7. тиндукада̄йакаттхераапада̄нам̣

35. ‘‘гиридуггачаро а̄сим̣, маккат̣о тха̄мавегико;

пхалинам̣ тиндукам̣ дисва̄, буддхасет̣т̣хам̣ ануссарим̣.

36. ‘‘никкхамитва̄ катипа̄хам̣, вичиним̣ локана̄йакам̣;

пасанначитто сумано, сиддхаттхам̣ тибхавантагум̣.

37. ‘‘мама сан̇каппаман̃н̃а̄йа, саттха̄ локе ануттаро;

кхӣн̣а̄савасахассехи, а̄гаччхи мама сантикам̣.

38. ‘‘па̄моджджам̣ джанайитва̄на, пхалахаттхо упа̄гамим̣;

пат̣иггахеси бхагава̄, саббан̃н̃ӯ вадатам̣ варо.

39. ‘‘чатуннавутито каппе, йам̣ пхалам̣ ададим̣ тада̄;

дуггатим̣ на̄бхиджа̄на̄ми, пхалада̄нассидам̣ пхалам̣.

40. ‘‘саттапан̃н̃а̄сакаппамхи, упанандасана̄мако;

саттаратанасампанно, чаккаваттӣ махаббало.

41. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ тиндукада̄йако тхеро има̄ га̄тха̄йо абха̄ситтха̄ти.

тиндукада̄йакаттхерасса̄пада̄нам̣ саттамам̣.