катхинабхедам̣

катхинааттхата̄диван̣н̣ана̄

403. катхине – ат̣т̣ха ма̄тика̄ти кхандхаке вутта̄ паккаманантика̄дика̄ ат̣т̣ха. палибодха̄нисам̣са̄пи пуббе вутта̄ ева.

404. пайогасса̄ти чӣварадхована̄дино саттавидхасса пуббакаран̣ассаттха̄йа йо удака̄харан̣а̄дико пайого кайирати, тасса пайогасса. катаме дхамма̄ анантарапаччайена паччайоти ана̄гатавасена анантара̄ хутва̄ катаме дхамма̄ паччайа̄ хонтӣти аттхо. саманантарапаччайена̄ти сут̣т̣ху анантарапаччайена, анантарапаччайамева а̄саннатарам̣ катва̄ пуччхати. ниссайапаччайена̄ти уппаджджама̄насса пайогасса ниссайам̣ а̄дха̄рабха̄вам̣ упагата̄ вийа хутва̄ катаме дхамма̄ паччайа̄ хонтӣти аттхо. упаниссайапаччайена̄ти упетена ниссайапаччайена; ниссайапаччайамева упагататарам̣ катва̄ пуччхати. пуреджа̄тапаччайена̄ти имина̄ пат̣хамам̣ уппаннасса паччайабха̄вам̣ пуччхати. паччха̄джа̄тапаччайена̄ти имина̄ паччха̄ уппаджджанакасса паччайабха̄вам̣ пуччхати. сахаджа̄тапаччайена̄ти имина̄ апуббам̣ ачаримам̣ уппаджджама̄на̄нам̣ паччайабха̄вам̣ пуччхати. пуббакаран̣асса̄ти дхована̄дино пуббакаран̣асса. паччуддха̄расса̄ти пура̄н̣асан̇гха̄т̣иа̄дӣнам̣ паччуддхаран̣асса. адхит̣т̣ха̄насса̄ти катхиначӣвара̄дхит̣т̣ха̄насса. аттха̄расса̄ти катхинаттха̄расса. ма̄тика̄нан̃ча палибодха̄нан̃ча̄ти ат̣т̣ханнам̣ ма̄тика̄нам̣ двиннан̃ча палибодха̄нам̣. ваттхусса̄ти сан̇гха̄т̣иа̄дино катхинаваттхусса; сесам̣ вуттанайамева.

евам̣ йан̃ча лаббхати йан̃ча на лаббхати, саббам̣ пуччхитва̄ ида̄ни йам̣ йасса лаббхати, тадева дассенто пуббакаран̣ам̣ пайогасса̄тиа̄дина̄ найена виссаджджанама̄ха. тассаттхо – йам̣ вуттам̣ ‘‘пайогасса катаме дхамма̄’’тиа̄ди, таттха вуччате, пуббакаран̣ам̣ пайогасса анантарапаччайена паччайо, саманантараниссайаупаниссайапаччайена паччайо. пайогасса хи саттавидхампи пуббакаран̣ам̣ йасма̄ тена пайогена ниппха̄детаббасса пуббакаран̣ассаттха̄йа со пайого кайирати, тасма̄ имехи чатӯхи паччайехи паччайо хоти. пуреджа̄тапаччайе панеса уддит̣т̣хадхаммесу екадхаммампи на лабхати, ан̃н̃адаттху пуббакаран̣асса сайам̣ пуреджа̄тапаччайо хоти, пайоге сати пуббакаран̣асса ниппхаджджанато. тена вуттам̣ – ‘‘пайого пуббакаран̣асса пуреджа̄тапаччайена паччайо’’ти. паччха̄джа̄тапаччайам̣ пана лабхати, тена вуттам̣ – ‘‘пуббакаран̣ам̣ пайогасса паччха̄джа̄тапаччайена паччайо’’ти. паччха̄ уппаджджанакасса хи пуббакаран̣асса аттха̄йа со пайого кайирати. сахаджа̄тапаччайам̣ пана ма̄тика̄палибодха̄нисам̣сасан̇кха̄те паннараса дхамме т̣хапетва̄ ан̃н̃о пайога̄дӣсу екопи дхаммо на лабхати, те ева хи паннараса дхамма̄ саха катхинаттха̄рена екато ниппхаджджантӣти ан̃н̃аман̃н̃ам̣ сахаджа̄тапаччайа̄ хонти. тена вуттам̣ – ‘‘паннараса дхамма̄ сахаджа̄тапаччайена паччайо’’ти. етенупа̄йена саббападависсаджджана̄ни ведитабба̄ни.

пуббакаран̣анида̄на̄дивибха̄гаван̣н̣ана̄

405. пуббакаран̣ам̣ ким̣нида̄нантиа̄дипуччха̄виссаджджанам̣ утта̄намева.

406-7. ‘‘пайого ким̣нида̄но’’тиа̄дӣсу пуччха̄двайависсаджджанесу хетунида̄но паччайанида̄ноти еттха чха чӣвара̄ни хету чева паччайо ча̄ти ведитабба̄ни. пуббапайога̄дӣнан̃хи саббесам̣ та̄нийева хету, та̄ни паччайо. на хи чхаббидхе чӣваре асати пайого аттхи, на пуббакаран̣а̄дӣни, тасма̄ ‘‘пайого хетунида̄но’’тиа̄ди вуттам̣.

408. сан̇гахава̄ре – вачӣбхедена̄ти ‘‘има̄йа сан̇гха̄т̣ийа̄, имина̄ уттара̄сан̇гена, имина̄ антарава̄сакена катхинам̣ аттхара̄мӣ’’ти етена вачӣбхедена. катимӯла̄дипуччха̄виссаджджане – кирийа̄ маджджхети паччуддха̄ро чева адхит̣т̣ха̄нан̃ча.

411. ваттхувипаннам̣ хотӣти акаппийадуссам̣ хоти. ка̄лавипаннам̣ на̄ма аджджа да̄йакехи диннам̣ све сан̇гхо катхинаттха̄ракасса дети. каран̣авипаннам̣ на̄ма тадахева чхиндитва̄ акатам̣.

катхина̄диджа̄нитаббавибха̄гаван̣н̣ана̄

412. катхинам̣ джа̄нитаббантиа̄дипуччха̄йа виссаджджане – тесан̃н̃ева дхамма̄нанти йесу рӯпа̄дидхаммесу сати катхинам̣ на̄ма хоти, тесам̣ самодха̄нам̣ миссӣбха̄во. на̄мам̣ на̄макаммантиа̄дина̄ пана ‘‘катхина’’нти идам̣ бахӯсу дхаммесу на̄маматтам̣, на параматтхато еко дхаммо аттхӣти дассети.

чатувӣсатийа̄ а̄ка̄рехӣти ‘‘на улликхитаматтена̄’’тиа̄дӣхи пуббе вуттака̄ран̣ехи. саттарасахи а̄ка̄рехӣти ‘‘ахатена аттхатам̣ хоти катхина’’нтиа̄дӣхи пуббе вуттака̄ран̣ехи. нимиттакамма̄дӣсу йам̣ ваттаббам̣ саббам̣ катхинаккхандхакаван̣н̣ана̄йам̣ вуттам̣.

416. екуппа̄да̄ еканиродха̄ти уппаджджама̄на̄пи екато уппаджджанти, нируджджхама̄на̄пи екато нируджджханти. екуппа̄да̄ на̄на̄ниродха̄ти уппаджджама̄на̄ екато уппаджджанти, нируджджхама̄на̄ на̄на̄ нируджджханти. ким̣ вуттам̣ хоти? саббепи аттха̄рена саддхим̣ екато уппаджджанти, аттха̄ре хи сати уддха̄ро на̄ма. нируджджхама̄на̄ панеттха пурима̄ две аттха̄рена саддхим̣ екато нируджджханти, уддха̄рабха̄вам̣ па̄пун̣анти. аттха̄расса хи ниродхо етесан̃ча уддха̄рабха̄во екаккхан̣е хоти, итаре на̄на̄ нируджджханти. тесу уддха̄рабха̄вам̣ паттесупи аттха̄ро тит̣т̣хатийева. сесам̣ саббаттха утта̄намева̄ти.

самантапа̄са̄дика̄йа винайасам̣ван̣н̣ана̄йа

катхинабхедаван̣н̣ана̄ нит̣т̣хита̄.

пан̃н̃аттиваггаван̣н̣ана̄ нит̣т̣хита̄.