9. паттходанада̄йакаттхераапада̄нам̣

170. ‘‘ванача̄рӣ пуре а̄сим̣, сататам̣ ванакаммико;

паттходанам̣ гахетва̄на, каммантам̣ агама̄сахам̣.

171. ‘‘таттхаддаса̄сим̣ самбуддхам̣, сайамбхум̣ апара̄джитам̣;

вана̄ пин̣д̣а̄йа никкхантам̣, дисва̄ читтам̣ паса̄дайим̣.

172. ‘‘паракамма̄йане [вайакамма̄йане (ка.)] йутто, пун̃н̃ан̃ча ме на виджджати;

айам̣ паттходано аттхи, бходжайисса̄махам̣ [бходжайисса̄ми мам̣ (сйа̄.)] муним̣.

173. ‘‘паттходанам̣ гахетва̄на, сайамбхусса ада̄сахам̣;

мама ниджджха̄йама̄насса, парибхун̃джи тада̄ муни.

174. ‘‘тена каммена сукатена, четана̄пан̣идхӣхи ча;

джахитва̄ ма̄нусам̣ дехам̣, та̄ватим̣самагаччхахам̣.

175. ‘‘чхаттим̣саккхаттум̣ девиндо, девараджджамака̄райим̣;

теттим̣саккхаттум̣ ра̄джа̄ ча, чаккаваттӣ ахосахам̣.

176. ‘‘падесараджджам̣ випулам̣, ган̣ана̄то асан̇кхийам̣;

сукхито йасава̄ хоми, паттходанассидам̣ пхалам̣.

177. ‘‘бхава̄бхаве сам̣саранто, лабха̄ми амитам̣ дханам̣;

бхоге ме ӯната̄ наттхи, паттходанассидам̣ пхалам̣.

178. ‘‘надӣсотапат̣ибха̄га̄, бхога̄ ниббаттаре мама;

париметум̣ на саккоми, паттходанассидам̣ пхалам̣.

179. ‘‘имам̣ кха̄да имам̣ бхун̃джа, имамхи сайане сайа;

тена̄хам̣ сукхито хоми, паттходанассидам̣ пхалам̣.

180. ‘‘чатуннавутито каппе, йам̣ да̄намададим̣ тада̄;

дуггатим̣ на̄бхиджа̄на̄ми, паттходанассидам̣ пхалам̣.

181. ‘‘килеса̄ джха̄пита̄ майхам̣…пе… вихара̄ми ана̄саво.

182. ‘‘сва̄гатам̣ вата ме а̄си…пе… катам̣ буддхасса са̄санам̣.

183. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ паттходанада̄йако тхеро има̄ га̄тха̄йо абха̄ситтха̄ти.

паттходанада̄йакаттхерасса̄пада̄нам̣ навамам̣.