19. кут̣аджапуппхийавагго

1. кут̣аджапуппхийаттхераапада̄нам̣

1. ‘‘суван̣н̣аван̣н̣ам̣ самбуддхам̣, сатарам̣сим̣ва уггатам̣;

дисам̣ анувилокентам̣, гаччхантам̣ анилан̃джасе.

2. ‘‘кут̣аджам̣ пуппхитам̣ дисва̄, сам̣виттхатасамоттхатам̣;

руккхато очинитва̄на, пхуссасса абхиропайим̣.

3. ‘‘двенавуте ито каппе, йам̣ пуппхамабхиропайим̣;

дуггатим̣ на̄бхиджа̄на̄ми, буддхапӯджа̄йидам̣ пхалам̣.

4. ‘‘ито саттарасе каппе, тайо а̄сум̣ супуппхита̄;

саттаратанасампанна̄, чаккаваттӣ махаббала̄.

5. ‘‘пат̣исамбхида̄ чатассо, вимоккха̄пи ча ат̣т̣химе;

чхал̣абхин̃н̃а̄ саччхиката̄, катам̣ буддхасса са̄санам̣’’.

иттхам̣ судам̣ а̄йасма̄ кут̣аджапуппхийо тхеро има̄ га̄тха̄йо абха̄ситтха̄ти.

кут̣аджапуппхийаттхерасса̄пада̄нам̣ пат̣хамам̣.

2. бандхуджӣвакаттхераапада̄нам̣

6. ‘‘сиддхаттхо на̄ма самбуддхо, сайамбхӯ саббхи ван̣н̣ито;

сама̄дхим̣ со сама̄панно, нисӣди паббатантаре.

7. ‘‘джа̄тассаре гавесанто, дакаджам̣ пуппхамуттамам̣;

бандхуджӣвакапуппха̄ни, аддасам̣ саманантарам̣.

8. ‘‘убхо хаттхехи паггайха, упа̄гаччхим̣ маха̄муним̣;

пасанначитто сумано, сиддхаттхасса̄бхиропайим̣.

9. ‘‘чатуннавутито каппе, йам̣ пуппхамабхиропайим̣;

дуггатим̣ на̄бхиджа̄на̄ми, буддхапӯджа̄йидам̣ пхалам̣.

10. ‘‘ито ча̄туддасе каппе, еко а̄сим̣ джана̄дхипо;

самуддакаппо на̄мена, чаккаваттӣ махаббало.

11. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ бандхуджӣвако тхеро има̄ га̄тха̄йо абха̄ситтха̄ти.

бандхуджӣвакаттхерасса̄пада̄нам̣ дутийам̣.

3. кот̣умбарийаттхераапада̄нам̣

12. ‘‘кан̣ика̄рам̣ва джотантам̣, нисиннам̣ паббатантаре;

аппамеййам̣ва удадхим̣, виттхатам̣ дхаран̣им̣ йатха̄.

13. ‘‘пӯджитам̣ [паретам̣ (сӣ.)] девасан̇гхена, нисабха̄джа̄нийам̣ йатха̄;

хат̣т̣хо хат̣т̣хена читтена, упа̄гаччхим̣ наруттамам̣.

14. ‘‘саттапуппха̄ни паггайха, кот̣умбарасама̄кулам̣;

буддхасса абхиропесим̣, сикхино локабандхуно.

15. ‘‘екаттим̣се ито каппе, йам̣ пуппхамабхиропайим̣;

дуггатим̣ на̄бхиджа̄на̄ми, буддхапӯджа̄йидам̣ пхалам̣.

16. ‘‘ито вӣсатикаппамхи, маха̄неласана̄мако;

еко а̄си маха̄теджо, чаккаваттӣ махаббало.

17. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ кот̣умбарийо тхеро има̄ га̄тха̄йо абха̄ситтха̄ти.

кот̣умбарийаттхерасса̄пада̄нам̣ татийам̣.

4. пан̃чахаттхийаттхераапада̄нам̣

18. ‘‘тиссо на̄ма̄си бхагава̄, локаджет̣т̣хо нара̄сабхо;

пураккхато са̄вакехи, ратхийам̣ пат̣ипаджджатха.

19. ‘‘пан̃ча уппалахаттха̄ ча, ча̄тура̄ т̣хапита̄ майа̄;

а̄хутим̣ да̄тука̄мохам̣, пагган̣хим̣ ватасиддхийа̄ [путтомхи хитасиддхийа̄ (сйа̄.)].

20. ‘‘суван̣н̣аван̣н̣ам̣ самбуддхам̣, гаччхантам̣ антара̄пан̣е;

буддхарам̣сӣхи пхут̣т̣хосми [буддхарам̣сйа̄бхипхут̣т̣хомхи (сӣ.), буддхарам̣са̄бхигхут̣т̣хосми (ка.)], пӯджесим̣ двипадуттамам̣.

21. ‘‘двенавуте ито каппе, йам̣ пуппхамабхипӯджайим̣;

дуггатим̣ на̄бхиджа̄на̄ми, буддхапӯджа̄йидам̣ пхалам̣.

22. ‘‘ито терасакаппамхи, пан̃ча сусабхасаммата̄;

саттаратанасампанна̄, чаккаваттӣ махаббала̄.

23. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ пан̃чахаттхийо тхеро има̄ га̄тха̄йо абха̄ситтха̄ти.

пан̃чахаттхийаттхерасса̄пада̄нам̣ чатуттхам̣.

5. исимуггада̄йакаттхераапада̄нам̣

24. ‘‘удентам̣ сатарам̣сим̣ва, пӣтарам̣сим̣ва [ситарам̣сим̣ва (сӣ.)] бха̄н̣умам̣;

какудхам̣ виласантам̣ва, падумуттарана̄йакам̣.

25. ‘‘исимугга̄ни писитва̄ [исисугга̄ни пим̣сетва̄ (сӣ.), исимуггам̣ нимантетва̄ (сйа̄.)], мадхукхудде анӣл̣аке;

па̄са̄дева т̣хито санто, ада̄сим̣ локабандхуно.

26. ‘‘ат̣т̣хасатасахасса̄ни, ахесум̣ буддхаса̄вака̄;

саббесам̣ паттапӯрентам̣ [паттапӯрам̣ там̣ (сӣ.)], тато ча̄пи бахуттарам̣.

27. ‘‘тена читтаппаса̄дена, суккамӯлена чодито;

каппа̄нам̣ сатасахассам̣, дуггатим̣ нупападжджахам̣.

28. ‘‘чатта̄лӣсамхи сахассе, каппа̄нам̣ ат̣т̣хатим̣са те;

исимуггасана̄ма̄ [махисамантана̄ма̄ (сйа̄.)] те, чаккаваттӣ махаббала̄.

29. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ исимуггада̄йако тхеро има̄ га̄тха̄йо абха̄ситтха̄ти.

исимуггада̄йакаттхерасса̄пада̄нам̣ пан̃чамам̣.

6. бодхиупат̣т̣ха̄каттхераапада̄нам̣

30. ‘‘нагаре раммаватийа̄, а̄сим̣ мураджава̄дако;

ниччупат̣т̣ха̄найуттомхи, гатохам̣ бодхимуттамам̣.

31. ‘‘са̄йам̣ па̄там̣ упат̣т̣хитва̄, суккамӯлена чодито;

ат̣т̣ха̄расакаппасате, дуггатим̣ нупападжджахам̣.

32. ‘‘паннарасе каппасате, ито а̄сим̣ джана̄дхипо;

мураджо [даматхо (сйа̄.)] на̄ма на̄мена, чаккаваттӣ махаббало.

33. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ бодхиупат̣т̣ха̄ко тхеро има̄ га̄тха̄йо абха̄ситтха̄ти.

бодхиупат̣т̣ха̄каттхерасса̄пада̄нам̣ чхат̣т̣хам̣.

7. екачинтикаттхераапада̄нам̣

34. ‘‘йада̄ дево [дева̄ (ка.)] девака̄йа̄, чавате [чаванти (ка.)] а̄йусан̇кхайа̄;

тайо садда̄ ниччхаранти, дева̄нам̣ анумодатам̣.

35. ‘ито бхо сугатим̣ гаччха, манусса̄нам̣ сахабйатам̣;

мануссабхӯто саддхамме, лабха саддхам̣ ануттарам̣.

36. ‘‘‘са̄ те саддха̄ нивит̣т̣ха̄сса, мӯладжа̄та̄ патит̣т̣хита̄;

йа̄ваджӣвам̣ асам̣хӣра̄, саддхамме суппаведите.

37. ‘‘‘ка̄йена кусалам̣ катва̄, ва̄ча̄йа кусалам̣ бахум̣;

манаса̄ кусалам̣ катва̄, абйа̄паджджам̣ [абйа̄паджджхам̣ (сйа̄.), аппама̄н̣ам̣ (итивуттаке 83)] нирӯпадхим̣.

38. ‘‘‘тато опадхикам̣ пун̃н̃ам̣, катва̄ да̄нена там̣ бахум̣;

ан̃н̃епи мачче саддхамме, брахмачарийе нивесайа’.

39. ‘‘има̄йа анукампа̄йа, дева̄ девам̣ йада̄ видӯ;

чавантам̣ анумоданти, ехи дева пунаппунам̣ [девапурам̣ пуна (сйа̄.)].

40. ‘‘сам̣вего ме [сам̣виггохам̣ (сйа̄.)] тада̄ а̄си, девасан̇гхе сама̄гате;

кам̣су на̄ма ахам̣ йоним̣, гамисса̄ми ито чуто.

41. ‘‘мама сам̣вегаман̃н̃а̄йа, саман̣о бха̄витиндрийо;

мамуддхаритука̄мо со, а̄гаччхи мама сантикам̣.

42. ‘‘сумано на̄ма на̄мена, падумуттараса̄вако;

аттхадхамма̄нуса̄ситва̄, сам̣веджеси мамам̣ тада̄.

43. ‘‘тасса̄хам̣ вачанам̣ сутва̄, буддхе читтам̣ паса̄дайим̣;

там̣ дхӣрам̣ абхива̄детва̄, таттха ка̄лам̣като ахам̣.

44. ‘‘упападжджим̣ са [упападжджиссам̣ (сӣ.)] таттхева, суккамӯлена чодито;

каппа̄нам̣ сатасахассам̣, дуггатим̣ нупападжджахам̣.

45. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ екачинтико тхеро има̄ га̄тха̄йо абха̄ситтха̄ти.

екачинтикаттхерасса̄пада̄нам̣ саттамам̣.

8. тикан̣н̣ипуппхийаттхераапада̄нам̣

46. ‘‘девабхӯто ахам̣ санто, аччхара̄хи пураккхато;

пуббакаммам̣ саритва̄на, буддхасет̣т̣хам̣ ануссарим̣.

47. ‘‘тикан̣н̣ипуппхам̣ [ким̣кан̣ипуппхам̣ (ка.)] паггайха, сакам̣ читтам̣ паса̄дайим̣;

буддхамхи абхиропесим̣, випассимхи нара̄сабхе.

48. ‘‘еканавутито каппе, йам̣ пуппхамабхипӯджайим̣;

дуггатим̣ на̄бхиджа̄на̄ми, буддхапӯджа̄йидам̣ пхалам̣.

49. ‘‘тесаттатимхито каппе, чатура̄сум̣ рамуттама̄;

саттаратанасампанна̄, чаккаваттӣ махаббала̄.

50. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ тикан̣н̣ипуппхийо [ким̣кан̣икапуппхийо (ка.)] тхеро има̄ га̄тха̄йо абха̄ситтха̄ти.

тикан̣н̣ипуппхийаттхерасса̄пада̄нам̣ ат̣т̣хамам̣.

9. екача̄рийаттхераапада̄нам̣

51. ‘‘та̄ватим̣сесу девесу, маха̄гхосо тада̄ аху;

буддхо ча локе нибба̄ти, майан̃чамха сара̄гино.

52. ‘‘тесам̣ сам̣вегаджа̄та̄нам̣, сокасалласаман̇гинам̣;

сабалена упаттхаддхо, агамам̣ буддхасантикам̣.

53. ‘‘манда̄равам̣ гахетва̄на, сан̇гӣти [сан̣хитам̣ (сӣ.), сан̇гитам̣ (сйа̄.)] абхиниммитам̣;

париниббутака̄ламхи, буддхасса абхиропайим̣.

54. ‘‘саббе дева̄нумодим̣су, аччхара̄йо ча ме тада̄;

каппа̄нам̣ сатасахассам̣, дуггатим̣ нупападжджахам̣.

55. ‘‘сат̣т̣хикаппасахассамхи, ито сол̣аса те джана̄;

маха̄малладжана̄ на̄ма, чаккаваттӣ махаббала̄.

56. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ екача̄рийо тхеро има̄ га̄тха̄йо абха̄ситтха̄ти.

екача̄рийаттхерасса̄пада̄нам̣ навамам̣.

10. тиван̣т̣ипуппхийаттхераапада̄нам̣

57. ‘‘абхибхӯтам̣ паниджджханти [абхибхӯтопаниджджханти (сӣ.)], саббе сан̇гамма те мамам̣ [абхибхум̣ тхерам̣ паниджджха̄ма, саббе сан̇гамма те майам̣ (сйа̄.)];

тесам̣ ниджджха̄йама̄на̄нам̣, парил̣а̄хо аджа̄йатха.

58. ‘‘сунандо на̄ма на̄мена, буддхасса са̄вако тада̄;

дхаммадассисса мунино, а̄гаччхи мама сантикам̣.

59. ‘‘йе ме баддхачара̄ а̄сум̣, те ме пуппхам̣ адум̣ тада̄;

та̄хам̣ пуппхам̣ гахетва̄на, са̄ваке абхиропайим̣.

60. ‘‘сохам̣ ка̄лам̣като таттха, пуна̄пи упападжджахам̣;

ат̣т̣ха̄расе каппасате, винипа̄там̣ на гаччхахам̣.

61. ‘‘терасето каппасате, ат̣т̣ха̄сум̣ дхӯмакетуно;

саттаратанасампанна̄, чаккаваттӣ махаббала̄.

62. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ тиван̣т̣ипуппхийо тхеро има̄ га̄тха̄йо абха̄ситтха̄ти;

тиван̣т̣ипуппхийаттхерасса̄пада̄нам̣ дасамам̣.

кут̣аджапуппхийавагго екӯнавӣсатимо.