3. вика̄лага̄маппависанасиккха̄падаван̣н̣ана̄

508. татийе – тираччха̄накатханти арийамаггасса тираччха̄набхӯтам̣ катхам̣. ра̄джакатханти ра̄джапат̣исам̣йутта катхам̣. чоракатха̄дӣсупи есева найо.

512. сантам̣ бхиккхунти еттха йам̣ ваттаббам̣, там̣ ча̄риттасиккха̄паде вуттамева. саче самбахула̄ кеначи каммена га̄мам̣ пависанти, ‘‘вика̄ле га̄маппавесанам̣ а̄пуччха̄мӣ’’ти саббехи ан̃н̃аман̃н̃ам̣ а̄пуччхитаббам̣. тасмим̣ га̄ме там̣ каммам̣ на сампаджджатӣти ан̃н̃ам̣ га̄мам̣ гаччханти, га̄масатампи хоту, пуна а̄пуччханакиччам̣ наттхи. саче пана усса̄хам̣ пат̣иппассамбхетва̄ виха̄рам̣ гаччханта̄ антара̄ ан̃н̃ам̣ га̄мам̣ пависитука̄ма̄ хонти, пуна а̄пуччхитаббамева.

кулагхаре ва̄ а̄санаса̄ла̄йа ва̄ бхаттакиччам̣ катва̄ телабхиккха̄йа ва̄ саппибхиккха̄йа ва̄ чаритука̄мо хоти, саче пассе бхиккху аттхи, а̄пуччхитва̄ гантаббам̣. асанте наттхӣти гантаббам̣. вӣтхим̣ отаритва̄ бхиккхум̣ пассати, а̄пуччханакиччам̣ наттхи, ана̄пуччхитва̄пи чаритаббамева. га̄мамаджджхена магго хоти, тена гаччхантасса тела̄дибхиккха̄йа чарисса̄мӣти читте уппанне саче пассе бхиккху аттхи, а̄пуччхитва̄ чаритаббам̣. магга̄ аноккамма бхиккха̄йа чарантасса пана а̄пуччханакиччам̣ наттхи, апариккхиттасса га̄масса упача̄ро адинна̄да̄не вуттанайенева ведитаббо.

515. антара̄ра̄мантиа̄дӣсу на кевалам̣ ана̄пуччха̄ ка̄йабандханам̣ абандхитва̄ сан̇гха̄т̣им̣ апа̄рупитва̄ гаччхантассапи ана̄патти. а̄пада̄сӯти сӣхо ва̄ бйаггхо ва̄ а̄гаччхати, мегхо ва̄ ут̣т̣хети, ан̃н̃о ва̄ кочи упаддаво уппаджджати, ана̄патти. еварӯпа̄су а̄пада̄су бахига̄мато антога̄мам̣ пависитум̣ ват̣т̣ати. сесаметтха утта̄намева.

катхинасамут̣т̣ха̄нам̣ – ка̄йава̄чато ка̄йава̄ча̄читтато ча самут̣т̣ха̄ти, кирийа̄кирийам̣, носан̃н̃а̄вимоккхам̣, ачиттакам̣, пан̣н̣аттиваджджам̣, ка̄йакаммам̣, вачӣкаммам̣, тичиттам̣, тиведананти.

вика̄лага̄маппависанасиккха̄падам̣ татийам̣.