1. бандхуджӣвакаттхераапада̄нам̣

1. ‘‘чандам̣ва вималам̣ суддхам̣, виппасаннамана̄вилам̣;

нандӣбхавапариккхӣн̣ам̣, тин̣н̣ам̣ локе висаттикам̣.

2. ‘‘нибба̄пайантам̣ джанатам̣, тин̣н̣ам̣ [дисва̄ (?)] та̄райатам̣ варам̣ [та̄райатам̣ муним̣ (сйа̄.)];

муним̣ ванамхи джха̄йантам̣ [ванасмим̣ джха̄йама̄нам̣ там̣ (сӣ. сйа̄.)], екаггам̣ сусама̄хитам̣.

3. ‘‘бандхуджӣвакапуппха̄ни, лагетва̄ суттакенахам̣;

буддхасса абхиропайим̣, сикхино локабандхуно.

4. ‘‘екаттим̣се ито каппе, йам̣ каммамакарим̣ тада̄;

дуггатим̣ на̄бхиджа̄на̄ми, буддхапӯджа̄йидам̣ пхалам̣.

5. ‘‘ито саттамаке каппе, мануджиндо маха̄йасо;

самантачаккху на̄ма̄си, чаккаваттӣ махаббало.

6. ‘‘пат̣исамбхида̄ чатассо, вимоккха̄пи ча ат̣т̣химе;

чхал̣абхин̃н̃а̄ саччхиката̄, катам̣ буддхасса са̄санам̣’’.

иттхам̣ судам̣ а̄йасма̄ бандхуджӣвако тхеро има̄ га̄тха̄йо абха̄ситтха̄ти.

бандхуджӣвакаттхерасса̄пада̄нам̣ пат̣хамам̣.