6. екадӣпийаттхераапада̄нам̣

124. ‘‘париниббуте сугате, сиддхаттхе локана̄йаке;

садевама̄нуса̄ саббе, пӯдженти двипадуттамам̣.

125. ‘‘а̄ропите ча читаке, сиддхаттхе локана̄йаке;

йатха̄сакена тха̄мена, читам̣ пӯдженти саттхуно.

126. ‘‘авидӯре читакасса, дӣпам̣ уджджа̄лайим̣ ахам̣;

йа̄ва удети сӯрийо, дӣпам̣ ме та̄ва уджджали.

127. ‘‘тена каммена сукатена, четана̄пан̣идхӣхи ча;

джахитва̄ ма̄нусам̣ дехам̣, та̄ватим̣самагаччхахам̣.

128. ‘‘таттха ме сукатам̣ бйамхам̣, екадӣпӣти н̃а̄йати;

дӣпасатасахасса̄ни, бйамхе паджджаларе мама.

129. ‘‘удайантова сӯрийо, дехо ме джотате сада̄;

саппабха̄хи сарӣрасса, а̄локо хоти ме сада̄.

130. ‘‘тирокут̣т̣ам̣ [тирокуд̣д̣ам̣ (сӣ. сйа̄. ка.)] тироселам̣, саматиггайха [саббаттхапи евамева диссати] паббатам̣;

саманта̄ йоджанасатам̣, пасса̄ми чаккхуна̄ ахам̣.

131. ‘‘саттасаттатиккхаттун̃ча, девалоке рамим̣ ахам̣;

екатим̣сатиккхаттун̃ча, девараджджамака̄райим̣.

132. ‘‘ат̣т̣хавӣсатиккхаттун̃ча, чаккаваттӣ ахосахам̣;

падесараджджам̣ випулам̣, ган̣ана̄то асан̇кхийам̣.

133. ‘‘девалока̄ чавитва̄на, ниббаттим̣ ма̄тукуччхийам̣;

ма̄тукуччхигатасса̄пи, аккхи ме на нимӣлати.

134. ‘‘джа̄тийа̄ чатувассохам̣, паббаджим̣ анага̄рийам̣;

ад̣д̣хама̄се асампатте, арахаттамапа̄пун̣им̣.

135. ‘‘диббачаккхум̣ висодхесим̣, бхава̄ саббе самӯхата̄;

саббе килеса̄ сан̃чхинна̄, екадӣпассидам̣ пхалам̣.

136. ‘‘тирокут̣т̣ам̣ тироселам̣, паббатан̃ча̄пи кевалам̣;

саматиккамма [саббаттхапӣ евамева диссати] пасса̄ми, екадӣпассидам̣ пхалам̣.

137. ‘‘висама̄ ме сама̄ хонти, андхака̄ро на виджджати;

на̄хам̣ пасса̄ми тимирам̣, екадӣпассидам̣ пхалам̣.

138. ‘‘чатуннавутито каппе, йам̣ дӣпамададим̣ тада̄;

дуггатим̣ на̄бхиджа̄на̄ми, екадӣпассидам̣ пхалам̣.

139. ‘‘килеса̄ джха̄пита̄ майхам̣…пе… вихара̄ми ана̄саво.

140. ‘‘сва̄гатам̣ вата ме а̄си…пе… катам̣ буддхасса са̄санам̣.

141. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ екадӣпийо тхеро има̄ га̄тха̄йо абха̄ситтха̄ти.

екадӣпийаттхерасса̄пада̄нам̣ чхат̣т̣хам̣.