1. саддасан̃н̃акаттхераапада̄нам̣

1. ‘‘мигалуддо пуре а̄сим̣, аран̃н̃е ка̄нане ахам̣;

таттхаддаса̄сим̣ самбуддхам̣, девасан̇гхапураккхатам̣.

2. ‘‘чатусаччам̣ пака̄сентам̣, уддхарантам̣ маха̄джанам̣;

ассосим̣ мадхурам̣ ва̄чам̣, каравӣкарудопамам̣ [рутопамам̣ (?)].

3. ‘‘брахмасарасса мунино, сикхино локабандхуно;

гхосе читтам̣ паса̄детва̄, паттомхи а̄саваккхайам̣.

4. ‘‘екаттим̣се ито каппе, йам̣ каммамакарим̣ тада̄;

дуггатим̣ на̄бхиджа̄на̄ми, паса̄дасса идам̣ пхалам̣.

5. ‘‘пат̣исамбхида̄ чатассо, вимоккха̄пи ча ат̣т̣химе;

чхал̣абхин̃н̃а̄ саччхиката̄, катам̣ буддхасса са̄санам̣’’.

иттхам̣ судам̣ а̄йасма̄ саддасан̃н̃ако тхеро има̄ га̄тха̄йо абха̄ситтха̄ти.

саддасан̃н̃акаттхерасса̄пада̄нам̣ пат̣хамам̣.