3-7. ан̃н̃а̄сикон̣д̣ан̃н̃аттхераапада̄нам̣

596. ‘‘падумуттарасамбуддхам̣, локаджет̣т̣хам̣ вина̄йакам̣;

буддхабхӯмимануппаттам̣, пат̣хамам̣ аддасам̣ ахам̣.

597. ‘‘йа̄вата̄ бодхийа̄ мӯле, йаккха̄ саббе сама̄гата̄;

самбуддхам̣ парива̄ретва̄, ванданти пан̃джалӣката̄.

598. ‘‘саббе дева̄ тут̣т̣хамана̄, а̄ка̄се сан̃чаранти те;

буддхо айам̣ ануппатто, андхака̄ратамонудо.

599. ‘‘тесам̣ ха̄сапарета̄нам̣, маха̄на̄до аваттатха;

килесе джха̄пайисса̄ма, самма̄самбуддхаса̄сане.

600. ‘‘дева̄нам̣ гираман̃н̃а̄йа, ва̄ча̄сабхимудӣрихам̣;

хат̣т̣хо хат̣т̣хена читтена, а̄дибхиккхамада̄сахам̣.

601. ‘‘мама сан̇каппаман̃н̃а̄йа, саттха̄ локе ануттаро;

девасан̇гхе нисӣдитва̄, има̄ га̄тха̄ абха̄сатха.

602. ‘‘‘сатта̄хам̣ абхиниккхамма, бодхим̣ аджджхагамам̣ ахам̣;

идам̣ ме пат̣хамам̣ бхаттам̣, брахмача̄рисса йа̄панам̣.

603. ‘‘‘тусита̄ хи идха̄гантва̄, йо ме бхиккхам̣ упа̄найи;

тамахам̣ киттайисса̄ми, сун̣отха мама бха̄сато.

604. ‘‘‘тим̣сакаппасахасса̄ни [тим̣саматте каппасагассе (сйа̄. ка.)], девараджджам̣ кариссати;

саббе деве абхибхотва̄, тидивам̣ а̄васиссати.

605. ‘‘‘девалока̄ чавитва̄на, мануссаттам̣ гамиссати;

сахассадха̄ чаккаваттӣ, таттха раджджам̣ кариссати.

606. ‘‘‘каппасатасахассамхи, окка̄какуласамбхаво;

готамо на̄ма готтена, саттха̄ локе бхависсати.

607. ‘‘‘тидаса̄ со чавитва̄на, мануссаттам̣ гамиссати;

ага̄ра̄ паббаджитва̄на, чхаббасса̄ни васиссати.

608. ‘‘‘тато саттамаке вассе, буддхо саччам̣ катхессати;

кон̣д̣ан̃н̃о на̄ма на̄мена, пат̣хамам̣ саччхика̄хити’.

609. ‘‘никкхантена̄нупаббаджим̣, падха̄нам̣ сукатам̣ майа̄;

килесе джха̄панаттха̄йа, паббаджим̣ анага̄рийам̣.

610. ‘‘абхигантва̄на саббан̃н̃ӯ, буддхо локе садеваке;

исина̄ме мига̄ран̃н̃е [имина̄ ме маха̄ран̃н̃ам̣ (сйа̄.), имина̄ ме мига̄ран̃н̃ам̣ (ка.)], аматабхерима̄хани.

611. ‘‘со да̄ни патто аматам̣, сантипадамануттарам̣;

сабба̄саве парин̃н̃а̄йа, вихара̄ми ана̄саво.

612. ‘‘пат̣исамбхида̄ чатассо, вимоккха̄пи ча ат̣т̣химе;

чхал̣абхин̃н̃а̄ саччхиката̄, катам̣ буддхасса са̄санам̣’’.

иттхам̣ судам̣ а̄йасма̄ ан̃н̃а̄сикон̣д̣ан̃н̃о [ан̃н̃а̄такон̣д̣ан̃н̃о (сӣ.), ан̃н̃а̄ кон̣д̣ан̃н̃о (сйа̄.)] тхеро има̄

га̄тха̄йо абха̄ситтха̄ти.

ан̃н̃а̄сикон̣д̣ан̃н̃аттхерасса̄пада̄нам̣ саттамам̣.