10. джа̄типӯджакаттхераапада̄нам̣

82. ‘‘джа̄йантасса випассисса, а̄локо випуло аху;

патхавӣ ча пакампиттха, саса̄гара̄ сапаббата̄.

83. ‘‘немитта̄ ча вийа̄кам̣су, буддхо локе бхависсати;

агго ча саббасатта̄нам̣, джанатам̣ уддхариссати.

84. ‘‘немитта̄нам̣ сун̣итва̄на, джа̄типӯджамака̄сахам̣;

едиса̄ пӯджана̄ наттхи, йа̄диса̄ джа̄типӯджана̄.

85. ‘‘сан̇кхаритва̄на [сам̣харитва̄на (сӣ. сйа̄.), сан̇каритва̄на (ка.)]

кусалам̣, сакам̣ читтам̣ паса̄дайим̣.

джа̄типӯджам̣ каритва̄на, таттха ка̄лан̇като ахам̣.

86. ‘‘йам̣ йам̣ йонупападжджа̄ми, деваттам̣ атха ма̄нусам̣;

саббе сатте абхибхоми, джа̄типӯджа̄йидам̣ пхалам̣.

87. ‘‘дха̄тийо мам̣ упат̣т̣ханти, мама читтаваса̄нуга̄;

на та̄ сакконти копетум̣, джа̄типӯджа̄йидам̣ пхалам̣.

88. ‘‘еканавутито каппе, йам̣ пӯджамакарим̣ тада̄;

дуггатим̣ на̄бхиджа̄на̄ми, джа̄типӯджа̄йидам̣ пхалам̣.

89. ‘‘супа̄ричарийа̄ на̄ма, чатуттим̣са джана̄дхипа̄;

ито татийакаппамхи, чаккаваттӣ махаббала̄.

90. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ джа̄типӯджако тхеро има̄ га̄тха̄йо абха̄ситтха̄ти.

джа̄типӯджакаттхерасса̄пада̄нам̣ дасамам̣.

маха̄парива̄равагго два̄дасамо.