9. дхаммачаккикаттхераапада̄нам̣

102. ‘‘сиддхаттхасса бхагавато, сӣха̄санасса саммукха̄;

дхаммачаккам̣ ме т̣хапитам̣, сукатам̣ вин̃н̃уван̣н̣итам̣.

103. ‘‘ча̄руван̣н̣ова собха̄ми, сайоггабалава̄хано;

парива̄ренти мам̣ ниччам̣, ануйанта̄ бахуджджана̄.

104. ‘‘сат̣т̣хитӯрийасахассехи, парича̄ремахам̣ сада̄;

парива̄рена собха̄ми, пун̃н̃акаммассидам̣ пхалам̣.

105. ‘‘чатуннавутито каппе, йам̣ чаккам̣ т̣хапайим̣ ахам̣;

дуггатим̣ на̄бхиджа̄на̄ми, дхаммачаккассидам̣ пхалам̣.

106. ‘‘ито ека̄дасе каппе, ат̣т̣ха̄сим̣су джана̄дхипа̄;

сахассара̄джана̄мена, чаккаваттӣ махаббала̄.

107. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ дхаммачаккико тхеро има̄ га̄тха̄йо абха̄ситтха̄ти.

дхаммачаккикаттхерасса̄пада̄нам̣ навамам̣.