7. пхалада̄йакаттхераапада̄нам̣

75. ‘‘аджджха̄йако мантадхаро, тин̣н̣ам̣ веда̄на па̄рагӯ;

химавантасса̄видӯре, васа̄ми ассаме ахам̣.

76. ‘‘аггихуттан̃ча ме аттхи, пун̣д̣арӣкапхала̄ни ча;

пут̣аке никкхипитва̄на, думагге лаггитам̣ майа̄.

77. ‘‘падумуттаро локавидӯ, а̄хутӣнам̣ пат̣иггахо;

мамуддхаритука̄мо со, бхиккханто мамупа̄гами.

78. ‘‘пасанначитто сумано, пхалам̣ буддхассада̄сахам̣;

виттисан̃джанано майхам̣, дит̣т̣хадхаммасукха̄вахо.

79. ‘‘суван̣н̣аван̣н̣о самбуддхо, а̄хутӣнам̣ пат̣иггахо;

анталиккхе т̣хито саттха̄, имам̣ га̄тхам̣ абха̄сатха.

80. ‘‘‘имина̄ пхалада̄нена, четана̄пан̣идхӣхи ча;

каппа̄нам̣ сатасахассам̣, дуггатим̣ нупападжджаси’.

81. ‘‘тенева суккамӯлена, анубхотва̄на сампада̄;

паттомхи ачалам̣ т̣ха̄нам̣, хитва̄ джайапара̄джайам̣.

82. ‘‘ито саттасате каппе, ра̄джа̄ а̄сим̣ суман̇гало;

саттаратанасампанно чаккаваттӣ махаббало.

83. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ пхалада̄йако тхеро има̄ га̄тха̄йо абха̄ситтха̄ти.

пхалада̄йакаттхерасса̄пада̄нам̣ саттамам̣.