8. сучинтитаттхераапада̄нам̣

107. ‘‘нагаре хам̣саватийа̄, ахосим̣ кассако тада̄;

касикаммена джӣва̄ми, тена посеми да̄раке.

108. ‘‘сусампаннам̣ тада̄ кхеттам̣, дхан̃н̃ам̣ ме пхалинам̣ [пхалитам̣ (сӣ. пӣ.)] аху;

па̄кака̄ле ча сампатте, евам̣ чинтесахам̣ тада̄.

109. ‘‘наччханнам̣ наппатирӯпам̣, джа̄нантасса гун̣а̄гун̣ам̣;

йохам̣ сан̇гхе адатва̄на, аггам̣ бхун̃джеййа че тада̄ [маттана̄ (сйа̄.)].

110. ‘‘айам̣ буддхо асамасамо, дваттим̣саваралаккхан̣о;

тато пабха̄вито сан̇гхо, пун̃н̃аккхетто ануттаро.

111. ‘‘таттха дасса̄махам̣ да̄нам̣, навасассам̣ пуре пуре;

ева̄хам̣ чинтайитва̄на, хат̣т̣хо пӣн̣итама̄насо [пӣтика… (сйа̄.)].

112. ‘‘кхеттато дхан̃н̃ама̄хатва̄, самбуддхам̣ упасан̇камим̣;

упасан̇камма самбуддхам̣, локаджет̣т̣хам̣ нара̄сабхам̣;

вандитва̄ саттхуно па̄де, идам̣ вачанамабравим̣.

113. ‘‘‘навасассан̃ча сампаннам̣, а̄йа̄госи [идха хоси (сйа̄.)] ча твам̣ муне;

анукампамупа̄да̄йа, адхива̄сехи чаккхума’.

114. ‘‘падумуттаро локавидӯ, а̄хутӣнам̣ пат̣иггахо;

мама сан̇каппаман̃н̃а̄йа, идам̣ вачанамабрави.

115. ‘‘‘чатта̄ро ча пат̣ипанна̄, чатта̄ро ча пхале т̣хита̄;

еса сан̇гхо уджубхӯто, пан̃н̃а̄сӣласама̄хито;

йаджанта̄нам̣ манусса̄нам̣, пун̃н̃апеккха̄на па̄н̣инам̣.

116. ‘‘‘каротопадхикам̣ пун̃н̃ам̣, сан̇гхе диннам̣ махаппхалам̣;

тасмим̣ сан̇гхева [сам̣гхе ча (сйа̄. пӣ.)] да̄таббам̣, тава сассам̣ татхетарам̣.

117. ‘‘‘сан̇гхато уддиситва̄на, бхиккхӯ нетва̄на сам̣гхарам̣;

пат̣ийаттам̣ гхаре сантам̣, бхиккхусан̇гхасса дехи твам̣’.

118. ‘‘сан̇гхато уддиситва̄на, бхиккхӯ нетва̄на сам̣гхарам̣;

йам̣ гхаре пат̣ийаттам̣ ме, бхиккхусан̇гхассада̄сахам̣.

119. ‘‘тена каммена сукатена, четана̄пан̣идхӣхи ча;

джахитва̄ ма̄нусам̣ дехам̣, та̄ватим̣самагаччхахам̣.

120. ‘‘таттха ме сукатам̣ бйамхам̣, сован̣н̣ам̣ саппабхассарам̣;

сат̣т̣хийоджанамуббедхам̣, тим̣сайоджанавиттхатам̣.

екӯнавӣсатимам̣ бха̄н̣ава̄рам̣.

121. ‘‘а̄кин̣н̣ам̣ бхаванам̣ майхам̣, на̄рӣган̣асама̄кулам̣;

таттха бхутва̄ пивитва̄ ча, васа̄ми тидасе ахам̣.

122. ‘‘сата̄нам̣ тӣн̣иккхаттун̃ча, девараджджамака̄райим̣;

сата̄нам̣ пан̃чаккхаттун̃ча, чаккаваттӣ ахосахам̣;

падесараджджам̣ випулам̣, ган̣ана̄то асан̇кхийам̣.

123. ‘‘бхава̄бхаве сам̣саранто, лабха̄ми амитам̣ дханам̣;

бхоге ме ӯната̄ наттхи, навасассассидам̣ пхалам̣.

124. ‘‘хаттхийа̄нам̣ ассайа̄нам̣, сивикам̣ сандама̄никам̣;

лабха̄ми саббамеветам̣ [саббаметампи (ка.)], навасассассидам̣ пхалам̣.

125. ‘‘нававаттхам̣ навапхалам̣, наваггарасабходжанам̣;

лабха̄ми саббамеветам̣, навасассассидам̣ пхалам̣.

126. ‘‘косеййакамбалийа̄ни, кхомакаппа̄сика̄ни ча;

лабха̄ми саббамеветам̣, навасассассидам̣ пхалам̣.

127. ‘‘да̄сӣган̣ам̣ да̄саган̣ам̣, на̄рийо ча алан̇ката̄;

лабха̄ми саббамеветам̣, навасассассидам̣ пхалам̣.

128. ‘‘на мам̣ сӣтам̣ ва̄ ун̣хам̣ ва̄, парил̣а̄хо на виджджати;

атхо четасикам̣ дуккхам̣, хадайе ме на виджджати.

129. ‘‘идам̣ кха̄да идам̣ бхун̃джа, имамхи сайане сайа;

лабха̄ми саббамеветам̣, навасассассидам̣ пхалам̣.

130. ‘‘айам̣ паччхимако да̄ни, чаримо ваттате бхаво;

аджджа̄пи деййадхаммо ме, пхалам̣ тосеси саббада̄.

131. ‘‘навасассам̣ дадитва̄на, сан̇гхе ган̣аваруттаме;

ат̣т̣ха̄нисам̣се анубхоми, камма̄нуччхавике мама.

132. ‘‘ван̣н̣ава̄ йасава̄ хоми, маха̄бхого анӣтико;

маха̄паккхо [маха̄бхаккхо (сйа̄. ка.)] сада̄ хоми, абхеджджапарисо сада̄.

133. ‘‘саббе мам̣ апача̄йанти, йе кечи патхависсита̄;

деййадхамма̄ ча йе кечи, пуре пуре лабха̄махам̣.

134. ‘‘бхиккхусан̇гхасса ва̄ маджджхе, буддхасет̣т̣хасса саммукха̄;

саббепи саматиккамма, денти мамева да̄йака̄.

135. ‘‘пат̣хамам̣ навасассан̃хи, датва̄ сан̇гхе ган̣уттаме;

има̄нисам̣се анубхоми, навасассассидам̣ пхалам̣.

136. ‘‘сатасахассито каппе, йам̣ да̄намададим̣ тада̄;

дуггатим̣ на̄бхиджа̄на̄ми, навасассассидам̣ пхалам̣.

137. ‘‘килеса̄ джха̄пита̄ майхам̣…пе… вихара̄ми ана̄саво;

138. ‘‘сва̄гатам̣ вата ме а̄си…пе… катам̣ буддхасса са̄санам̣.

139. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ сучинтито тхеро има̄ га̄тха̄йо

абха̄ситтха̄ти.

сучинтитаттхерасса̄пада̄нам̣ ат̣т̣хамам̣.