3-9. кхадираванийаревататтхераапада̄нам̣

628. ‘‘ган̇га̄ бха̄гӣратхӣ на̄ма, химаванта̄ пабха̄вита̄;

кутиттхе на̄вико а̄сим̣, ориме ча тарим̣ [оримам̣ ча таре (сйа̄.)] ахам̣.

629. ‘‘падумуттаро на̄йако, самбуддхо двипадуттамо;

васӣ сатасахассехи, ган̇га̄тӣрамупа̄гато [пуббе майхам̣ сутам̣ а̄си,§‘‘падумуттарана̄йако; васӣсатасахассехи, ган̇га̄сотам̣ тариссати‘‘; (сӣ.)].

630. ‘‘бахӯ на̄ва̄ сама̄нетва̄, вад̣д̣хакӣхи [чаммакехи (ка.)] сусан̇кхатам̣;

на̄ва̄йа [на̄ва̄нам̣ (ка.)] чхаданам̣ катва̄, пат̣има̄ним̣ нара̄сабхам̣.

631. ‘‘а̄гантва̄на ча самбуддхо, а̄рӯхи тан̃ча на̄вакам̣;

ва̄римаджджхе т̣хито саттха̄, има̄ га̄тха̄ абха̄сатха.

632. ‘‘‘йо со та̄реси самбуддхам̣, сан̇гхан̃ча̄пи ана̄савам̣;

тена читтаппаса̄дена, девалоке рамиссати.

633. ‘‘‘ниббаттиссати те бйамхам̣, сукатам̣ на̄васан̣т̣хитам̣;

а̄ка̄се пуппхачхаданам̣, дха̄райиссати саббада̄.

634. ‘‘‘ат̣т̣хапан̃н̃а̄сакаппамхи, та̄рако [та̄ран̣о (сйа̄.)] на̄ма кхаттийо;

ча̄туранто виджита̄вӣ, чаккаваттӣ бхависсати.

635. ‘‘‘саттапан̃н̃а̄сакаппамхи, чаммако [чампако (сӣ.), чамбако (сйа̄.)] на̄ма кхаттийо;

уггаччхантова сӯрийо, джотиссати махаббало.

636. ‘‘‘каппасатасахассамхи, окка̄какуласамбхаво;

готамо на̄ма готтена, саттха̄ локе бхависсати.

637. ‘‘‘тидаса̄ со чавитва̄на, мануссаттам̣ гамиссати;

ревато на̄ма на̄мена, брахмабандху бхависсати.

638. ‘‘‘ага̄ра̄ никкхамитва̄на, суккамӯлена чодито;

готамасса бхагавато, са̄сане паббаджиссати.

639. ‘‘‘со паччха̄ паббаджитва̄на, йуттайого випассако;

сабба̄саве парин̃н̃а̄йа, нибба̄йиссатина̄саво’.

640. ‘‘вӣрийам̣ [вирийам̣ (сӣ. сйа̄.)] ме дхурадхорайхам̣, йогаккхема̄дхива̄ханам̣;

дха̄реми антимам̣ дехам̣, самма̄самбуддхаса̄сане.

641. ‘‘сатасахассе катам̣ каммам̣, пхалам̣ дассеси ме идха;

сумутто саравегова, килесе джха̄пайӣ мама.

642. ‘‘тато мам̣ вананиратам̣, дисва̄ локантагӯ муни;

ванава̄сибхиккхӯнаггам̣, пан̃н̃апеси маха̄мати.

643. ‘‘пат̣исамбхида̄ чатассо, вимоккха̄пи ча ат̣т̣химе;

чхал̣абхин̃н̃а̄ саччхиката̄, катам̣ буддхасса са̄санам̣’’.

иттхам̣ судам̣ а̄йасма̄ кхадираванийо ревато тхеро има̄ га̄тха̄йо абха̄ситтха̄ти.

кхадираванийаревататтхерасса̄пада̄нам̣ навамам̣.