8. уттийаттхераапада̄нам̣

169. ‘‘чандабха̄га̄надӣтӣре, сусума̄ро ахам̣ тада̄;

сагочараппасутохам̣ [сабходжанапасута̄хам̣ (сйа̄. ка.)], надӣтиттхам̣ агаччхахам̣.

170. ‘‘сиддхаттхо тамхи самайе, сайамбхӯ аггапуггало;

надим̣ таритука̄мо со, надӣтиттхам̣ упа̄гами.

171. ‘‘упа̄гате ча [упа̄гатамхи (сйа̄. ка.)] самбуддхе, ахампи таттхупа̄гамим̣;

упагантва̄на самбуддхам̣, имам̣ ва̄чам̣ удӣрайим̣.

172. ‘‘‘абхирӯха маха̄вӣра, та̄ресса̄ми ахам̣ тувам̣;

петтикам̣ висайам̣ майхам̣, анукампа маха̄муни’.

173. ‘‘мама уггаджджанам̣ сутва̄, абхирӯхи маха̄муни;

хат̣т̣хо хат̣т̣хена читтена, та̄ресим̣ локана̄йакам̣.

174. ‘‘надийа̄ па̄риме тӣре, сиддхаттхо локана̄йако;

асса̄сеси мамам̣ таттха, аматам̣ па̄пун̣иссаси.

175. ‘‘тамха̄ ка̄йа̄ чавитва̄на, девалокам̣ а̄гаччхахам̣;

диббасукхам̣ анубхавим̣, аччхара̄хи пураккхато.

176. ‘‘саттаккхаттун̃ча девиндо, девараджджамака̄сахам̣;

тӣн̣иккхаттум̣ чаккаваттӣ, махийа̄ иссаро ахум̣.

177. ‘‘вивекамануйуттохам̣, нипако ча сусам̣вуто;

дха̄реми антимам̣ дехам̣, самма̄самбуддхаса̄сане.

178. ‘‘чатуннавутито каппе, та̄ресим̣ йам̣ нара̄сабхам̣;

дуггатим̣ на̄бхиджа̄на̄ми, таран̣а̄йа идам̣ пхалам̣.

179. ‘‘пат̣исамбхида̄ чатассо, вимоккха̄пи ча ат̣т̣химе;

чхал̣абхин̃н̃а̄ саччхиката̄, катам̣ буддхасса са̄санам̣’’.

иттхам̣ судам̣ а̄йасма̄ уттийо [уттирийо (сӣ.)] тхеро има̄ га̄тха̄йо абха̄ситтха̄ти.

уттийаттхерасса̄пада̄нам̣ ат̣т̣хамам̣.