7. тин̣акут̣ида̄йакаттхераапада̄нам̣
74. ‘‘нагаре бандхуматийа̄, ахосим̣ паракаммико;
паракамма̄йане йутто, парабхаттам̣ апассито.
75. ‘‘рахогато нисӣдитва̄, евам̣ чинтесахам̣ тада̄;
буддхо локе самуппанно, адхика̄ро ча наттхи ме.
76. ‘‘ка̄ло ме гатим̣ [ка̄ло гатим̣ ме (сӣ. сйа̄.)] содхетум̣, кхан̣о ме пат̣ипа̄дито;
дуккхо нирайасампхассо, апун̃н̃а̄нан̃хи па̄н̣инам̣.
77. ‘‘ева̄хам̣ чинтайитва̄на, каммаса̄мим̣ упа̄гамим̣;
ека̄хам̣ каммам̣ йа̄читва̄, випинам̣ па̄висим̣ ахам̣.
78. ‘‘тин̣акат̣т̣хан̃ча валлин̃ча, а̄харитва̄нахам̣ тада̄;
тидан̣д̣аке т̣хапетва̄на, акам̣ тин̣акут̣им̣ ахам̣.
79. ‘‘сан̇гхассаттха̄йа кут̣икам̣, ниййа̄детва̄на [ниййа̄тетва̄на (сӣ.)] там̣ ахам̣;
тадахейева а̄гантва̄, каммаса̄мим̣ упа̄гамим̣.
80. ‘‘тена каммена сукатена, та̄ватим̣самагаччхахам̣;
таттха ме сукатам̣ бйамхам̣, кут̣ика̄йа суниммитам̣ [тин̣акут̣ика̄йа ниммитам̣ (сӣ.)].
81. ‘‘сахассакан̣д̣ам̣ сатабхен̣д̣у, дхаджа̄лу харита̄майам̣;
сатасахассаниййӯха̄, бйамхе па̄тубхавим̣су ме.
82. ‘‘йам̣ йам̣ йонупападжджа̄ми, деваттам̣ атха ма̄нусам̣;
мама сан̇каппаман̃н̃а̄йа, па̄са̄до упатит̣т̣хати.
83. ‘‘бхайам̣ ва̄ чхамбхитаттам̣ ва̄, ломахам̣со на виджджати;
та̄сам̣ мама на джа̄на̄ми, тин̣акут̣ика̄йидам̣ [тин̣акут̣ийидам̣ (ка.)] пхалам̣.
84. ‘‘сӣхабйаггха̄ ча дӣпӣ ча, аччхакокатараччхака̄ [тараччхайо (сйа̄. ка.)];
саббе мам̣ паривадждженти, тин̣акут̣ика̄йидам̣ пхалам̣.
85. ‘‘сарӣсапа̄ [сирим̣сапа̄ (сӣ. сйа̄.), сарим̣сапа̄ (ка.)] ча бхӯта̄ ча, ахӣ кумбхан̣д̣араккхаса̄;
тепи мам̣ паривадждженти, тин̣акут̣ика̄йидам̣ пхалам̣.
86. ‘‘на па̄пасупинасса̄пи, сара̄ми дассанам̣ мама;
упат̣т̣хита̄ сати майхам̣, тин̣акут̣ика̄йидам̣ пхалам̣.
87. ‘‘та̄йева тин̣акут̣ика̄йа, анубхотва̄на сампада̄;
готамасса бхагавато, дхаммам̣ саччхикарим̣ ахам̣.
88. ‘‘еканавутито каппе, йам̣ каммамакарим̣ тада̄;
дуггатим̣ на̄бхиджа̄на̄ми, тин̣акут̣ика̄йидам̣ пхалам̣.
89. ‘‘пат̣исамбхида̄ чатассо…пе… катам̣ буддхасса са̄санам̣’’.
иттхам̣ судам̣ а̄йасма̄ тин̣акут̣ида̄йако тхеро има̄ га̄тха̄йо абха̄ситтха̄ти.
тин̣акут̣ида̄йакаттхерасса̄пада̄нам̣ саттамам̣.