9. бил̣а̄лида̄йакаттхераапада̄нам̣

53. ‘‘химавантасса̄видӯре, васа̄ми пан̣н̣асантхаре;

гха̄сесу гедхама̄панно, сеййасӣло чахам̣ [сейасӣловахам̣ (сйа̄. ка.)] тада̄.

54. ‘‘кхан̣анта̄лу [кхан̣ама̄лу (сйа̄.)] каламба̄ни, бил̣а̄литаккала̄ни ча;

колам̣ бхалла̄такам̣ биллам̣, а̄хатва̄ пат̣ийа̄дитам̣.

55. ‘‘падумуттаро локавидӯ, а̄хутӣнам̣ пат̣иггахо;

мама сан̇каппаман̃н̃а̄йа, а̄гаччхи мама сантикам̣.

56. ‘‘упа̄гатам̣ маха̄на̄гам̣, девадевам̣ нара̄сабхам̣;

бил̣а̄лим̣ паггахетва̄на, паттамхи окирим̣ ахам̣.

57. ‘‘парибхун̃джи маха̄вӣро, тосайанто мамам̣ тада̄;

парибхун̃джитва̄на саббан̃н̃ӯ, имам̣ га̄тхам̣ абха̄сатха.

58. ‘‘‘сакам̣ читтам̣ паса̄детва̄, бил̣а̄лим̣ ме ада̄ тувам̣;

каппа̄нам̣ сатасахассам̣, дуггатим̣ нупападжджаси’.

59. ‘‘чаримам̣ ваттате майхам̣, бхава̄ саббе самӯхата̄;

дха̄реми антимам̣ дехам̣, самма̄самбуддхаса̄сане.

60. ‘‘чатупан̃н̃а̄сито каппе, сумекхалийасавхайо;

саттаратанасампанно, чаккаваттӣ махаббало.

61. ‘‘пат̣исамбхида̄ чатассо…пе… катам̣ буддхасса са̄санам̣’’.

иттхам̣ судам̣ а̄йасма̄ бил̣а̄лида̄йако тхеро има̄ га̄тха̄йо абха̄ситтха̄ти.

бил̣а̄лида̄йакаттхерасса̄пада̄нам̣ навамам̣.