саггам̣ тато чуто.

212. ‘‘сатасахассито каппе, йам̣ буддхамабхикиттайим̣;

дуггатим̣ на̄бхиджа̄на̄ми, киттана̄йа идам̣ пхалам̣.

213. ‘‘девалоке маха̄раджджам̣, па̄десим̣ кан̃чанаггхийам̣ [дибба̄нубходжахам̣ тада̄ (сйа̄.), раджджам̣ па̄деси кам̣чайам̣ (сӣ.)];

чаккаваттӣ маха̄раджджам̣, бахусонубхавим̣ ахам̣.

214. ‘‘дуве бхаве паджа̄йа̄ми, деватте атха ма̄нусе;

ан̃н̃ам̣ гатим̣ на джа̄на̄ми, киттана̄йа идам̣ пхалам̣.

215. ‘‘дуве куле паджа̄йа̄ми, кхаттийе атха бра̄хман̣е;

нӣче куле на джа̄йа̄ми, киттана̄йа идам̣ пхалам̣.

216. ‘‘паччхиме ча бхаве да̄ни, гириббаджапуруттаме;

ран̃н̃охам̣ бимбиса̄расса, путто на̄мена ча̄бхайо.

217. ‘‘па̄памиттавасам̣ гантва̄, ниган̣т̣хена вимохито;

песито на̄т̣апуттена, буддхасет̣т̣хамупеччахам̣.

218. ‘‘пуччхитва̄ нипун̣ам̣ пан̃хам̣, сутва̄ бйа̄каран̣уттамам̣;

паббаджитва̄на начирам̣, арахаттамапа̄пун̣им̣.

219. ‘‘киттайитва̄ джинаварам̣, киттито хоми саббада̄;

сугандхадехавадано, а̄сим̣ сукхасамаппито.

220. ‘‘тиккхаха̄салахупан̃н̃о, маха̄пан̃н̃о татхевахам̣;

вичиттапат̣ибха̄но ча, тасса каммасса ва̄хаса̄.

221. ‘‘абхиттхавитва̄ падумуттара̄хам̣, пасанначитто асамам̣ сайамбхум̣;

на гаччхи каппа̄ни апа̄йабхӯмим̣, сатам̣ сахасса̄ни балена тасса.

222. ‘‘килеса̄ джха̄пита̄ майхам̣…пе… вихара̄ми ана̄саво.

223. ‘‘сва̄гатам̣ вата ме а̄си…пе… катам̣ буддхасса са̄санам̣.

224. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ абхайо тхеро има̄ га̄тха̄йо

абха̄ситтха̄ти.

абхайаттхерасса̄пада̄нам̣ саттамам̣.