4. пан̃часӣласама̄да̄нийаттхераапада̄нам̣

134. ‘‘нагаре чандаватийа̄, бхатако а̄сахам̣ тада̄;

паракамма̄йане йутто, паббаджджам̣ на лабха̄махам̣.

135. ‘‘махандхака̄рапихита̄, тивидхаггӣхи д̣айхаре;

кена ну кхо упа̄йена, висам̣йутто бхаве ахам̣.

136. ‘‘деййадхаммо ча ме наттхи, вара̄ко бхатако ахам̣;

йам̣нӯна̄хам̣ пан̃часӣлам̣, раккхеййам̣ парипӯрайам̣.

137. ‘‘аномадассисса мунино, нисабхо на̄ма са̄вако;

тамахам̣ упасан̇камма, пан̃часиккха̄падаггахим̣.

138. ‘‘вассасатасахасса̄ни, а̄йу виджджати та̄ваде;

та̄вата̄ пан̃часӣла̄ни, парипун̣н̣а̄ни гопайим̣.

139. ‘‘маччука̄ле ча сампатте, дева̄ асса̄сайанти мам̣;

‘ратхо сахассайутто те, ма̄риса̄йам̣ [ма̄рисасса (ка.)] упат̣т̣хито’.

140. ‘‘ваттанте чариме читте, мама сӣлам̣ ануссарим̣;

тена каммена сукатена, та̄ватим̣сам̣ агаччхахам̣.

141. ‘‘тим̣саккхаттун̃ча девиндо, девараджджамака̄райим̣;

диббасукхам̣ [диббам̣ сукхам̣ (сӣ.)] анубхавим̣, аччхара̄хи пураккхато.

142. ‘‘пан̃часаттатиккхаттун̃ча, чаккаваттӣ ахосахам̣;

падесараджджам̣ випулам̣, ган̣ана̄то асан̇кхийам̣.

143. ‘‘девалока̄ чавитва̄на, суккамӯлена чодито;

пуре веса̄лийам̣ джа̄то, маха̄са̄ле суад̣д̣хаке.

144. ‘‘вассӯпана̄йике ка̄ле, диппанте [диббанти (ка.)] джинаса̄сане;

ма̄та̄ ча ме пита̄ чева, пан̃часиккха̄падаггахум̣.

145. ‘‘саха сутва̄нахам̣ сӣлам̣, мама сӣлам̣ ануссарим̣;

ека̄сане нисӣдитва̄, арахаттамапа̄пун̣им̣.

146. ‘‘джа̄тийа̄ пан̃чавассена, арахаттамапа̄пун̣им̣;

упасампа̄дайи буддхо, гун̣аман̃н̃а̄йа чаккхума̄.

147. ‘‘парипун̣н̣а̄ни гопетва̄, пан̃часиккха̄пада̄нахам̣;

апаримеййе ито каппе, винипа̄там̣ на гаччхахам̣.

148. ‘‘сва̄хам̣ йасаманубхавим̣, тесам̣ сӣла̄на ва̄хаса̄;

каппакот̣импи киттенто, киттайе екадесакам̣.

149. ‘‘пан̃часӣла̄ни гопетва̄, тайо хетӯ лабха̄махам̣;

дӣгха̄йуко маха̄бхого, тиккхапан̃н̃о бхава̄махам̣.

150. ‘‘сам̣киттенто ча [пакиттентова (сӣ.), пакиттенте ча (сйа̄.)] саббесам̣, абхиматтан̃ча порисам̣;

бхава̄бхаве сам̣саритва̄, ете т̣ха̄не лабха̄махам̣.

151. ‘‘апаримеййасӣлесу, ваттанта̄ джинаса̄вака̄;

бхавесу йади раджджеййум̣, випа̄ко кӣдисо бхаве.

152. ‘‘сучин̣н̣ам̣ ме пан̃часӣлам̣, бхатакена тапассина̄ [випассина̄ (сӣ.)];

тена сӣленахам̣ аджджа, мочайим̣ саббабандхана̄.

153. ‘‘апаримеййе ито каппе, пан̃часӣла̄ни гопайим̣;

дуггатим̣ на̄бхиджа̄на̄ми, пан̃часӣла̄нидам̣ пхалам̣.

154. ‘‘пат̣исамбхида̄ чатассо, вимоккха̄пи ча ат̣т̣химе;

чхал̣абхин̃н̃а̄ саччхиката̄, катам̣ буддхасса са̄санам̣’’.

иттхам̣ судам̣ а̄йасма̄ пан̃часӣласама̄да̄нийо тхеро има̄ га̄тха̄йо абха̄ситтха̄ти.

пан̃часӣласама̄да̄нийаттхерасса̄пада̄нам̣ чатуттхам̣.