9. саппида̄йакаттхераапада̄нам̣

44. ‘‘нисинно па̄са̄даваре, на̄рӣган̣апураккхато;

бйа̄дхитам̣ саман̣ам̣ дисва̄, абхина̄месахам̣ гхарам̣.

45. ‘‘упавит̣т̣хам̣ маха̄вӣрам̣, девадевам̣ нара̄сабхам̣;

саппителам̣ майа̄ диннам̣, сиддхаттхасса махесино.

46. ‘‘пассаддхадаратхам̣ дисва̄, виппасаннамукхиндрийам̣;

вандитва̄ саттхуно па̄де, анусам̣са̄вайим̣ пуре.

47. ‘‘дисва̄ мам̣ суппасаннаттам̣ [суппасаннантам̣ (сйа̄. ка.) суппасанначиттанти аттхо], иддхийа̄ па̄рамин̇гато;

набхам̣ аббхуггамӣ дхӣро, хам̣сара̄джа̄ва амбаре.

48. ‘‘чатуннавутито каппе, йам̣ да̄намададим̣ тада̄;

дуггатим̣ на̄бхиджа̄на̄ми, саппителассидам̣ пхалам̣.

49. ‘‘ито саттарасе каппе, джутидева [дутидева (сйа̄.), тутидева (ка.)] сана̄мако;

саттаратанасампанно, чаккаваттӣ махаббало.

50. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ саппида̄йако тхеро има̄ га̄тха̄йо абха̄ситтха̄ти.

саппида̄йакаттхерасса̄пада̄нам̣ навамам̣.