9. ра̄дхаттхераапада̄нам̣

296. ‘‘падумуттаро на̄ма джино, саббалокавидӯ муни;

ито сатасахассамхи, каппе уппаджджи чаккхума̄.

297. ‘‘ова̄дако вин̃н̃а̄пако, та̄рако саббапа̄н̣инам̣;

десана̄кусало буддхо, та̄реси джанатам̣ бахум̣.

298. ‘‘анукампако ка̄рун̣ико, хитесӣ саббапа̄н̣инам̣;

сампатте титтхийе саббе, пан̃часӣле патит̣т̣хапи.

299. ‘‘евам̣ нира̄кулам̣ а̄си, сун̃н̃атам̣ титтхийехи ча;

вичиттам̣ арахантехи, васӣбхӯтехи та̄дибхи.

300. ‘‘ратана̄нат̣т̣хапан̃н̃а̄сам̣, уггато со маха̄муни;

кан̃чанаггхийасан̇ка̄со, ба̄ттим̣саваралаккхан̣о.

301. ‘‘вассасатасахасса̄ни, а̄йу виджджати та̄ваде;

та̄вата̄ тит̣т̣хама̄но со, та̄реси джанатам̣ бахум̣.

302. ‘‘тада̄хам̣ хам̣саватийам̣, бра̄хман̣о мантапа̄рагӯ;

упечча там̣ нараварам̣, ассосим̣ дхаммадесанам̣.

303. ‘‘пан̃н̃апентам̣ маха̄вӣрам̣, париса̄су виса̄радам̣;

пат̣ибха̄неййакам̣ бхиккхум̣, етадагге вина̄йакам̣.

304. ‘‘тада̄хам̣ ка̄рам̣ катва̄на, сасан̇гхе локана̄йаке;

нипачча сираса̄ па̄де, там̣ т̣ха̄нам̣ абхипаттхайим̣.

305. ‘‘тато мам̣ бхагава̄ а̄ха, син̇гӣниккхасамаппабхо;

сарена раджанӣйена, килесамалаха̄рина̄.

306. ‘‘‘сукхӣ бхавассу дӣгха̄йу, сиджджхату пан̣идхӣ тава;

сасан̇гхе ме катам̣ ка̄рам̣, атӣва випулам̣ тайа̄.

307. ‘‘‘сатасахассито каппе, окка̄какуласамбхаво;

готамо на̄ма готтена, саттха̄ локе бхависсати.

308. ‘‘‘тасса дхаммесу да̄йа̄до, орасо дхамманиммито;

ра̄дхоти на̄мадхеййена, хессати саттху са̄вако.

309. ‘‘‘са те хетугун̣е тут̣т̣хо, сакйапутто нара̄сабхо [идам̣ па̄дадвайам̣ сйа̄мамӯле наттхӣ];

пат̣ибха̄неййака̄наггам̣, пан̃н̃апессати на̄йако’.

310. ‘‘там̣ сутва̄ мудито хутва̄, йа̄ваджӣвам̣ тада̄ джинам̣;

меттачитто паричарим̣, сато пан̃н̃а̄сама̄хито.

311. ‘‘тена каммена сукатена, четана̄пан̣идхӣхи ча;

джахитва̄ ма̄нусам̣ дехам̣, та̄ватим̣самагаччхахам̣.

312. ‘‘сата̄нам̣ тӣн̣иккхаттун̃ча, девараджджамака̄райим̣;

сата̄нам̣ пан̃чаккхаттун̃ча, чаккаваттӣ ахосахам̣.

313. ‘‘падесараджджам̣ випулам̣, ган̣ана̄то асан̇кхийам̣;

саббаттха сукхито а̄сим̣, тасса каммасса ва̄хаса̄.

314. ‘‘паччхиме бхаве сампатте, гириббаджапуруттаме;

джа̄то виппакуле ниддхе, викалаччха̄дана̄сане.

315. ‘‘кат̣аччхубхиккхам̣ па̄да̄сим̣, са̄рипуттасса та̄дино;

йада̄ джин̣н̣о ча вуддхо ча, тада̄ра̄мамупа̄гамим̣.

316. ‘‘паббаджати на мам̣ кочи [пабба̄дженти на мам̣ кечи (сӣ. сйа̄ пӣ.)], джин̣н̣адуббалатха̄макам̣;

тена дӣно виван̣н̣ан̇го [виван̣н̣ако (ка.)], соко ча̄сим̣ тада̄ ахам̣.

317. ‘‘дисва̄ маха̄ка̄рун̣ико, мамама̄ха [мама̄ха со (сӣ.), мама̄ха ча (пӣ.)] маха̄муни;

‘киматтхам̣ путтасокат̣т̣о, брӯхи те читтаджам̣ руджам̣’.

318. ‘‘‘паббаджджам̣ на лабхе вӣра, сва̄ккха̄те тава са̄сане;

тена сокена дӣносми, саран̣ам̣ хохи на̄йака’.

319. ‘‘тада̄ бхиккхӯ сама̄нетва̄, апуччхи мунисаттамо;

‘имасса адхика̄рам̣ йе, саранти бйа̄харанту те’.

320. ‘‘са̄рипутто тада̄воча, ‘ка̄рамасса сара̄махам̣;

кат̣аччхубхиккхам̣ да̄песи, пин̣д̣а̄йа чарато мама’.

321. ‘‘‘са̄дху са̄дху катан̃н̃ӯси, са̄рипутта имам̣ тувам̣;

пабба̄джехи диджам̣ вуд̣д̣хам̣, хессата̄джа̄нийо айам̣’.

322. ‘‘тато алаттхам̣ паббаджджам̣, каммава̄чопасампадам̣;

на чиренева ка̄лена, па̄пун̣им̣ а̄саваккхайам̣.

323. ‘‘саккаччам̣ мунино ва̄кйам̣, сун̣а̄ми мудито йато;

пат̣ибха̄неййака̄наггам̣, тато мам̣ т̣хапайӣ джино.

324. ‘‘килеса̄ джха̄пита̄ майхам̣…пе… вихара̄ми ана̄саво.

325. ‘‘сва̄гатам̣ вата ме а̄си…пе… катам̣ буддхасса са̄санам̣.

326. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ ра̄дхо тхеро има̄ га̄тха̄йо

абха̄ситтха̄ти.

ра̄дхаттхерасса̄пада̄нам̣ навамам̣.