3. маха̄каппинаттхераапада̄нам̣

66. ‘‘падумуттаро на̄ма джино, саббадхамма̄на па̄рагӯ;

удито аджат̣а̄ка̄се [джагада̄ка̄се (сӣ.), джалада̄ка̄се (пӣ.)], равӣва сарадамбаре.

67. ‘‘вачана̄бха̄йа бодхети, венеййападума̄ни со;

килесапан̇кам̣ сосети, матирам̣сӣхи на̄йако.

68. ‘‘титтхийа̄нам̣ йасе [йасо (сӣ. пӣ.)] ханти, кхаджджота̄бха̄ йатха̄ рави;

саччаттха̄бхам̣ пака̄сети, ратанам̣ва дива̄каро.

69. ‘‘гун̣а̄нам̣ а̄йатибхӯто, ратана̄нам̣ва са̄гаро;

паджджуннорива бхӯта̄ни, дхаммамегхена вассати.

70. ‘‘аккхадассо тада̄ а̄сим̣, нагаре хам̣сасавхайе;

упечча дхаммамассосим̣, джаладжуттамана̄мино.

71. ‘‘ова̄дакасса бхиккхӯнам̣, са̄вакасса ката̄вино;

гун̣ам̣ пака̄сайантасса, таппайантасса [тосайантасса (сӣ.), ха̄сайантасса (сйа̄.), ва̄сайантасса (пӣ.)] ме манам̣.

72. ‘‘сутва̄ патӣто сумано, нимантетва̄ татха̄гатам̣;

сасиссам̣ бходжайитва̄на, там̣ т̣ха̄намабхипаттхайим̣.

73. ‘‘тада̄ хам̣сасамабха̄го, хам̣садундубхиниссано [хам̣садундубхисуссаро (сӣ.)];

пассатхетам̣ маха̄маттам̣, виниччхайависа̄радам̣.

74. ‘‘патитам̣ па̄дамӯле ме, самуггататанӯрухам̣;

джӣмӯтаван̣н̣ам̣ пӣн̣ам̣сам̣, пасаннанайана̄нанам̣.

75. ‘‘парива̄рена махата̄, ра̄джайуттам̣ маха̄йасам̣;

есо ката̄вино т̣ха̄нам̣, паттхети мудита̄сайо.

76. ‘‘‘имина̄ пан̣ипа̄тена, ча̄гена пан̣идхӣхи ча [пин̣д̣апа̄тена, четана̄ пан̣идхӣхи ча (сӣ.)];

каппасатасахасса̄ни, нупападжджати дуггатим̣.

77. ‘‘‘девесу девасобхаггам̣, мануссесу махантатам̣;

анубхотва̄на сесена [абхутва̄ва сесена (сӣ.), анубхотва̄ва сесена (сйа̄.)], нибба̄нам̣ па̄пун̣иссати.

78. ‘‘‘сатасахассито каппе, окка̄какуласамбхаво;

готамо на̄ма готтена, саттха̄ локе бхависсати.

79. ‘‘‘тасса дхаммесу да̄йа̄до, орасо дхамманиммито;

каппино на̄ма на̄мена, хессати саттху са̄вако’.

80. ‘‘татохам̣ сукатам̣ ка̄рам̣, катва̄на джинаса̄сане;

джахитва̄ ма̄нусам̣ дехам̣, туситам̣ агама̄сахам̣.

81. ‘‘девама̄нусараджджа̄ни, сатасо ануса̄сийа;

ба̄ра̄н̣асийама̄санне, джа̄то кенийаджа̄тийам̣.

82. ‘‘сахассапарива̄рена [сатасахассапарива̄ро (сйа̄.)], сападжа̄патико ахам̣;

пан̃ча паччекабуддха̄нам̣, сата̄ни самупат̣т̣хахим̣.

83. ‘‘тема̄сам̣ бходжайитва̄на, паччха̄дамха тичӣварам̣;

тато чута̄ майам̣ саббе, ахумха тидасӯпага̄.

84. ‘‘пуно саббе мануссаттам̣, агамимха тато чута̄;

куккут̣амхи пуре джа̄та̄, химавантасса пассато.

85. ‘‘каппино на̄махам̣ а̄сим̣, ра̄джапутто маха̄йасо;

сеса̄маччакуле джа̄та̄, мамева парива̄райум̣.

86. ‘‘маха̄раджджасукхам̣ патто, саббака̄масамиддхима̄;

ва̄н̣иджехи самаккха̄там̣, буддхуппа̄дамахам̣ сун̣им̣.

87. ‘‘‘буддхо локе самуппанно, асамо екапуггало;

со пака̄сети саддхаммам̣, аматам̣ сукхамуттамам̣.

88. ‘‘‘суйутта̄ тасса сисса̄ ча, сумутта̄ ча ана̄сава̄’;

‘‘сутва̄ несам̣ сувачанам̣, саккаритва̄на ва̄н̣идже.

89. ‘‘паха̄йа раджджам̣ са̄маччо, никкхамим̣ буддхама̄мако;

надим̣ дисва̄ маха̄чандам̣, пӯритам̣ саматиттикам̣.

90. ‘‘аппатит̣т̣хам̣ ана̄ламбам̣, дуттарам̣ сӣгхава̄хиним̣;

гун̣ам̣ саритва̄ буддхасса, соттхина̄ саматиккамим̣.

91. ‘‘‘бхавасотам̣ саче буддхо, тин̣н̣о локантагӯ видӯ [вибхӯ (ка.)];

етена саччаваджджена, гаманам̣ ме самиджджхату.

92. ‘‘‘йади сантигамо магго, моккхо чаччантикам̣ [моккхадам̣ сантикам̣ (сйа̄.)] сукхам̣;

етена саччаваджджена, гаманам̣ ме самиджджхату.

93. ‘‘‘сан̇гхо че тин̣н̣аканта̄ро, пун̃н̃аккхетто ануттаро;

етена саччаваджджена, гаманам̣ ме самиджджхату’.

94. ‘‘саха кате саччаваре, магга̄ апагатам̣ джалам̣;

тато сукхена уттин̣н̣о, надӣтӣре манораме.

95. ‘‘нисиннам̣ аддасам̣ буддхам̣, удентам̣ва пабхан̇карам̣;

джалантам̣ хемаселам̣ва, дӣпаруккхам̣ва джотитам̣.

96. ‘‘сасим̣ва та̄ра̄сахитам̣, са̄вакехи пураккхатам̣;

ва̄савам̣ вийа вассантам̣, десана̄джаладантарам̣ [девена джалананданам̣ (сйа̄. пӣ.)].

97. ‘‘вандитва̄на саха̄маччо, екамантамупа̄висим̣;

тато но а̄сайам̣ [тато аджджха̄сайам̣ (сйа̄.)] н̃атва̄, буддхо дхаммамадесайи.

98. ‘‘сутва̄на дхаммам̣ вималам̣, авочумха майам̣ джинам̣;

‘пабба̄джехи маха̄вӣра, ниббинда̄мха [ниббинна̄мха (сӣ. пӣ.), отин̣н̣амха (сйа̄.)] майам̣ бхаве’.

99. ‘‘‘сваккха̄то бхиккхаве дхаммо, дуккхантакаран̣а̄йа во;

чаратха брахмачарийам̣’, ичча̄ха мунисаттамо.

100. ‘‘саха ва̄ча̄йа саббепи, бхиккхувесадхара̄ майам̣;

ахумха упасампанна̄, сота̄панна̄ ча са̄сане.

101. ‘‘тато джетаванам̣ гантва̄, ануса̄си вина̄йако;

анусит̣т̣хо джинена̄хам̣, арахаттамапа̄пун̣им̣.

102. ‘‘тато бхиккхусахасса̄ни [бхиккхусахассам̣ там̣ (сӣ. пӣ.)], ануса̄симахам̣ тада̄;

мама̄нуса̄санакара̄, тепи а̄сум̣ ана̄сава̄.

103. ‘‘джино тасмим̣ гун̣е тут̣т̣хо, етадагге т̣хапеси мам̣;

бхиккхуова̄дака̄нагго, каппиноти маха̄джане.

104. ‘‘сатасахассе катам̣ каммам̣, пхалам̣ дассеси ме идха;

памутто саравегова, килесе джха̄пайим̣ [джха̄пайӣ (сӣ.)] мама.

105. ‘‘килеса̄ джха̄пита̄ майхам̣…пе… вихара̄ми ана̄саво.

106. ‘‘сва̄гатам̣ вата ме а̄си…пе… катам̣ буддхасса са̄санам̣.

107. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ маха̄каппино тхеро има̄ га̄тха̄йо

абха̄ситтха̄ти.

маха̄каппинаттхерасса̄пада̄нам̣ татийам̣.