9. пан̣ӣтабходжанасиккха̄падаван̣н̣ана̄

257. навамасиккха̄паде – пан̣ӣтабходжана̄нӣти уттамабходжана̄ни. касса сампаннам̣ на мана̄панти сампаттийуттам̣ касса на пийам̣. са̄дунти сурасам̣.

259. йо пана бхиккху еварӯпа̄ни пан̣ӣтабходжана̄ни агила̄но аттано аттха̄йа вин̃н̃а̄петва̄ бхун̃джеййа̄ти еттха суддха̄ни саппиа̄дӣни вин̃н̃а̄петва̄ бхун̃джанто па̄читтийам̣ на̄паджджати, секхийесу сӯподанавин̃н̃аттидуккат̣ам̣ а̄паджджати, оданасам̣сат̣т̣ха̄ни пана вин̃н̃а̄петва̄ бхун̃джанто па̄читтийам̣ а̄паджджатӣти ведитаббо, айам̣ киреттха адхиппа̄йо. тенева ча ‘‘пан̣ӣта̄нӣ’’ти аватва̄ ‘‘пан̣ӣтабходжана̄нӣ’’ти сутте вуттам̣. ‘‘пан̣ӣта̄нӣ’’ти хи вутте саппиа̄дӣнам̣йева гахан̣ам̣ хоти, ‘‘пан̣ӣтабходжана̄нӣ’’ти вутте пана пан̣ӣтасам̣сат̣т̣ха̄ни саттадхан̃н̃аниббатта̄ни бходжана̄ни пан̣ӣтабходжана̄нӣти айаматтхо пан̃н̃а̄йати.

ида̄ни вин̃н̃а̄пети пайоге дуккат̣антиа̄дӣсу айам̣ виниччхайо – ‘‘саппина̄ бхаттам̣ дехи, саппим̣ а̄киритва̄ дехи, саппимиссакам̣ катва̄ дехи, сахасаппина̄ дехи, саппин̃ча бхаттан̃ча дехӣ’’ти вин̃н̃а̄пентасса вин̃н̃аттийа̄ дуккат̣ам̣, пат̣иггахан̣е дуккат̣ам̣, аджджхоха̄ре па̄читтийам̣. ‘‘саппибхаттам̣ дехӣ’’ти вутте пана йасма̄ са̄либхаттам̣ вийа саппибхаттам̣ на̄ма наттхи; тасма̄ сӯподанавин̃н̃аттидуккат̣амева ведитаббам̣.

саче пана ‘‘саппина̄ бхаттам̣ дехӣ’’ти вутте бхаттам̣ датва̄ ‘‘саппим̣ катва̄ бхун̃джа̄’’ти наванӣтам̣ ва̄ кхӣрам̣ ва̄ дадхим̣ ва̄ дети, мӯлам̣ ва̄ пана дети, ‘‘имина̄ саппим̣ гахетва̄ бхун̃джа̄’’ти йатха̄ваттхукамева. ‘‘госаппина̄ бхаттам̣ дехӣ’’ти вутте пана госаппина̄ ва̄ дету, госаппимхи асати, пуриманайенева гонаванӣта̄дӣни ва̄ га̄вим̣йева ва̄ дету ‘‘ито саппина̄ бхун̃джа̄’’ти йатха̄ваттхукамева. саче пана госаппина̄ йа̄чито аджийа̄ саппиа̄дӣхи дети, висан̇кетам̣. еван̃хи сати ан̃н̃ам̣ йа̄читена ан̃н̃ам̣ диннам̣ на̄ма хоти, тасма̄ ана̄патти. еса найо аджийа̄ саппина̄ дехӣти а̄дӣсупи.

‘‘каппийасаппина̄ дехӣ’’ти вутте акаппийасаппина̄ дети, висан̇кетамева. ‘‘акаппийасаппина̄ти вутте акаппийасаппина̄ дети, пат̣иггахан̣епи парибхогепи дуккат̣амева. акаппийасаппимхи асати пуриманайенева акаппийанаванӣта̄дӣни дети ‘‘саппим̣ катва̄ бхун̃джа̄’’ти акаппийасаппина̄ва диннам̣ хоти. ‘‘акаппийасаппина̄’’ти вутте каппийена дети, висан̇кетам̣. ‘‘саппина̄’’ти вутте сесесу наванӣта̄дӣсу ан̃н̃атарена дети, висан̇кетамева. еса найо наванӣтена дехӣтиа̄дӣсупи. йена йена хи вин̃н̃атти хоти, тасмим̣ ва̄ тасса мӯле ва̄ ладдхе, там̣ там̣ ладдхамева хоти.

саче пана ан̃н̃ам̣ па̄л̣ийа̄ а̄гатам̣ ва̄ ана̄гатам̣ ва̄ денти, висан̇кетам̣. па̄л̣ийам̣ а̄гатанаванӣта̄дӣни т̣хапетва̄ ан̃н̃ехи наванӣта̄дӣхи вин̃н̃а̄пентасса дуккат̣ам̣. йатха̄ ча ‘‘саппибхаттам̣ дехӣ’’ти вутте са̄либхаттасса вийа саппибхаттасса абха̄ва̄ сӯподанавин̃н̃аттидуккат̣амева хотӣти вуттам̣. евам̣ наванӣтабхаттам̣ дехӣтиа̄дӣсупи. пат̣ипа̄т̣ийа̄ екамекам̣ виттха̄ретва̄ вуччама̄непи хи айамеваттхо ваттаббо сийа̄, со ча сан̇кхепенапи сакка̄ н̃а̄тум̣, ким̣ таттха виттха̄рена? тена вуттам̣ – ‘‘еса найо наванӣтена дехӣтиа̄дӣсупӣ’’ти.

саче пана саббехипи саппиа̄дӣхи екат̣т̣ха̄не ва̄ на̄на̄т̣т̣ха̄не ва̄ вин̃н̃а̄петва̄ пат̣иладдхам̣ екабха̄джане а̄киритва̄ екарасам̣ катва̄ тато кусаггена̄пи дживхагге биндум̣ т̣хапетва̄ аджджхохарати, нава па̄читтийа̄ни а̄паджджати. вуттампи четам̣ парива̄ре –

‘‘ка̄йика̄ни на ва̄часика̄ни,

сабба̄ни на̄на̄ваттхука̄ни;

апуббам̣ ачаримам̣ а̄паджджеййа екато,

пан̃ха̄меса̄ кусалехи чинтита̄’’ти. (пари. 481);

261. агила̄но гила̄насан̃н̃ӣти еттха саче гила̄насан̃н̃ӣпи хутва̄ бхесаджджаттха̄йа пан̃ча бхесаджджа̄ни вин̃н̃а̄пети, маха̄на̄масиккха̄падена ка̄ретаббо. нава пан̣ӣтабходжана̄ни вин̃н̃а̄пенто пана имина̄ сиккха̄падена ка̄ретаббо. бхиккхунӣнам̣ пана ета̄ни па̄т̣идесанӣйаваттхӯни хонти, сӯподанавин̃н̃аттийам̣ убхайесампи секхапан̣н̣аттидуккат̣амева. сесаметтха утта̄намева.

чатусамут̣т̣ха̄нам̣ – ка̄йато ка̄йава̄чато ка̄йачиттато ка̄йава̄ча̄читтато ча самут̣т̣ха̄ти,

кирийам̣, носан̃н̃а̄вимоккхам̣, ачиттакам̣, пан̣н̣ативаджджам̣, ка̄йакаммам̣, вачӣкаммам̣, тичиттам̣, тиведананти.

пан̣ӣтабходжанасиккха̄падам̣ навамам̣.