4. ван̇гӣсаттхераапада̄нам̣
96. ‘‘падумуттаро на̄ма джино, саббадхаммесу чаккхума̄;
ито сатасахассамхи, каппе уппаджджи на̄йако.
97. ‘‘йатха̄пи са̄гаре ӯми, гагане вийа та̄рака̄;
евам̣ па̄вачанам̣ тасса, арахантехи читтитам̣.
98. ‘‘садева̄сурана̄гехи, мануджехи пураккхато;
саман̣абра̄хман̣а̄кин̣н̣е, джанамаджджхе джинуттамо.
99. ‘‘пабха̄хи ануран̃джанто, локе [локам̣ (сӣ.)] локантагӯ джино;
вачанена вибодхенто, венеййападума̄ни со.
100. ‘‘веса̄раджджехи сампанно, чатӯхи пурисуттамо;
пахӣнабхайаса̄раджджо, кхемаппатто виса̄радо.
101. ‘‘а̄сабхам̣ паварам̣ т̣ха̄нам̣, буддхабхӯмин̃ча кевалам̣;
пат̣иджа̄на̄ти локагго, наттхи сан̃чодако квачи.
102. ‘‘сӣхана̄дамасамбхӣтам̣, надато тасса та̄дино;
дево наро ва̄ брахма̄ ва̄, пат̣иватта̄ на виджджати.
103. ‘‘десенто паварам̣ дхаммам̣, санта̄ренто садевакам̣;
дхаммачаккам̣ паваттети, париса̄су виса̄радо.
104. ‘‘пат̣ибха̄наватам̣ аггам̣, са̄вакам̣ са̄дхусамматам̣;
гун̣ам̣ бахум̣ пакиттетва̄, етадагге т̣хапеси там̣.
105. ‘‘тада̄хам̣ хам̣саватийам̣, бра̄хман̣о са̄дхусаммато;
саббаведавидӯ джа̄то, ва̄гӣсо ва̄дисӯдано.
106. ‘‘упечча там̣ маха̄вӣрам̣, сутва̄хам̣ дхаммадесанам̣;
пӣтиварам̣ пат̣илабхим̣, са̄вакасса гун̣е рато.
107. ‘‘нимантетва̄ва сугатам̣, сасан̇гхам̣ локананданам̣;
сатта̄хам̣ бходжайитва̄хам̣, дуссехаччха̄дайим̣ тада̄.
108. ‘‘нипачча сираса̄ па̄де, катока̄со катан̃джалӣ;
екамантам̣ т̣хито хат̣т̣хо, сантхавим̣ джинамуттамам̣.
109. ‘‘‘намо те ва̄димаддана [ва̄дисаддула (сӣ. пӣ.), ва̄дисӯдана (сйа̄.)], намо те исисаттама [пурисуттама (сӣ. пӣ.)];
намо те саббалокагга, намо те абхайан̇кара.
110. ‘‘‘намо те ма̄раматхана [ма̄рамасана (ат̣т̣ха.)], намо те дит̣т̣хисӯдана;
намо те сантисукхада, намо те саран̣ан̇кара.
111. ‘‘‘ана̄тха̄нам̣ бхавам̣ на̄тхо, бхӣта̄нам̣ абхайаппадо;
висса̄мабхӯми [висса̄сам̣ бхӯми (сйа̄.), висса̄набхӯми (пӣ.)] санта̄нам̣, саран̣ам̣ саран̣есинам̣’.
112. ‘‘евама̄дӣхи самбуддхам̣, сантхавитва̄ маха̄гун̣ам̣;
авочам̣ ва̄дисӯдасса [ва̄дисӯрасса (сӣ. сйа̄. пӣ.)], гатим̣ паппоми бхиккхуно.
113. ‘‘тада̄ авоча бхагава̄, анантапат̣ибха̄нава̄;
‘йо со буддхам̣ абходжеси, сатта̄хам̣ сахаса̄вакам̣.
114. ‘‘‘гун̣ан̃ча ме пакиттеси, пасанно сехи па̄н̣ибхи;
есо паттхайате т̣ха̄нам̣, ва̄дисӯдасса бхиккхуно.
115. ‘‘‘ана̄гатамхи аддха̄не, лаччхасе там̣ маноратхам̣;
девама̄нусасампаттим̣, анубхотва̄ анаппакам̣.
116. ‘‘‘сатасахассито каппе, окка̄какуласамбхаво;
готамо на̄ма готтена, саттха̄ локе бхависсати.
117. ‘‘‘тасса дхаммесу да̄йа̄до, орасо дхамманиммито;
ван̇гӣсо на̄ма на̄мена, хессати саттху са̄вако’.
118. ‘‘там̣ сутва̄ мудито хутва̄, йа̄ваджӣвам̣ тада̄ джинам̣;
паччайехи упат̣т̣ха̄сим̣, меттачитто татха̄гатам̣.
119. ‘‘тена каммена сукатена, четана̄пан̣идхӣхи ча;
джахитва̄ ма̄нусам̣ дехам̣, туситам̣ [та̄ватим̣сам̣ (сйа̄.)] агама̄сахам̣.
120. ‘‘паччхиме ча бхаве да̄ни, джа̄то виппакуле [парибба̄джакуле (сӣ. сйа̄. пӣ.)] ахам̣;
пачча̄джа̄то [сампатто ча (ка.)] йада̄ а̄сим̣, джа̄тийа̄ саттавассико.
121. ‘‘саббаведавидӯ джа̄то, ва̄дасаттхависа̄радо;
ва̄диссаро [ваггуссаро (сйа̄. пӣ.)] читтакатхӣ, парава̄даппамаддано.
122. ‘‘ван̇ге джа̄тоти ван̇гӣсо, вачане иссароти ва̄;
ван̇гӣсо ити ме на̄мам̣, абхавӣ локасамматам̣.
123. ‘‘йада̄хам̣ вин̃н̃утам̣ патто, т̣хито пат̣хамайоббане;
тада̄ ра̄джагахе рамме, са̄рипуттамахаддасам̣ [матхаддасам̣ (сӣ. пӣ.), ча аддасам̣ (сйа̄.)].
пан̃чавӣсатимам̣ бха̄н̣ава̄рам̣.
124. ‘‘пин̣д̣а̄йа вичарантам̣ там̣, паттапа̄н̣им̣ сусам̣вутам̣;
алолаккхим̣ митабха̄н̣им̣, йугаматтам̣ нидаккхитам̣ [нириккхатам̣ (сӣ. пӣ.), удиккхатам̣ (сйа̄.)].
125. ‘‘там̣ дисва̄ вимхито хутва̄, авочам̣ мамануччхавам̣ [манануччхавам̣ (сӣ. сйа̄.)];
кан̣ика̄рам̣ва ничитам̣ [кан̣ика̄рапаричитам̣ (пӣ.), кхан̣икам̣ т̣ха̄нарачитам̣ (сӣ.)], читтам̣ га̄тха̄падам̣ ахам̣.
126. ‘‘а̄чиккхи со ме саттха̄рам̣, самбуддхам̣ локана̄йакам̣;
тада̄ со пан̣д̣ито вӣро, уттарим̣ [уттарам̣ (сӣ. пӣ.)] самавоча ме.
127. ‘‘вира̄гасам̣хитам̣ ва̄кйам̣, катва̄ дуддасамуттамам̣;
вичиттапат̣ибха̄нехи, тосито тена та̄дина̄.
128. ‘‘нипачча сираса̄ па̄де, ‘пабба̄джехӣ’ти мам̣ брави;
тато мам̣ са маха̄пан̃н̃о, буддхасет̣т̣хамупа̄найи.
129. ‘‘нипачча сираса̄ па̄де, нисӣдим̣ саттху сантике;
мама̄ха вадатам̣ сет̣т̣хо, каччи ван̇гӣса джа̄на̄си [саччам̣ ван̇гӣса каччи те (сйа̄.)].
130. ‘‘кин̃чи сиппанти тасса̄хам̣, ‘джа̄на̄мӣ’ти ча абравим̣;
матасӣсам̣ ваначчхуддхам̣, апи ба̄расавассикам̣;
тава виджджа̄висесена, саче саккоси ва̄чайа [бха̄сайа (сӣ. пӣ.)].
131. ‘‘а̄моти ме пат̣ин̃н̃а̄те, тӣн̣и сӣса̄ни дассайи;
нирайанарадевесу, упапанне ава̄чайим̣.
132. ‘‘тада̄ кхӣн̣а̄савассева [паччекабуддхасса (сӣ. пӣ.)], сӣсам̣ дассеси на̄йако;
татохам̣ вихата̄раббхо, паббаджджам̣ самайа̄чисам̣.
133. ‘‘паббаджитва̄на сугатам̣, сантхава̄ми тахим̣ тахим̣;
тато мам̣ каббавиттоси [кавичиттоти (сйа̄. пӣ.)], уджджха̄йантиха бхиккхаво.
134. ‘‘тато вӣмам̣санаттхам̣ ме, а̄ха буддхо вина̄йако;
таккика̄ панима̄ га̄тха̄, т̣ха̄насо пат̣ибханти там̣.
135. ‘‘на каббавиттохам̣ вӣра, т̣ха̄насо пат̣ибханти мам̣;
тена хи да̄ни ван̇гӣса, т̣ха̄насо сантхава̄хи мам̣.
136. ‘‘тада̄хам̣ сантхавим̣ вӣрам̣, га̄тха̄хи исисаттамам̣;
т̣ха̄насо ме тада̄ тут̣т̣хо, джино агге т̣хапеси мам̣.
137. ‘‘пат̣ибха̄нена читтена, ан̃н̃есаматиман̃н̃ахам̣;
песале тена сам̣вигго, арахаттамапа̄пун̣им̣.
138. ‘‘‘пат̣ибха̄наватам̣ агго, ан̃н̃о кочи на виджджати;
йатха̄йам̣ бхиккху ван̇гӣсо, евам̣ дха̄ретха бхиккхаво’.
139. ‘‘сатасахассе катам̣ каммам̣, пхалам̣ дассеси ме идха;
сумутто саравегова килесе джха̄пайим̣ мама.
140. ‘‘килеса̄ джха̄пита̄ майхам̣…пе… вихара̄ми ана̄саво.
141. ‘‘сва̄гатам̣ вата ме а̄си…пе… катам̣ буддхасса са̄санам̣.
142. ‘‘пат̣исамбхида̄ чатассо…пе… катам̣ буддхасса са̄санам̣’’.
иттхам̣ судам̣ а̄йасма̄ ван̇гӣсо тхеро има̄ га̄тха̄йо
абха̄ситтха̄ти.
ван̇гӣсаттхерасса̄пада̄нам̣ чатуттхам̣.