2. дутийаанийатасиккха̄падаван̣н̣ана̄

452. тена самайена буддхо бхагава̄ти дутийаанийатасиккха̄падам̣. таттха бхагавата̄ пат̣иккхиттантиа̄димхи ‘‘йам̣ еко ека̄йа рахо пат̣иччханне а̄сане алам̣камманийе нисаджджам̣ каппеййа, там̣ нисаджджам̣ каппетум̣ пат̣иккхитта’’нти евам̣ самбандхо ведитаббо. итаратха̄ хи ‘‘екасса ека̄йа̄’’ти ваттаббам̣ сийа̄, касма̄? ‘‘пат̣иккхитта’’нти вуттатта̄. са̄миаттхе ва̄ етам̣ паччаттавачанам̣ ведитаббам̣.

453. на хева кхо пана пат̣иччханнанти еттха пана йампи бахи париккхиттам̣ анто виват̣ам̣ паривен̣ан̇ган̣а̄ди, тампи антогадханти ведитаббам̣. еварӯпан̃хи т̣ха̄нам̣ аппат̣иччханнейева гахитанти маха̄паччарийам̣ вуттам̣. сесам̣ пат̣хамасиккха̄паданайенева ведитаббам̣. кевалан̃хи идха иттхӣпи пурисопи йо кочи вин̃н̃ӯ анандхо абадхиро антодва̄дасахаттхе ока̄се т̣хито ва̄ нисинно ва̄ виккхиттопи нидда̄йантопи ана̄паттим̣ кароти. бадхиро пана чаккхума̄пи андхо ва̄ абадхиропи на кароти. па̄ра̄джика̄паттин̃ча париха̄петва̄ дут̣т̣хуллава̄ча̄патти вутта̄ти айам̣ висесо. сесам̣ пуримасадисамева. убхайаттха̄пи умматтакаа̄дикаммика̄нам̣ ана̄патти.

самут̣т̣ха̄на̄дӣсу идам̣сиккха̄падам̣ тисамут̣т̣ха̄нам̣ – ка̄йачиттато, ва̄ча̄читтато, ка̄йава̄ча̄читтато ча самут̣т̣ха̄ти. кирийам̣, сан̃н̃а̄вимоккхам̣, сачиттакам̣, локаваджджам̣, ка̄йакаммам̣, вачӣкаммам̣, акусалачиттам̣, сукхамаджджхаттаведана̄хи двиведанам̣. сесам̣ утта̄наттхамева̄ти.

дутийаанийатасиккха̄падаван̣н̣ана̄ нит̣т̣хита̄.

самантапа̄са̄дика̄йа винайасам̣ван̣н̣ана̄йа

анийатаван̣н̣ана̄ нит̣т̣хита̄.