8. а̄йа̄гада̄йакаттхераапада̄нам̣

94. ‘‘ниббуте локана̄тхамхи, сикхимхи вадатам̣ варе;

хат̣т̣хо хат̣т̣хена читтена, авандим̣ тхӯпамуттамам̣.

95. ‘‘вад̣д̣хакӣхи катха̄петва̄, мӯлам̣ датва̄нахам̣ тада̄;

хат̣т̣хо хат̣т̣хена читтена, а̄йа̄гам̣ ка̄рапесахам̣.

96. ‘‘ат̣т̣ха каппа̄ни девесу, аббокин̣н̣ам̣ [аббоччхиннам̣ (сӣ.)] васим̣ ахам̣;

авасесесу каппесу, вокин̣н̣ам̣ сам̣сарим̣ ахам̣.

97. ‘‘ка̄йе висам̣ на камати, саттха̄ни на ча ханти ме;

удакехам̣ на миййа̄ми, а̄йа̄гасса идам̣ пхалам̣.

98. ‘‘йадиччха̄ми ахам̣ вассам̣, маха̄мегхо павассати;

дева̄пи ме васам̣ енти, пун̃н̃акаммассидам̣ пхалам̣.

99. ‘‘саттаратанасампанно, тисаккхаттум̣ ахосахам̣;

на мам̣ кеча̄ваджа̄нанти, пун̃н̃акаммассидам̣ пхалам̣.

100. ‘‘екаттим̣се ито каппе, а̄йа̄гам̣ йамака̄райим̣;

дуггатим̣ на̄бхиджа̄на̄ми, а̄йа̄гасса идам̣ пхалам̣.

101. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ а̄йа̄гада̄йако тхеро има̄ га̄тха̄йо абха̄ситтха̄ти.

а̄йа̄гада̄йакаттхерасса̄пада̄нам̣ ат̣т̣хамам̣.